1 Mingꞌa gubuꞌ arigi da king nampang 4, Amrafel mingꞌa Sinar, Ariok mingꞌa Elasar, Kedoraumer mingꞌa Elam, da Tidal mingꞌa Goim, yatangꞌ i ruan 2 da impruꞌ ruan ifan i isa nam mpruꞌan da king gamp isiꞌ isiꞌ 5 bida ani: Bera mingꞌa Sodom, Birsa mingꞌa Gomora, Sinab mingꞌa Adma, Simeber mingꞌa Tseboim, da king mingꞌa gamp Bela (gamp Bela igi binganggan mangan Tsoar). 3-4 I wain ibiani: king gamp isiꞌ isiꞌ 5 igi impa warangꞌ i King Kedoraumer isangꞌ udzuf 12, da bitsintaꞌ bawaꞌa udzuf 13 da intap ruan sinungꞌ arangan da ifa mpruꞌ ruan imingꞌ Bump Sidim (aru uruts Sur mingꞌa gin da aruani).

5 Da waꞌa udzuf 14, King Kedoraumer irut king iruꞌ da bits ugu impruꞌ da gan garaman singaari impruꞌ ruan ifan da yis garam Refa mpada Astirot Karnaim, garam Tsuts mpada Ham da garam Em mpada Bump Kiriataim, 6 da garam Hur mpada mamai Seir, da idaru ribarangan ifan isangꞌ waꞌa El Paran mingꞌa uts da nam dadauntan. 7 King Kedoraumer ruta king fain ugu itip yitam i ruan da ifa gamp En Mispat (nida Kades gin) da yis garam mpada intap Amalek sib impruꞌ da garam Amor mpada Hatsatson Tamar.

8 Mingꞌa gubuꞌ arigi da king mingꞌa gamp 5 ugu, Sodom, Gomora, Adma, Tseboim da Bela iyu garaman singaari santan impruꞌ ruan ifan da irants ruan imunti mungꞌ i isa nam mingꞌa Bump Sidim. 9 Ribarangan irut king nampang 4 ugu, Kedoraumer, Tidal, Amrafel, da Ariok, yis ruan. 10 Da mingꞌa Bump Sidim da ntsuf ampi bingan uda kolta gin imingꞌ gin. Da gubuꞌ ribarangan isa ruan da king Sodom da Gomora irut garaman irunt sinungꞌ nam isan da gan garaman fain iruaꞌ iruꞌ ntsuf da santan irunt sib iyab mamai. 11 Da king 4 igi iyu garam Sodom da Gomora fain impruꞌ da nam bunumpan da nanggan gadan santan da ifan. 12 Da gubuꞌ arigi da Lot impa Sodom da ribarangan iyu arangan impruꞌ da nam bunumpan santan ibinigi.

13 Da Abram impai uts da Mamri gai gan tsiraꞌ tsiraꞌ ugu. Mamri igi garam Amur, Eskol da Anir rainggan. Rib iruꞌ da bits igi yudzu nan mangan impruꞌ da Abram i rima ruan sib. Da garam bits runta sinungꞌ adziang igi ibawaꞌ da Abram, garam Hibru, da ini rutin i king 4 ugu idaru garam Sodom da Gomora rai sib da iyu Lot da ifan. 14 Gubuꞌ Abram uda nan i garam ipiap mpunga Lot da uda fada sib, da inuꞌ gan garaman singaari 318 waꞌa mingꞌa arangan garam guman ruta mpadan ugu impruꞌ. Da imungꞌ i ribarangan ifan da idaru garam ipiap ifan isangꞌ waꞌa gamp Dan. 15 Da idziang arigi, Abram irants gan garaman singaari imunti utup utup da ibrang garam ipiap ruta nam runta fafun da idaru yis ribigi titaꞌ angu ifa isangꞌ waꞌa Hoba, mingꞌa dzraꞌ i gamp Damaskus. 16 Abram itip iyu nam bunump garam ipiap udan ugu impruꞌ da rainggan narunggan Lot da gan nam bunumpan impruꞌ da sagat da garam fain itip iba.

17 Gubuꞌ Abram isa King Kedoraumer da king fain ugu da gan garaman singaari sib da tipa badan, da king Sodom iba i tsanganda arangan mingꞌa Bump Sawe (nida King Intap Bumpan).

18 Mingꞌan nigi Melkisedek, king Salem, iyu bret da wain gurun iba i tsanganda Abram. Arangan isu Anutu Garam Nampang Wain Wagungꞌ garam pumuꞌan gan. 19 Melkisedek ifinti Abram da ini ibiani,

21 Ntsupa sib da king Sodom ini da Abram ibiani, “Nam santan u udan ugu da nasu u gam, da bitsintaꞌ dzi ampanggangꞌ angu da watangin naba da dzi.”

22 Da bitsintaꞌ Abram ini da king Sodom ibiani, “Dzi tsaf ruangꞌ da dzi ni nan nidzun imingꞌ Yawe, Anutu Garam Nampang Wain Wagungꞌ tanginda gunungun da intap maranggan, 23 i dzi wasangꞌ uda u nanggam mangan, bida fufuai udzuda faga gangkang gin ma nam isiꞌ mangan u, imaꞌ. Wain ibiani, u mani u nanga dzi Abram suda garam nam bunump tsiraꞌ i. 24 Dzi wasangꞌ uda nam mangan u, da bitsintaꞌ nam gadan aru dzi garamangꞌ gadan ugu angu, nigi isu dzi gangꞌ. Da wanang da garam rima dzi sib, Anir, Eskol, da Mamri nayu nam bunump igi nasangꞌ ruan.”