7
Israel uwrsa 144,000 hom God so meir se ma lonok hom non
Ha owhnan seme kiy-ira ha lowpway menkin, hakwe sawk ensel iha-iha-aw ki ohiy so por iha-iha-aw mon nakrok-kay me lira. Homkwe howniy iha-iha-aw me nekie sous huon, ki o, sour-yawp-ar o, now o, hme lway huwhuw ame. * Jer 49:36; Dan 7:2 Ha sehe kiy-ira ha lowpway menkin, sawk ensel prueyn, ey kaie ko se le se makiy-ira huon. Hiykwe lwayr peyow peyow God so kendol-lor non. Hiykwe sawk ensel iha-iha-aw, krai, ki o, sour-yawp-ar o, seme mon piapay e ma kow me wouk-ok aiopey hay non senkin me, “Homkwe ki o, sour-yawp-ar o, now lowpwarowp o, peyr peie saw-mon piapay o. Peyr hromkwe God so mey-uwr lowpwarowp mo ine-maku mokwe kendol-lor non lokiamaun kreik kow ha pa.” * Ese 9:4; MHO 9:4 Hanekwe sawk senkin mekow, uwrsa mo meir kendol-lor non ma lokiamaun kreik mokwe sankaw, 144,000. Somokwe Israel mo uwrsa uwrku iha seys mu nareysyar non hom ma kekie nona nona ne hom non. * MHO 14:1,3
Uwrku kamon kamon-aw mo meir mokwe sankaw, Juda so uwr-ku ko mokwe, 12,000. Ruben so uwr-ku ko mokwe 12,000. Gat so uwr-ku ko mokwe 12,000.
Aser so uwr-ku ko mokwe, 12,000. Naptali so uwr-ku ko mokwe 12,000. Manase so uwr-ku mokwe 12,000.
Simeon so uwr-ku ko mokwe 12,000. Livai so uwr-ku ko mokwe 12,000. Isakar so uwr-ku ko mokwe 12,000.
Sebulun so uwr-ku ko mokwe 12,000. Josep so uwr-ku ko mokwe 12,000. Benjamin so uwr-ku ko mokwe 12,000.
Uwrsa popua hay hom God se ma swa-hokruw me-ihey hom non
Sohiy so meyki hokwe, ha sa uwrsa popua hay hok nuw-hokruw konpakon kawk ke lira. Hmo meir mokwe uwr posokwaw sor meir-yay ley. Uwrsa somokwe owh-ohi senkin senkin, uwr-kayn senkin senkin, kipay senkin senkin, wouk-ok senkin senkin non ko me le-nene. Homkwe sia-king o, sipsip-ney o, hoho inour mon nakrok-kay, seyr klos weyspey me-aw nak-ie liyay, seyr pokriy-ma me nak-nakruok, hmo iha mon kokwe. 10 Homkwe wouk-ok aiopey hay non senkin nuw-me,
“Huonok-prosue-yor kokwe hromo God, sia-king mon ma liwak o, seyr Sipsip-ney o, hoho mon le.” * MHO 4:10
11 Ensel lowpwarowp homkwe sia-king o, sios makwey-uwr o, ay ihaiha-aw su ma lwayr sohom o, hme nakrok awndiy kawk nok, ine ki mon sia-king ko inour mon kuayk won sowkway me-ihey, God se. 12 Hom me,
“Ok-ar! Me-ihey-ok o, panpaniowni o, mawkhow ihey-ar o, kar me ey ok o, uru ayaw-ar o, krai o, seyr hay ipey-ar o, God hiykwaw ka nak-wayr peyow peyow. Ok-ar!” * MHO 5:12
13 Sios mo makwey-uwr prueyn hiykwe sawk hane senkin mesopok, “Uwrsa klos weyspey meiamei me ma lie omokwe posokwaw mo, seyr perey suko me le mo?”
14 Ha kiy-onuayk me, “Ara, hakwe nonkway korey, hunkwe nonkway.”
Hiy sa hane senkin me, “Uwrsa somokwe low piap-araw aiopey hay ko ouon ko me ma lousne-sa-ousne ha hom non. Homkwe hmo klos meipey mokwe Sipsip-ney so nioh non po peyryapeyr weyspey. * Dan 12:1; Mat 24:21 15 Homkwe God so sia-king ko inour mon seme nakrok-kay, seyr hye me-ihey mey me-aw meio kow, eypok arawh, eypok arawh, hyo a pekney-weys mon. Uwr, sia-king mon ma liwak hiykiaw kokwe ohriar non-wak sous-a-sous ey, hmekwe. 16 Uwrsa somokwe siowp ma-lokrue lopa, seyr hu krah-ma-krah lopa. Seyr ey-li o, ya-li senkin senkin o, hme ma-loum pouk-ma-pouk lopa. * Ais 49:10 17 Payhokuaw, Sipsip-ney, sia-king ompok mon ma lwak hiykwe hmo naykih-ar lwak ey. Hiykwe hmekwe ki-saw-hu, su ma lwayr peyow peyow ey mon hiy-anok anok nok ey. Seyr God hiykwe hmo eheyr-hu lowpwarowp nene ko me noh ahahay kow ey.” * Sng 23:2; Ais 25:8; MHO 21:4

*7:1: Jer 49:36; Dan 7:2

*7:3: Ese 9:4; MHO 9:4

*7:4: MHO 14:1,3

*7:10: MHO 4:10

*7:12: MHO 5:12

*7:14: Dan 12:1; Mat 24:21

*7:16: Ais 49:10

*7:17: Sng 23:2; Ais 25:8; MHO 21:4