1 Gubuꞌ Yisu yunga fadan, da itsanga garam bits rinan apingꞌa maragampam angu da imingꞌ ibinigi. 2 Da riban atsungꞌa gin igutin ini binaꞌ, “Rabai,*Rabai — Nan Rabai wainggan ibi Kidungwaga. manga nanggan maisan inang da garam aga rinanggan yapingꞌ arangan ruta maragampam — runggan ma ramanggan da rinanggan?”

3 Yisu ini ribarangan nan gan mungaꞌ ibiani, “Anungꞌ garam igi ma ramanggan da rinanggan nanggan maisan inang arangan maran igampam u. Nam igi iwaꞌ da garam igi i nanga Anutu guman nangan waꞌa dzidziwan yaba gin. 4 Aru gubuꞌ rungꞌ puꞌan da agi nanang Anutu aru tanginda dzi badan ani guman. Nam idziang bungꞌ awaꞌ, da garam mangan wasangꞌ nanga gum mangan u. 5 Gubuꞌ dzi rungꞌ mpada intap ani da dzi isu nam puatsadan i garam intap.”

6 Yisu nida nan igi sib da itupingꞌ nifu gurun iruꞌ intap da imuat da isisa i garam igi maran. 7 Da ini binaꞌ, “Wafan da wadzuꞌ maram mpui fuꞌan Siluam” (wainggan ibi ‘itangin ifan’). Ibinigi da garam maran gampaman arangan ifan da yadzuꞌ maran da maran idaum da irarab nam imingꞌ nigi iba gamp.

8 Gan riban mpruꞌan da rib tsanganda arangan da gubuꞌ musa yaiꞌa ruan ugu igut i ruan ini binaꞌ, “Mani garam aru mpada sanab ringan da yaiꞌa ruan ugu ani?”

9 Da fain ini binaꞌ, “Hai! Garam arangan igi.”

Da fain ini binaꞌ, “Imaꞌ! Garam igi maran isangꞌ ruan.”

Da bitsintaꞌ garam igi runggan ini runggan wasi ini binaꞌ, “Dzi arangan ani.”

10 Rib igi igutin, “Da u maram igi budaum ibi anungꞌ?”

11 Da arangan ini, “Garam rib faringꞌa Yisu gin ugu imuat intap isu tamut da isisa i dzi marangꞌ. Da ini da dzi i dzi fada mpui fuꞌan Siluam da adzuꞌan. Ibinigi da dzi fan da dzi yadzuꞌ marangꞌ da dzi rarab nam.”

12 Da rib igi itip igut i arangan ini binaꞌ, “Da garam arangan anungꞌ?”

Da arangan ini, “Dzi wasruꞌ gin u.”

13 Rib igi iyu garam maran gampaman da dauman ugu ifan da Farisai ruas. 14 Gubuꞌ Yisu muata intap suda tamut da nanga garam maran gampaman maran dauman igi gubuꞌ Sabat. 15 Ibinigi da Farisai ruas igut i arangan i maran ibudaum ibi anungꞌ. Da arangan ini, “Garam igi sisa tamut i dzi marangꞌ da dzi yadzuꞌ, da aruani da dzi tsanga nam.”

16 Rib Farisai fain ini binaꞌ, “Garam nanga nam bida nigi da gubuꞌ Sabat da mamida i tsarifan, anungꞌ iba imingꞌ Anutu gin u.”

Da bitsintaꞌ fain ini binaꞌ, “Isangꞌ garam maisan mangan nanga nam maran mangan tsiraꞌ tsiraꞌ bida nigi?” Da ribarangan yudzung i nan da ruan i uwayant isu iruꞌrun.

17 Da itip igut i garam maran gampaman da dauman igi, “U bufaringꞌ garam nanga agu maram dauman igi garam idzuwai?”

Da arangan ini binaꞌ, “Arangan profet mangan.”

18 Da bitsintaꞌ garam Yuda gudzun rusan anungꞌ imuaruts ibi arangan maran igampam, da aruani da idaum, ibinigi da inuꞌ i ramanggan da rinanggan i batsanganda ribarangan. 19 Da igutin ini binaꞌ, “Agam narunggam ani, ma? Da agam ini arangan maran igampam da gubuꞌ rinan apingꞌan? Ibi anungꞌ da arangan isangꞌ i tsanganda nam da aruani?”

