16
Hagar Irim Ismail
1-3 Gubuꞌ aru Abram mpada Kanan sangꞌa udzuf 10 sib da arangan fininggan Sarai warim narun mangan u. Ibinigi da Sarai ini da Abram ibiani, “Yawe yudzu dzi wangunggangꞌ sib da dzi warim narungꞌ mangan u. Da dzi rim Hagar, sagat Idzip dzi sagat gumangꞌ ugu, da agu i u ruta gingꞌan. Da bida arangan rima narun rusan da nigi bungꞌ autus i ruan i dzi binganggangꞌ.”
Ibinigi da Abram iringant i fininggan nan gan da iyu Hagar isu i fininggan 4 da irut igingꞌ da arangan iwangun.
Da gubuꞌ Hagar sruꞌagin bida arangan wangundan, da itsarif runggan iyus da sagat gudzunggan Sarai. 5 Da Sarai ini da Abram ibiani, “Barabin waꞌan da dzi isu u asubam. Hai, dzi runggangꞌ irim sagat gumangꞌ igi da agu. Da bitsintaꞌ aruani da arangan isruꞌgin ibi arangan iwangun sib da imus itsarif runggan da dzi. Yawe nararu mangan i asub igi, dzi ma agu.”
6 Da Abram ini, “Ngarubini bingan! Da bitsintaꞌ waringantin, nigi u sagat gumam rururungan da imingꞌ da agu. U su wain gin. Nam u tsanganda bida dauman sangꞌa u maranggam aridan, wanang da arangan.” Ibinigi da Sarai inang Hagar nanggan mpadan imais wasi, da arangan irunt sinungꞌ Sarai.
7 Da Yawe angira gan*Yawe angira gan — Yawe isu angira maran iwaꞌ da Hagar. iwaꞌ da Hagar imingꞌ mpui maran mingꞌa nam manaꞌ dadauntan sanab fada Sur. 8 Da ini, “Hagar, Sarai sagat guman, u mingꞌ anungꞌ iba, da u ni fada bida anungꞌ?”
Da arangan ini angira nan gan mungaꞌ ibiani, “Dzi runt sinungꞌ sagat gudzunggangꞌ Sarai.”
9 Da angira ini, “Watip wafan da rinunggam Sarai da watangꞌ warangꞌ i arangan nan gan santan nidan. 10 Dzi bungꞌ anang u yanginggam nawaꞌ nasisungꞌ nayus da wasangꞌ i farisa sib u.”
11 Da itip ini,
“Waringantin! U wangun sib
da u bungꞌ arim narun marub.
Da wafaringꞌ arangan binganggan Ismail,†Ismail — Bingan Ismail mingꞌa nan Hibru wainggan ibiani, ‘Anutu iringantin’.
i wain ibiani, Yawe iringant i u wangu barabin gam sib.
12 Da u narunggam igi bungꞌ ampa nabi dongki buman mangan,
da wasangꞌ atangꞌa warangꞌ i garam mangan u.
Aranga bungꞌ ais garam santan,
da garam santan bungꞌ ais arangan nabinigi.
Da wasangꞌ i ruta rain rusan mpada bini u.”
13 Hagar ini da runggan, “Ai! Dzi matsanga Anutu Aru Tsanganda Dzi sib ugu da dzi rumpa marataꞌ?” Ibinigi da irim bingan da Yawe aru nida nan da arangan ibiani, “Agu Anutu Aru Tsanganda Dzi.”‡Anutu Aru Tsanganda Dzi — Nan ani mingꞌa nifu nan Hibru da El-Roi. 14 I wain igi da ifaringꞌ mpui maran igi binganggan Bir-Lahai-Roi, wainggan ibiani, ‘Mpui Anutu Marantaꞌan Tsanganda Dzi’. Mpui maran igi rumingꞌ wasaꞌ i gamp Kades da Beret.
15 Impai raiyi da Hagar irim Abram narunggan marub, da Abram ifaringꞌ i binganggan Ismail. 16 Iwaꞌ gubuꞌ aru nigi da Abram udzufan isangꞌ 86.