GALESIA
Pol so mamey, sios Galesia mon ma lwak se ma mey kow ha hok non
Meyamey uwr hokwe: Aposel Pol.
Yier hiy ma lwayr meyamey hokwe: Hiykwe yier perey lwak se po meyamey pak e, nonkway lopa.
Enekwei hiy ma meyamey hokwe: Hiykwe enekwei Yia 48 sok po meyamey kow pak, Yia 49 sok po meyamey kok pak, Jisas hiy ma lokrue so meyki.
Ok mamey mon ma lwak mokwe senkin: Enekwei Pol hiy hyo lanio mesor nok mey kreys-kamon mo peyr-ar ko ke ma meio pie hokwe, hiykwe God so ok-ihey kokwe uwrsa Galesia mon ma lwayr me mesor kow. Enekwei haraw-aw hiy ma kiy-okriy hain so meyki hokwe sawk, nan kiykiy-ay uwr orhey non Juda ko hom le-nene nok, senkin me, “Kristen uwrkayn irweyk homkwe Moses so sow-mawk mo ouon mon lwak e.” Aposel Pol hiykwe Juda uwr hom ok senkin sokwe ma hiy-mesor sokwe kar ley pa. Sa hiykwe senkin sehe meyamey. Enekwei Abraham hiy ma lwak hokwe, hiykwe sow lopa lwak, payhokuaw, God hiykwe sow-mawk mokwe peyr Moses se kokwe kow pa. Mo Abraham hiy sow lopa lwak liok, hiykwe God so ok-ihey ke nan kiykiy-ay, sa God hiykwe hye sehe me-huonok prosue. Uwrkayn irweyk hom seyn, homkwe God so ok-ihey ke-aw liy nan kiykiy-ay. Seyr hme kokwe Juda mo sow ouon mon lwak e liy me-sasay ley.
Pol so uron ko hokwe senkin: Pol hiykwe God so okar-ok ke hiy-ono sous-a-sous kraiay, senkin: uwr hokwe hiy Krais se ma nan kiykiy-ay se hokuaw kokwe, God so maym hokwe hye liy huonok prosue. Hiymon sorasor irweyk irweyk hrom Juda mo sow mo ouon mon lwak e ma me mokwe, God so ok ko meykyay mon ley-ney-ney. Hreme luw-luw-aw God so nene mon ma mon wak hokwe, mo Hakamay se ma nan kiykiy-ay hiykwaw-aw, yerki har lopa.
1
Pol so peyrmawk-ok
Mamey okukwe ha Pol hiy mey. Hakwe aposel, hane kokwe uwr prueyn hiy me-ha pa, seyr hano mey kokwe uwr prueyn ki ko hiy me-iaup pa. Sawk ha aposel-mey ma meio ohokwe, hane kokwe Hakamay Jisas Krais o, Aio God, Jisas se lokrue ko se ma me-sian o, hohkiaw kow. Seyr ha o, hano kristen-wayh, hane nion ma non-wak o, hromkwe mamey okukwe sios lowpwarowp kipay Galesia mon ma lwak me mey kow.
Hromo Aio God o, hromo Hakamay Jisas Krais o, hmekwe maym-kow-yor o, liwak marowhway yor o, seme ka kow.
Hreme ki ohiy so enekwei piap-araw so iha ko se ma kahya huonok prosue ey hokwe, Krais hiykwe hiykiaw-ayay po kow okrue, hromo yor piap-araw me hokuaw kokwe. Hiykwe senkin sehe mon, hiykwe Aio God so uron arian so meyki pyay. * Ga 2:20 Panpaniowni hokwe God so mon senkinaw ka nuw-wak peyow peyow. Okar.
God so ok-ihey kokwe irweyk eyn peie kankoum sor o
Hano uron hokwe yor, hom ma mon seme kiynuw-preiryay. Payhokuaw, hmo nan kiykiy-ay yor kokwe enekwei meipey lwak pa, sawk homkwe God, hme Krais so maym kow yor non ma me-huonok prosue se po saw-okriy hain. Sawk homkwe ok irweyk, hom ok-ihey-ok ma me ke lonuayk nakruok. Sawk okar kokwe senkin, ok kamon, ok-ihey ke hieyn ma lwak kokwe korey lwak pey. Hakwe senkin sehe me, payhokuaw, uwr har homkwe hme ok kamon, God so ok-ihey ke hieyn non po mon way-sowp-a-sowp, seyr ok-ihey Krais se ma mesor ke okrei-ok ke hieyn, irweyk eyn po ma-kanhre mesor. * Ap 15:1,24 Sawk yor, ok-ihey irweyk eyn ke ma mesor, ok-ihey hrom ma mesor ko liy-liy-aw ma lwak lopa ke, mo hakiaw mesor hi, mo ensel nonkumey ko hiy mesor hi, uwr senkin sohokwe ka hruo yay kow. * 1 Ko 16:22 Ama, ok somokwe hromkwe mo papo me, sawk pokon kokwe hakwe liy-liy-aw makiy-me ey: Sawk uwr prueyn hme ok-ihey irweyk eyn ke posokwaw mesor kow e, ok-ihey hom peyr-mon ma lonuayk pie ko liy-liy-aw-ar ma lwak lopa ke, uwr senkin sohokwe ka hruo yay kow.
