9
God hiy Israel me ma me-iaup hiy non
1 Ok, ha ma kiy-me omokwe, Krais so inour mon kokwe ok-ar me. Hano nanpanan yor uron ko, Niohney Pekney-weys hiy ma hiy-wayr ohokwe, hane senkin me-kow, hakwe okar. 2-3 Hano uron hokwe ipey-ar lowk kworpakwor, seyr enekwei enekwei, lon-kane sow eyn sehe lwak wayr-wayr, ha hano uwrku arian, hano nioh siraw-aw Israel me nan ankin. Payhokuaw, hano uron hokwe senkin nan, hme me-huonokyaw prosue ey me hokuaw kokwe, God hiy hane hruo-yay kow hokwe, seyr hane Krais so meiaw mon ka-osi ha hokwe, yaprue. *Kis 32:32 4 Payhokuaw, homkwe God so uwrsa, hiykwe hme kokwe hyo ney arian me hieyn po way mno, seyr hyo panpaniowni hokwe hme po mesair kow hrahra ha. Seyr sokior-ok hiy ma me-sakon kawk o, Sow o, somokwe hmo iha mon po kow. Homkwe kampueys me-ihey yor okar-ar non, seyr homkwe God so me-loray-ok mokwe papo lonok. *Kis 9:4 5 Homkwe Hibru mo iwey-om, uru ipey-ar non mo ney-nona, sa Krais, hiykwe hmo uwrku mon lousne. Hiykwe lowpwarowp mo God, hye kokwe senkin-aw ka lowk nakie wayr-wayr. Okar.
6 Hakwe senkin me pey, God so ok-loray Israel me ma kow kokwe puraw kow, ayay leip pa. Payhokuaw, Israel mo ney-nona lowpwarowp mokwe Israel-ar korey. 7 Seyr Abraham so ney-nona seyn, hmo lowpwarowp me kokwe Israel-ok liy me ley. Payhokuaw, God so ok mamey porih ko kokwe Abraham se senkin mekow, “Hno ney-nona-ar mokwe, Aisak so nioh non-aw ma lousne sohomkwaw.” Stt 21:12
8 Ok sohok ko meyk-ar kokwe senkin, God so ney-nona mokwe, uwrsa, hromo yor arian non ma kekie nona korey. Sawk God so ney-nona mokwe, uwrsa, God so ok-loray arian non ma lousne sohomkwaw. Uwrsa senkin somokwe Abraham so ney-nona-ar liy me. *Ga 4:23 9 Payhokuaw, Abraham se kokwe senkin me-loray, “Hakwe, enekwei ha ma liaup sohiy non ma-le ankin, Sara hokwe ney norwayo non lwak ey.” Stt 18:14
10 Sawk hakwe senkin makiynak-me saronay. Rebeka ko ney prueysyar hohkwe aio kamon-aw. Hiykwe hromo iwey Aisak. 11-12 Sawk Rebeka hok ney liwak lopa non hokwe, seyr komkiow-ney hom peyr, yor yaprue o, yor piap o, seme ma mon lopa hokwe, God hiykwe Rebeka ke senkin me-kow, “Ney hakamay hiykwe ney noprawey so ouon mon lwak ey.” Suw senkin mesair kow, God hiykwe uwrsa hiy ma liaup mokwe, hyo uron arian nonaw lahan iaup. Hiykwe mey yaprue hrom ma meio me lahan iaup pey. *Stt 25:23 13 God so mamey porih hokwe mo senkin me, “Hakwe Jekop se kokwe uron-pi ko-ar po nuw-wak, sawk Iso se kokwe awnie awnie-aw po lira.” *Mal 1:2-3
14 Hai, hromkwe penkin ma-sahre me ey mo? Hmey, God hiy senkin ma lon hokwe, luw-luw-aw korey ko? Korey law-ar. 15 Suw senkin, God hiykwe Moses se senkin po me-kow,
“Hano uron hokwe uwr pohe lowk e, hakwe liy lowk. Seyr hano uron hokwe uwr pohe hiy-mon woro-woro e nan e, hakwe liy hiy-mon woro-woro.” Kis 33:19
16 God hiy hreme ma lahan iaup hokwe, hromo uron pay me nan e, seyr hrom pay mey me meio e, seme lahan iaup pey. Sawk hreme kokwe, hiykwe hyo uron lowk yor arian nonaw lahan iaup. *Ef 2:8 17 Payhokuaw, God so mamey porih hokwe Isip mo king se senkin me, “Ha hne king ma mon wak so meyk-ar hokwe senkin, hakwe hno owh mon meio e mon, hano krai seirpey-ar se meio mesair kow hrahra e. Seyr hano uru hokwe uwrsa kipay serey serey suko hom ka mesor nakian nakian e.” *Kis 9:16 18 Hromkwe sa senkin seme nonkway, God hiykwe uron uwr pohe lowk e, hiykwe uron liy lowk, sawk hiykwe poso uwr so uron se mon mein-mein yay e mon e, hiykwe liy mon mein-mein yay.
