1 Tesalonaika
Polva Numhowol Vevna Kristusnindm Nemelm.
1
Hona indhanamini, Pol hev, Sailas, Timoti. Dom Kristusnindm Tesalonaikaram, yimba doa pepavena Sesoa arainda, eva mendekli Yesus Kristusinda. Sesoaoa yemoa wavra vrowol vera, wo vinda, osm noinda yimba indwonamba beswonamba avra.
Memba Und, Noi Nona Tesalonaikanind Avnam.
Kava yemba nengaomana vinv, wo elsus kava Sesoamba ishumniv, os Tesalonaikanindva lehra viv, yeoa hemoa kolvrowol veo. Nomba Sesoava pina aral luhunv, wo kava elsus hemba sembayangmba velvohmanav, wo kava os olvohmanav, Tesalonaikanindva lehra viv. Himba Kristusmba keknam undnahonam lovahmanav, wo wevsa besal engiv. Hev indhanam monglam und vewol viv, doa nesmos vewol viv, wo hevpa hona andramba wuleihinamoa. Hev nengviluwuv pivna mendeklim Yesus Kristusm, himba si henga provav.
Seh, Sesoava mindnam und vewol vev yemba. Wo kava os ningv, os himba doa kikih vewol vena yemba hevelm. Noinda osra, kava doa yemba wulambinna besalnemelmomba. Wo heva os kava moangasva vrivnamoa, kava wulambna besalnemelmomba hevnasowana, Sesoasongolna sowara. Eva yimba hillinamba, wohkek vithina, osm nowolnonoa, noi ten tanamolnam wohlohvm. Eva yimba nonora av, osva es kava aevulna, nonamba kava yemba woneuvnamba. Yimba kana wevsam nunglinamba, una, pim himba besallam sandhalm prona. Wo yemba doa nilhawol vena, os men ka, eva os ten hev mendekli Yesus lohvm. Wo osra yimba kinmba mindnam lopsho avramana vevna, wo heva os yimba wohkevrivna nemelmomba. Sesoasongolva yemba sihengu vinna, noinda yimba indk vithivna.
Yimba osalm doa nilhaprinna novtotholm Sesoanindmba indkumbimba Masetoniaprovinsnindm, eva Akaiaprovinsnindm. Manara, mendeklina moamba nomini yenamini wulbukethinvna indakonda Masetoniaram, eva Akaiaram. Wo yenamba undnahonamba amnalmba Sesoamba, doa annind annind ahalungana, osva hi hi hi. Wo doa kava nengvmoa, hengamba hemba ishunilmba yemomba.
Indhanamba osva no kembella, no kembella eishunv wevsabesalm yenam, pev ten kam hilvnisnam moanahonam, nonam kav di aevulvnam seilm ten yemongo. Himba nom eishov, ov, yimba es hevpa wuleihina, tihsongomba sembayang vewuvmona vinilmba, wo weihaloh avramana vena, henga amnalm Sesoanonoam, nom ten wohavm yunalm. 10 Wo yimba nilhaprana, nengviluwuvulm Sesoana ombolm, holapelm senaminim. Sesoa nomba ombolmba wolaihaphona pokamariniva. Himba yunam Yesus, he pimba lopshav Sesoana wusprollava, eva lesvhoawolliniva, nomba tanam si wohprovav.