EFESUS
Pol ere Efesus komri tatame emne bas rasem siglou.
Kiyi late tuma.
Gwote siglou Pol eter bas rasem, ere Efesus komke temenem Kristen tatame emne newopitim. Efesus kom e kantri Turki etek tetan.
Gwote tuma yenbo Pol ere etep bas rasem. God ere akei gwote nowselri wos seikim, akei wosken akei tatameken eme Aneyen Jisas eteri kulke tetan (1:9-10). God ere etep wom, Kristen tatame eme geisimasekap. Eme Ane wurisubu tetan, e Apei God eter. God ere Kristen tatame emne kenem, eme eteri tatame tem. Jisas ere etemri wule yaperke san peten sepitim. Sene ere God Eteri Wou won yam, ere Jisas erne kenawaike abobe tatame emne kwokwos kwokwos kobo labe, eme wule yenbo ek nenbe (1:13-14).
Pol ere God eteri kik tetan tuma somo noub etep wusowum. Krais ere Kristen tatame etemri tare. Kristen tatame eme eteri wusom. Eme Krais eteri kulke tetan (4:1-10). Jisas Krais eterke God ere tatame emne pap yewobe, ere emne noubwai lakerebe. Pol ere etep bas rasem.
Pol ere Efesus komri tatame emne bas rasem tuma gwote.
Sapta 1—3. God ere Krais eterke tatame nemne porere ager newom.
Sapta 4—6. Nema Krais eteri wusom, eke nema God eteri wulewou tobote.
1
An Pol, God ere ane wom, an Krais Jisas eteri aposel yaku kerbe tame tem. Kem Efesus komke tetan God eteri tatame. Kem Krais erne kenawaike som abobe tatame yenbo, an kemne gwote siglou bas rasbe. An abobe, neremri Apei God eterken Aneyen Jisas Krais eterken epe kemne kobo lan noub nente, kem pap yenbo temente nenbe.
Krais eterke God ere nemne Hevenri wos yenbo newobe.
Nema God erne pir won eri sig eisau wobe. Ere Aneyen Jisas Krais eteri Ar, eteri Keryen God. Nema Krais eterken belandeten tatame, eke Hevenri wulek God ere nemne yenbo noub nenbe, neremri selpap yenbo tetan. Kiyisape God ere nowsel mak seikmenem, ere nemne kenen etep wom. Ari kenem tatame, yuri eme Krais erne kenawaike abote, eteke eme tatame yenbowai tete. Eme wule yaper beke kip nen. An emne etep lakerete nenbe. Ere etep wom. Kiyisape ere nemne pap yewon nemne pette wom. Ere eteri porerek etep wom. Ete tatame, yuri eme Jisas Krais erne kenawaike abote, etepkap eme areri yen tete. Eteri porerek ere etep wom. God ere nemne kobo eisau lam. Eteri selpapri Yen adebas, Krais eterke, ere nemne noubwai eyarem. Ere eger beke te. Berai. Ere nemne bepou me noub eyarem, eke nema God eteri sig yenbo eisau wobe.
7-8 God eri kobo labe wule ere eisauwai. Krais ere sam, eri nep yeirimke, ere neremri wule yaper tuken ere nerem nenbetem wule yaper peten sepitim. Eteke God ere eteri porere yenbok nemne noubwai eyarem. God ere noub abon nemne nente womkap ere nemne yuri peteram. Ere Krais eterke nenem wule e kiyi me berasmenem. 10 Eri wom wule gwo. God ere kiyi seikim wos nogwape, nowselri wosken nelri wosken ere akei wurisubuk tete. Tete, eme Krais eteri kulke temente. God eter wom yabel tete, ere etep nente nenbe.
11 Be wos be wos tebe, God eter kiyisapek womkap, ete wos ek tebe. Kiyi God eter womke, nema Juda tatame nema Krais eterken kiyi belandem, nema eteri tatame tem. 12 Nema Krais erne kiyi kenawaike abobetem tatame, God ere nemne wom, eke nema eteri sig eisau som wobetete.
13 Sene Juda berai tatame kerem kir kem ete Tuma Yenbo, tuma seken kem meten kem Krais erne kenawaike abom, eke God ere kemne sene petem. Etep tem, God ere womkap, ere Eteri Wou kemne newom. Newom, nema metten, kem eteri tatame tem. 14 Nema God Eteri Wou petem, eke nema metten, God ere eteri tatame emne newote womkap, nema pette nenbe. Yuri tete yabel nema ete wos pette nenbe, eke nema God eteri sig eisau som wobetete.
Pol ere God erne wometem, God ere Efesus komri tatame emne porere newote.
15 An metem, kem Aneyen Jisas erne kenawaike abobe, kem God eri tatame nogwape emne pap yewobe. 16 An etep metem yabelke, sene kwokwos kwokwos an kemne abon, God erne pir som wobe. 17 Neremri Aneyen Jisas Krais eteri Apei ere mure sapeken Keryen. An erne wolate, ere kemne selpapken porereken yenbo newote, eke eteri tuma, eteri tebekap, kem noub mette. 18 An erne wolabe, ere kemne gwote wos noub peterate, eke kem noub mette. God ere kemne wom, ere kemne yenbowai eyarte. Ere keremken eteri akeite tatameken kemne wos yenbotanbo newote nenbe. Kem kenawaike abobe tatame, ere kemri selpapke mureken yaku eisau kerebe. Kem etep noub mette, eke an etep wolabe.
19 Eter nemne kobo labe mure ere sapekenwai, e nowselri mure me teitkwunbe. 20 Ete mure ere Krais erne wou sene newom, ere Hevenke yin God eteri piseit yekwok siten. 21 Etek Krais ere kom panen siten. Akei mureken omugabo, akei apeilake, akei nowselri keryen, akei mureken wos eme eteri kulke tetan. Eteri sig e eisauwai. Gwopte tetan sigken wos, yuri tete sigken wos emne ere teitkwunten. 22 God ere akei wos nogwape Krais eteri tewo kulke petewurem. Petewurem, ere akei wosri Keryen tem. God ere wom. Krais ere keremri Keryen eisau. Ere keremri tarekap. Etep wom. 23 Sios e eteri wusom. Eme eterke ten yaten. Ere akei woske ten yaten. Etep wom.