18
Babaronia goi merama sini wake
1 Nama nono erebaie moi aneru ureroma isare aareibiro ere. Godima dawabairo buna daiwere mairo danu edoroma yewa doo yaisina edoro ui. 2 Dawama daiwere eno wei, i dai goi dawae isaria wei. I dai Babaronia goiye doroo yaria wei. Eno uiro seidaninu merama imumu keuwereini i inowere imumuini emuama awoenae i doroo yari goiro ibinisaro nono i meramawere ino gasira yaisina iro ibinisa. 3 Enoba i Babaronia goi dawae i awekabonu emeakabake ukeibi ibaie ara waini adua ari emebairo mariero isa. Enoba i orofa akaka yawokeibisa dai orouma i aweka enare odeibisabai i ari eno dawabairo fare dodoo ukeibisa. I oi waiya ukeibisa orouma i awekanu eraerabusa keuwerema emuae eraerabusa keuwere orou sineibisaya eno weiro naue.
4 Nama nono nauebaie moi wake ureroma isare aarike eno wei,
Nanu orou i goiroma mediaweke aweawero aniaweke danu meramawere ukeibaku i ari eno da uawe wei. Dawaini yaini kodo unao ufiakaisake danu meramawere ukeka moko munao ufoisaya dawabairoma imusu aniawe wei. 5-6 Danu ukeka meramama urero amuke ane farinuro Godima i ukeka sineka eraada ibaie irau meya weaku. Dawama yabairo meramawere ukeibia enaenari yama i meramawere moko dawabairo uaweke nono moibai dawabairo duboro uawe eno wei. Dawama okoanaku makeibiriero iseibisa enaenari yama faniginiro arawere adua ma demuiro uaweke maewero ifi wei. 7 Dawae eraerabusa keuwere bobo ibake irauaiai ibeibiba awoenae yama i ukeibi moko dawa fanisi maewe. Dawama eno weaku, nae dai yawokeka aweka enoba nanu yaure ibaada eme yawokakunia orofaro yaure ibine. Nae ii weibeka ena wabu aweka mero dawae i sorara ukekabake nabairo da fafekua eno weaku. 8 Dawae eno weakuba ibake odo demuiro i inimuwere ukeka dawabairo fafeisa. I inimuwere ukekae i ari eno, oferi imusu imusu waurekaini sorara ukekaini desini urekaini i yaisina dawabairo fafeisaro nono Godima dawa kodo ureifeku. Enoba Godi Dawae bunawereba i yaisina ma berekeibaku ibake i ukeka sineka yaisina fafekuro inaama i Babaronia goi yare me sifekua,
eno weiro naue.
9 I orofa akaka yawokeibisa dai Kini orouini i awekaini dodoo ukeibisake meramawere ukeibisaba ibai i orouma efeisaie inaama dawa yareifekuro iro amukeifekuro eraada ii wefeisa. 10 I yawokeibisa dai Kini orouma i aweka oferi karakada ukeifeku ibai efeisake ia daiwere iyafeisake ekararowere enare ibaada eno wefeisa, ae, ae, ie dai meramawereya! Yeka Babaronia dai goiwere anu meramawere ukeka nono idua abairo sabu farinua eno wefeisaya wei.
