2 KORIN
Pol so mamey meyki ma mey hok non, kristen Korin ko me
Meyamey uwr hokwe: Aposel Pol.
Yier hiy ma lwayr meyamey hokwe: Hiykwe Efesus mon lwak non meyamey.
Enekwei hiy ma meyamey hokwe: Hiykwe enekwei Yia 57 sok meyamey kok, Jisas hiy ma lokrue so meyki.
Ok mamey mon ma lwak mokwe senkin: Pol so mamey peyr ko Korin-uwrsa me ma meyamey kow ha kokwe, weynpaweyn piap-araw lowpwarowp serey ma lousne sa-ousne seme mon kueyn-yay pa, sawk yor har me-aw mon kueyn-yay. Ipey-ar kokwe Pol hiykwe, hyo krai aposel-mey ke ma meio ke ma lon-seyrpaseyr ke mon kueyn-yay e mon. Pol hiykwe sawk sehe ma-meyamey, hme senkin mesair kow e, God hiykwe hye krai po kow, aposel-mey meio ey hokwe.
Pol so uron ipey-ar hokwe senkin: Weynpaweyn piap-araw Korin hom ma mon yorpayor mokwe, mamey erey liy lira mesor nonkway. Mamey mon kokwe Pol hiykwe hiykiaw-ayay lohruw-a, hom hye ma mon piapmapiap sehe. Hiykwe hyo uwrsa Korin ko mokwe sawk uron-pi ko-ar nuw-wak. Pol hiykwe hyo liwak yor arian o, seyr kristen mo liwak yor o, seme ma lohruw-a hokwe, hiykwe senkin lira, Satan hiykwe aryar-uwr, God so mey me mon piapay e pawk, sawk God hiykwe seirpey-aw lwak, hiykwe unsaney hye ma nan-kiykiy-ay me hiy-meio kraipakrai.
1
Pol so peyrmawk-ok
1 Mamey okukwe Pol ha mey, hromo wayh Timoti se nion. Ha Krais Jisas so aposel ma kiy-wak ohokwe, God so uron ko arian.
Hakwe God so sios, Korin mon ma lwak o, seyr kristen-uwrsa lowpwarowp kipay Akaia mon ma lwak o, seme mey kow ha.
2 Hromo Aio God o, seyr hromo Hakamay Jisas Krais o, hme kokwe maym kow yor o, liwak marowhway yor o, seme ka kow.
Pol so ok God se ma nak-me-ihey hok non
3 Hromkwe hromo God, Hakamay Jisas Krais so Aio se me-ihey e. Hiykwe uron lowk yor so Aio, seyr hiykwe hiy-mon woro-woro yor so God. *Ro 15:5 4 Hiykwe hreme kokwe hromo low lowpwarowp me hiy-mon woro-woro ihey. Sa hromkwe uwrsa har low senkin senkin non lwak me liy ma-sahre hiy-mon woro-woro, God hiy hreme ma hiy-mon senkin. 5 Hrom Krais se hokuaw aw ma nak-ok mokwe, kraiar, seyr liy-liy-aw, Krais se hokuaw hreme hiy-mon woro-woro yor mokwe, kraiar. *Sng 34:19 6 Enekwei hrom low non lwak ankin, sohokwe hme hiy-mon woro-woro ey, seyr hme ma-sahre-huonok prosue ey. Sa enekwei hreme hiy-mon woro-woro ankin, sohokwe seyr hme ma-sahre hiy-mon woro-woro, seyr hme krai kow, hom lorok kraipakrai e, enekwei hom aw hreme hieyn nak-ok me. 7 Sa hromo uron, hmo lorok kraiay yor me ma nan mokwe imnok amnok lwak pey. Payhokuaw, hromkwe senkin nonkway, hom hreme nion aw ma nonnak-ok somokwe, homkwe seyr liyliy-aw, hiy-mon woro-woro yor hrom ma lonok seme non-onok wayr.
8 Wayh-om, hromkwe hme ma-me nanpanan ley, low, hreme kipay Esia mon ma lousne me. Low somokwe aiopey, seyr low nuw-hei, sa hromkwe hreme lokrue ame nak-hok wayr. *Ap 19:23; 1 Ko 15:32 9 Hromkwe sawk senkin seme nan liok, enekwei hreme lokrue ey hokwe mo sehe. Sawk yor sokukwe sokwe lousne, hrom hromo krai arian mo kueir kueir-aw lwak ame, sawk hromkwe God, lokrue me ma ma-me-sian so kueir kueir-aw lwak e hokuaw. 10 Enekwei piap-araw, hrom lokrue e ma mon sohokwe, hiykwe hreme po hiy-mon prosue preisia ha, seyr hiykwe hreme ya hiy-mon prosue preisia ha a. Seyr hromkwe hye uron hyohyo sehe lon, low hromo owh mon ma-lousne ankin, hiykwe hreme liy-liy-aw ya ma-hiy-mon prosue a, *2 Ti 4:18 11 hom God se hreme ma hiy-mesopok so kueir nonaw hokwe. Sa God hiy hreme hiy-mon ihey ankin, uwrsa kraiar homkwe hye ya nak-me-ihey a.