19 Sawk hmo prueyn hiy hane senkin kiy-me lak, “Senkin lwak ankin, hai, God hiykwe uwrsa me kokwe heyn-non-ok panoke me o? Hai, God so uron ko mokwe uwrsa posokwaw me-sous ey mo?” 20 Hano wayh ara, hunkwe penkin uwr so, hwon God se senkin ma ma-sahre me sohokwe? Yiawk, ki non ma nekie hor hiykwe, hye nekie-hor-uwr se senkin liy ma-sahre me ley: Ha enkin ma lwak ohokwe, hunkwe hane senkin panoke nekie hor so? *Ais 29:16; 45:9 21 Yiawk se nekie-hor-uwr hiykwe, ki-kosi so eir mon lwak, seyr hiy pay se nekie hor e nan e, liy nekie hor. Sa kosi-hou kamon-aw hokwe hiykwe, yiawk kreys non liy nekie hor. Kamon hokwe mey aiopey hay mo, kamon hokwe mey nopre nopre har me nak-meio ey. *Jer 18:6
22 God hiykwe yiawk nekie-hor-uwr se hieyn liyliy-aw po meio. Hiykwe hyo aw-mar o, krai o, seme mesair kow e mon. Sa hiykwe, uwrsa hyo aw-mar ouon mon ma lwak, seyr mon piapay e ma iaup mokwe, meinkiowp-yor nonaw lwayr ira. 23 Hiykwe senkin sehe lon, hyo yor ihey-ar panpaniowni non me mesair kow nonkway e, uwrsa hyo uron lowk yor ouon mon ma lwak seme. Uwrsa somokwe God hiykiaw ma me-iaup koruay hom non, hyo panpaniowni se lonok e. 24 Mo hrom seyn, hiykwe hreme po nak-me-huonok. Juda me-aw me-huonok pa, sawk uwrkayn irweyk me seyn, po nak-me-huonok. 25 God hiykwe profet Hosea so mamey porih mon kokwe senkin me,
“Uwrsa paraw hano uwrsa ma lwak lopa mokwe, hakwe hme senkin ya me a: Homkwe hano uwrsa arian. Seyr uwrku, ha uron-pi ko-ar ma lwak lopa mokwe, hakwe hme kokwe, senkin ya me a: Homkwe hano uron-pi ko-ar.” Hos 2:23
26 Seyr,
“Yier kamon so uwrsa God hiy senkin ma me, ‘Homkwe hano uwrsa korey,’ yier sohiy so uwrsa mokwe God hiykwe senkin me ey, ‘Homkwe God wayr peyow ey so ney-ar.’ ” Hos 1:10
27 Profet Aisaia hiy Israel-uwrsa me ma me hokwe, hiykwe senkin lokre me,
“Mo Israel mo uwrsa hom wosion sour-yawp-ar ko me hieyn kraiar lwak hi, Hakamay hiykwe har-har-aw huonokyaw prosue ey.
28 Payhokuaw, God hiykwe uwrsa ki mon ma lwak mokwe, aheyr aheyr nonaw lira mesor anon anon pariawey ey.” Ais 10:22-23
29 God so mamey, Aisaia hiy ma mey kokwe mo senkin ma-nak-me,
“Sawk Hakamay Seirpey-ar hiykwe Juda mo uwrsa har-har-aw me su isay lwayr lopa hokwe, hromkwe uwrsa lopa po lwak, yier Sodom, Gomora leys se hieyn po mon piapay pror kawk lowpway.” Ais 1:9
Israel homkwe Krais se nan kiykiy-ay pa
30 Hai, hromkwe sawk penkin me ey mo? Hromo ok mokwe senkin, mo uwrkayn irweyk, mey God so nene mon luw-luw-aw lwak ey me meio wayr pa lwak hi, hme kokwe luw-luw-aw ok po me, Hakamay se ma nan kiykiy-ay yerki so kueir nonaw. 31 Sawk Israel hom luw-luw-aw lwak e ma mon mokwe, homkwe Moses so sow me pyay meio wayr. Sawk homkwe yerki sohiy non kokwe, God so nene mon luw-luw-aw pase lwak e. 32 Hai, homkwe luw-luw-aw lousne pa, payhokuaw lwak mo? Suw senkin, homkwe Hakamay se ma nan kiykiy-ay yerki so meyki ley pa. Sawk homkwe Moses so sow me pyay meio yerki nonaw luw-luw-aw lwak e mon lokruok. Hom senkin ma pyay mokwe, homkwe sawk leykawn mein kamon mon omor-sway sayah-ayah makuayk. *Ais 8:14 33 God so mamey porih hokwe mo senkin mey,
“Mnuw Saion mon kokwe, hakwe mein kamon, uwrsa hom serey sway sayah-ayah makuayk ey hokwe, po lyay. Mein sohokwe uwrsa me mon makuayk ey. Sawk uwr mein sehe posokwaw nan kiykiy-ay e, hiykwe owh-mar liy lon ley.” Ais 28:16