2 TESALONAIKA
Pol so mamey meyki ma mey hok non, kristen Tesalonaika ko me
Meyamey uwr hokwe: Aposel Pol.
Yier hiy ma lwayr meyamey hokwe: Hiykwe yier Korin mon lwak non meyamey.
Enekwei hiy ma meyamey hokwe: Hiykwe enekwei Yia 51 sok meyamey kok, Jisas hiy ma lokrue so meyki.
Ok mamey mon ma lwak mokwe senkin: Uwrsa Tesalonaika ko homkwe Jisas so ma-le enekwei hiy yerki penkin non lousne e, seme lowk la-pa-la. Payhokuaw, uwr har homkwe hmekwe okrei-ok po mesor kow, Jisas so ma-le enekwei hokwe. Pol hiykwe sehe meyamey kow, nan kiykiy-ay uwrsa me senkin me-kumay kow e, “Okar-ar, Krais hiykwe mo ya ma-le a, uwrsa ma nan kiykiy-ay me hiymon woro-woro ey hokwe, seyr, unsaney hme ma mon piapay me ma-sahre mon piapay ey hokwe.” Hiykwe seyr hmekwe senkin nak-mekow, mesor anon anon enekwei aiopey hay sohokwe hmo owh mon kokwe liy lousne preiryay ley. Payhokuaw, peyr okrei-krais hiy lousne pie ey.
Mamey ko meyk-ar kokwe senkin: Mamey haraw-ney okukwe, God so me-loray-ok hok poup se ma lono akre-akre ha se lohruw-a. Nan kiykiy-ay uwrsa homkwe, low non kwa lwak hi, sawk God hiykwe papo me koruay, hme hiymon woro-woro ey hokwe, seyr hme pie kow ey hokwe. Pol hiykwe Tesalonaika-uwrsa har hom hmo mey me ma meio kane nakrok seme senkin mekow, “Homkwe mey lopa peie lwak o, homkwe hmo mey me kwa meio, payhokuaw, yerki sohiy nonaw kokwe, homkwe God se liy mon ihey.”
1
Pol so peyrmawk-ok
1 Mamey okukwe ha Pol, Sailas, Timoti hrom mey kow, uwrsa, Tesalonaika ko sios mon ma lwak me. Uwrsa somokwe Aio God o, Hakamay Jisas Krais o, hme nion ma non-wak okin nasay hom non.
2 Hromo Aio God o, hromo Hakamay Jisas Krais o, hmekwe, maym-kow-yor o, liwak-marowhway-yor o, seme ka kow. * Ro 1:7
Tesalonaika mo nan kiykiy-ay yor ke nak-me-ihey
3 Hromo wayh-om, hromkwe hme hokuaw kokwe, God se enekwei enekwei hiy-me-ihey nonaw lwak e. Weyn sokukwe yaprue-ar, payhokuaw, hmo nan kiykiy-ay yor mokwe owh po leyr, seyr hmo yor hmo wayh-wayh me uron-pi ko-ar ma lwak mokwe pa ayaw mon lie. 4 Sa hromkwe hmo lorok kraiay wayr yor o, hmo nanpanan kiykiy-ay o, God so sios lowpwarowp mon po nak-me-heyr. Mo low o, leykawn o, hmo owh mon lousne hi, homkwe yaprue lorok kraipakrai. * 2 Ko 7:4; 1 Te 2:19
5 Weynpaweyn senkin somokwe hreme senkin mesair kow ha, God so lira mesor anon yor kokwe, luw-luw-aw ihey. Hom senkin ma lorok kraipakrai somokwe, God hiykwe hme yaprue lira, hyo Wayr-hre-yier mon lyawriy ey hokwe. Payhokuaw, homkwe hyo Wayr-hre-yier se hokuaw kokwe aw po nak-ok. 6 God hiykwe luw-luw-aw. Hiykwe uwrsa, hme low ma kow seme kokwe, low aiopey hay-ar ma-sahre kow. * Ro 12:19 7 Sa hiykwe hom, aw ma nak-ok o, hromo low o, seme mon kueyn-yay kow ey. Hyo hiy-mon yor senkin sokukwe, enekwei Hakamay Jisas hiy nonkumey ko se hyo ensel seirpey-ar me nion ya-pi aiopey hay non nak-aye non meio ey. * 1 Te 3:13 8 Sa hiykwe uwrsa, God se ma nonkway lopa, seyr uwrsa, God so ok-ihey, Hakamay Jisas se ma mesor ke hyaw ma lwak me low piap-araw non ma-sahre mon sese-yay ey. * Ais 66:15 9 Uwr senkin somokwe liwak piap-araw nak-wayr peyow peyow ey ke lonok ey. Seyr uwrsa somokwe Hakamay so inour mon o, hyo krai panpaniowni non o, sohom mo meiaw-ar lwak ey, * Ais 2:10 10 enekwei Hakamay hiy ma-le non. Hiykwe sehe le, hyo kristen-uwrsa arian hom hye panpaniowni kow e, seyr uwrsa hye ma nan kiykiy-ay hom hye lira preiryay nan ihey e. Enekwei sohokwe hom seyn, uwrsa seme nion lwak ey, payhokuaw, homkwe Hakamay so ok, hrom hme ma mesor kow mokwe, po nan kiykiy-ay. * Kol 3:4
Pol hiykwe God se mesopok, Tesalonaika me hiy-mon kraipakrai e
11 Sohiy so hokuaw, hromkwe God se seme hiy-mesopok wayr-wayr, hiy hyo mey, hme ma me-huonokyaw ke yaprue ka nanpanan ihey e hokuaw. Sa hmo uron, mey yaprue meio e ma nan o, seyr hmo nan kiykiy-ay yor hok hme mey yaprue ma mon siansasian meio o, somokwe God hiykwe hyo krai so kueir non-aw ayay ka nuw-mon eip. * Kol 1:9; 1 Te 1:2-3 12 Hromkwe God se senkin seme hiy-mesopok, hromo Hakamay Jisas so uru hokwe panpaniowni hmo mon ka lonok e hokuaw. Seyr hmo uru mokwe Hakamay so kueir nonaw panpaniowni hyo mon ka ma-sahre onok, hromo God, seyr Hakamay Jisas Krais so maym-kow-yor ko kueir nonaw.