Pol so uron ma ma-nan sakei hiy non
12 Hromo me-heyr-ok kamon kokwe senkin: hromo nanpanan yor uron ko kokwe senkin nonkway, hromo lanio yor, kipay serey serey ma mesair kow, seyr hme nian ma mesair kow mokwe, yaprue-ar. Hrom hme nion ma non-wak hokwe, hromkwe yor mnow-mnow-aw, seyr yor luw-luw-aw, God so mon ma le sohom nonaw meio. Hromkwe uwrsa ki ko mo nonkway non nak-meio pa, sawk God so maym kow yor nonaw meio. 13-14 Hromo mamey, hme ma mey kow-ha somokwe, meyk kreys non lopa, sawk ok sohom mo meyk-ar mokwe mo hom ma lira mesor nonkway sohomkwaw. Mo enekwei enkin hom hromo ok har me lawk-lawk hi, hakwe senkin nan, homkwe omok kokwe mey, hrom ma meio me nuw-nonkway popriy ey. Senkin lwak ankin, homkwe Hakamay Jisas so enekwei hokwe hreme liy nak-me-heyr, hrom hme ma nak-me-heyr senkin. *2 Ko 5:12; Fl 2:16
15 Hakwe hom hreme ma nak-me-heyr somokwe, uron kreys non lwak pey. Sohiy so hokuaw kokwe hakwe enekwei kreys non hme nion seme non-wak e mon liok, hme hiy-mon e. 16 Payhokuaw, hakwe senkin nanpanan liok, ha Masedonia mon ley ankin, hakwe hme ka-ira ney ey. Seyr Masedonia ko hokwe hme maka-ira non-ohruw-a ne ey. Hakwe senkin sehe nanpanan koruay liok, hom hano yerki se hiymon popriy ha e, ha kipay Judia mon ma ma-ley sehe. *1 Ko 16:5-6 17 Hmey, ha le pa ma lwak hokwe, hme kokwe senkin mesair kow mo, hakwe uron hu-non hu-non-aw saw-me uwr? Hmey, homkwe hane senkin lira pak, hakwe uwrsa ki erey suko me hieyn, enekwei kamon-awaw saw-onuayk me ok, masaw-me-puar ok?
18 God hiykwe hiy-mon kraiay wayr uwr, seyr ok-ar me-aw lohruw-a uwr. Seyr ha hme le ira e ma me-loray hokwe liyliy-aw lwak, hakwe uron kreys non me-loray pa. 19 Payhokuaw, God so Ney Jisas Krais se Sailas o, Timoti o, seyr hakiaw o, hme ma mesor kow hokwe, hromkwe imnok amnok senkin mesor pa, “mo sehe”, sei, “sohiy korey”. Sawk Jisas Krais so mon kokwe, ok, “mo sehe” hiykwaw lwak wayr-wayr. *Ap 18:5 20 Payhokuaw, mo God hiy me-loray ok kraiar meio hi, Krais so mon kokwe ok lowpwarowp somokwe “mo sehe” homkwaw. Sa hrom “Amen-ok” Jisas Krais so kueir ma me hokwe, hromkwe God se panpaniowni kow. *MHO 3:14 21 Sawk Krais so mon kokwe hrom o, hom o, God hiykiaw mon orok kraipakrai. God hiykwe seyr hreme po neyr iaup. 22 Hiykwe hreme po liaup nak-knuey sous, seyr hiykwe hyo Niohney Pekney-weys se hromo uron mon po kawk kreik kow. Hyo niohney se hreme ma kow hokwe, hreme senkin mesair kow, God hiykwe hyo weynpaweyn yaprue mokwe hreme ya kow a. *Ef 1:13-14; 2 Ko 5:5
23 God hiy nonkway, hakwe okrei me pey. Hakwe Korin mon kokwe le pa sehe lwak, hme eheyr mon yuk ame. 24 Hromkwe hmo yor, Hakamay se ma nanpanan kiykiy-ay sohok ko makwey-uwr liy lwak ley. Hromkwe nonkway, hmo nanpanan kiykiy-ay yor mokwe krai po nuw-wak. Sawk hromkwe hme nion seme non-meio wayh-wayh, hom kar ley e. *1 Pi 5:3