10 Hmey, ok ha ma kiy-me sokukwe, hakwe uwrsa, hom hane uron yaprue nan e me pak? Korey law-ar. Hano uron ipey-ar hokwe, God hiy hane uron yaprue lira nan e! Hano uron, uwrsa me kar mon ey e nan hokwe, hakwe Krais so mey-uwr liy lwak ley. * 1 Te 2:4
Pol hiy aposel-mey ma meio hokwe, God hiykiaw me-iaup
11 Hano wayh-om, hakwe hom senkin nonkway e mon, God so ok-ihey, ha hme ma mesor kow okukwe, iwar hom mon ousne pa. * Mat 16:17 12 Ok-ihey sokukwe hane kokwe iwar prueyn hiy mesor kow pa, seyr tisa prueyn hiy hiymon sorasor pa. Sawk ok sokukwe hane kokwe Jisas Krais hiykiaw nuw-ousne hrahra ha mesor kow.
13 Homkwe hano yor paraw-uh mokwe po lonuayk, ha Juda mo sow senkin senkin mo meyki ma pyay hokwe. Seyr homkwe po nonkway, ha God so sios me yor piap-araw non ma mon yorpayor piapay mon okrue liok mokwe. * Ap 8:3 14 Hakwe Juda mo sow nopre nopre me nonkway popriy e po mon-sorasor. Seyr hano nonkway mokwe Juda hane nion liy-liy-aw ma non-ariy sian mo eir mon lwak. Hakwe hromo nopwey-om mo yor ney-sawk ney-sawk ma hiymon sorasor mokwe, uron lowpwarowp non nuw-meio wayr kraiay. * Ap 22:3 15 Sawk God hiykwe hane kokwe ipey hok hane liwak lopa non, hyo maym kow yor ko kueir nonaw me-iaup. * Ais 49:1 16 Sa God hiykwe hyo uron arian non, ha hyo ok-ihey ke uwrkayn irweyk me mesor kow e hyo ney se hane ma mesair kow hrahra ha hokwe, hakwe iwar prueyn ki erey suko se mesopok pa, hane hiy-anok anok e. * Ga 2:7 17 Seyr hakwe Jerusalem mon ma-ley pa, aposel hano peyr-mawk ma meio nok me lira e. Korey law. Sawk kipay Arebia mon saw-ey. Seyr sohiy so meyki hokwe hakwe Damaskus mon ma-ley.
18 Yia krompri so meyki hokwe, hakwe Jerusalem mon ley, Pita se nion non-ohruw-a e. Hakwe hye nion kokwe eypok mokwe iha seys iha sirom sankaw non-wak. * Ap 9:26 19 Ha serey ma lwak hokwe, hakwe aposel har me lira pa. Sawk Jems, Hakamay so nay-ih se-aw lira.
20 Ok, ha hme ma mey kow omokwe, ok-arar. God hiykwe senkin nonkway, hakwe hme me-warei-arei kow pey.
21 Sehiy so meyki hokwe, hakwe kipay Siria o, kipay Silisia o, serey ley. * Ap 9:30 22 Sawk enekwei sohiy non kokwe kristen-wayh, Judia mo sios lowpwarowp mon ma lwak me kokwe, hakwe uwr suwon-araw. 23 Sios somokwe ok senkin ke-aw lonuayk nonaw lwak: Uwr, paraw hreme ma mon yorpayor piapay hiykwe pau, Jisas se nan kiykiy-ay yor, hiy paraw ma mon piapay liok ke lanio mesor kow. 24 Sawk sios somokwe God so uru se me-ihey, mey, hiy hano mon ma meio se hokuaw.

*1:4: Ga 2:20

*1:7: Ap 15:1,24

*1:8: 1 Ko 16:22

*1:10: 1 Te 2:4

*1:11: Mat 16:17

*1:13: Ap 8:3

*1:14: Ap 22:3

*1:15: Ais 49:1

*1:16: Ga 2:7

*1:18: Ap 9:26

*1:21: Ap 9:30