11 I orofa akakaro oi waiya ukeibaisa moi orouma i eraerabusa dawabairo oima make da muneifeisa ibake enaenari imuka merama sinaada ii wefeisa. 12-13 Moi mima emenu okoa o dai eraerabusa keuwere oima makeroma mune dafeku. Enoba emenu eraerabusae eno, gorudini siriwaini make muneka daiwere omaini fera weaisa omaini inanakeo rinani weaisa wauini dubawere wauini kokoiwere wauini emenu imusu imusu irauaiai anaini aiwori weaisa i rabuma ubu ukaisa eraerabusaini emenu make munekae daiwere. Enoba ainama i ubu ukeka eraerabusaini burasi weaisa rabuma ubu ukaisa eraerabusaini ayanima ubu ukaisa eraerabusaini munaeini ofereni odaisa urumuwere faudaini mera weaisa urumu irauaiai aduaini furanikisenisa weaisa urumu irauaiai aduaini waini aduaini oeraini farauwaini uidi kaini boromakauini mamoe abuini osini osima ma youraku uwiri bobo seboini me waiya mane ukekaro oi da makeka orou emuaini iini i eraerabusa ari eno oima make mufiakaro emenu waiya ufisane waure fafiakaisaroma nono i eraerabusa yaisina oima make mune dafeisa. 14 I orouma i Babaronia goiro ibaadae oi waiya ukeibisa orouma i goibake eno weisa, anu arara i irauaiai aneme aneme eraerabusa muneibaku i eraerabusa yaisina me ari eno ukinua. Anu oini irauaiai wereeini ibai yaisinae idua me sininuba nono dubuenaro yodia ufakuie da fou ufakua eno weisa. 15-18 I orouma Babaronia goiro oi waiya ukaada eraerabusa keuwere muneibisa, enoba i orouma i goinu inimu daiwere waunao ufeisaba ibake ia iyafeisake ekararowere bi mame ibaada iroma eno wefeisa, ae, ae, ie dai meramawereya eno wefeisa. I Babaronia dai goibake imukari ukaisia. Dawa adinaroe rinani weaisa wauini dubawere wauini kokoiwere wauini baruike gorudini make muneka daiwere omaini fera weaisa omaini i wereeini rooro ukaada uwanibairo nono odo yafawere mero danu eraerabusa yaisina sabu me sininua eno wefeisaya wei.
I boudi yawokeka kafudenini i boudiro aneibisa orouini i boudiro waiya ukeibisa orouini i dawararo ane fare ukaada oi waiya ukeibisa orouini emua yaisina ekara yafawereroma enare ibaada efeisabaie inaama yaraada iro amukeifekuro efeisake emuama eno wefeisa, yeka goiye irauaiairo moi goi goi i ari eno meya wefeisa. 19 Emuae doo bubudo mufeisake emenu iiriro kare fiafeisake eno wefeisa, ae ae, i dai goinu inimue daiwereya eno wefeisa. I dawararo eneiareibisa boudi yaisina iro fare aneibisaro i goiro ibisa orounu eraerabusa keuwere muneibisaya eno wefeisa. Nono odo yafa mero i eraerabusa yaisina sabu me sininua eno wefeisaya wei.
20 I Babaronia goi merama sininuba ya urero ibinisa orouini Godinu orouini afasoro orouini we bou urieka orouini yae rooro uawe wei. Dawama yabairo meramawere uke yareibirieba ibake Godima dawa kodo uraada danu merama ukekanu moko fanisi makinua eno wei.
21-22 Nono moi aneruma uidi kai ure adireka i oma ari dai rabuwere munike ei mamike dawararo sianiro isariro eno wei, i Babaronia dai goi dawae enaenari mufekuke daiwere sianao ufekuro emema i goi nono da efeisa. Enoba i buma ureibaisa orouini gida ureibaisa orouini kawia ureibaisa orouini i wirori ureibaisa orouini emua yaisina i goiro nono i ari eno da ufeisa. I goiro waiya nono da ufeisa. Emenu uidi kaima nono farauwa ubu da ufeisa. 23 I goiro moi ramefa edoro da ufeku. I awekabo emeaka muneka wake weroma enaenari da ufeisa. Anu oi waiya ukeibaisa oroue daiwerero i orofa akakaro oi waiya ukeibaisa orou emuae okoanaku. Enoba ae anu wada barauma i orofa akaka orou yaisina uke irukeibia eno wei.
24 Godinu we bou urie orouini Danu orou emua ureibiriekaro feareibisaro emenu iwa i goiro isareibiba ibake Godima i Babaronia goi fanisi daiwere marie. I dooro feareibisa orou yaisina Godima erieke i Babaronia goi fanisi daiwere mariea wei.