20 Da garam igi ramanggan da rinanggan ini nan mungaꞌ ibiani, “Aga sruꞌ gin i aga narunggangꞌ arangan igi da rinan irim arangan maragampam angu. 21 Da bitsintaꞌ aga wasruꞌ gin i mangan igi itip arangan maranggan idaum da itsanga nam da aruani. Garam tsiraꞌ bingan igi! Wagutin! Runggan bungꞌ ani nan i nifunggan i.” 22 Ramanggan da rinanggan ini ibinigi i tuas arangan irat i rib Yuda gudzun rusan, i garam gudzun ruas igi iyudzu nan sib i manga nida Yisu wasi bida Arangan Garam Anutu ragadan da bungꞌ apaꞌ arangan rai nawaꞌ sinungꞌ ungar mpruꞌa ruan gin. 23 I wain bida nigi da arangan ramanggan da rinanggan ini binaꞌ, “Garam tsiraꞌ bingan igi! Agam wagutin!”

24 Da itip inuꞌ garam maran gampaman da dauman ugu ba da ini rutin ibiani, “Watsaf ruam da Anutu da wani nan nidzun da agai, i aga sruꞌgin sib i garam igi garam maisan.”

25 Garam arangan ini binaꞌ, “Dzi mamigin mani arangan garam maisan ma imaꞌ. Nam bitsintaꞌ dzi sruꞌa gin da ibiani, mungꞌ da dzi marangꞌ igampam, da bitsintaꞌ aruani da dzi sangꞌ i tsanganda nam.”

26 Da rib igi itip igutin, “Arangan ibunang ibi anungꞌ i agu? Da inang u maram idaum ibi anungꞌ?”

27 Da arangan ini rib igi nifunggan mungaꞌ ibiani, “Nan arangan dzi ni sib da agam, da bitsintaꞌ agam waringant i nan! Ibi anungꞌ da agam rurim udzungꞌ da dzi i tipa ringanta gin? Agam mabuni suda i riban atsungꞌa gin mpruꞌan, ma?”

28 Ibinigi da ribarangan irim ub i arangan ini binaꞌ, “Agu angu su garam bida nigi garaman atsungꞌa gin! Aga ani su Moses riban atsungꞌa gin. 29 Aga sruꞌ gin sib i Anutu ini nan da Moses, da aga tungꞌ marangꞌ i garam igi ibuba anungꞌ.”

30 Garam igi ini rib igi nan gan mungaꞌ ibiani, “Nan agam nidan igi anungꞌ isangꞌ! Garam igi tip dzi maranggangꞌ idaum da dzi tsanga nam, da agam itungꞌ maram i gan bada gin. 31 Agi isruꞌ gin i Anutu wasangꞌ ringanta i garam maisan mangan nan gan u. Da bitsintaꞌ iringant i garam pumuꞌa Arangan da atsungꞌa i maranggan furan. 32 Mungꞌ ugu bawaꞌan da arani da garam mangan waringant i nan bida garam mangan rinan apingꞌa maran gampaman da mangan tipa i maran dauman u. 33 Bida Anutu mamida tanginda garam igi badan, da wasangꞌ i nanga nam mangan u.”

34 Rib igi iringant i arangan nan gan nidan da ini rutin ibiani, “Gubuꞌ u rinanggam apingꞌa agu, da nam maisan isisungꞌ agu! Da u mani utusa agai i nan!” Da isiat arangan rai i ungar mpruꞌa ruan gin.

35 Yisu iringant i sisingꞌ rib igi siata garam igi rai i ampan ungaran mpruꞌa ruan gin, da ifan da iwaꞌ da arangan da ini, “U muaruts Garam Narunggan, ma imaꞌ?”

36 Da arangan igutin, “Garam tsiraꞌ, garam idzuwai igi? Wani da dzi, da dzi sangꞌ i muarutsa Arangan.”

37 Da Yisu ini, “U rarab arangan sib wa! Garam arangan rurut agu ini nan.”

38 Da garam igi ni binaꞌ, “Nifutsarif! Dzi muaruts agu.” Da yidza fagan iruꞌ Yisu maran i tsarifa Arangan.

39 Yisu ini binaꞌ, “Dzi ba intap ani i raruda garam gar nanggan, i garam maran gampaman bungꞌ atsanga nam da garam tsanganda nam maran bungꞌ agampam ruan sib.”

40 Garam Farisai fain mpada uts da Arangan iringantin da igutin, “U ni aga marangꞌ gampaman bida nigi, a?”

41 Yisu ini binaꞌ, “Bida agam maram gampaman, da agam wasangꞌ i mpada warangꞌ i nam raruda agam nanggam maisan u, da bitsintaꞌ agam ini runggam garam raraba nam, da agam nanggam maisan rumingꞌ da agam.”