2
Yona Nanggan Udagin
1 Yona impa yafas wangun wasaꞌ da yugin da Yawe, arangan Anutu gan, 2 ibiani,
“O Yawe! Dzi waꞌ da barabin tsiraꞌ bingan,
da dzi nuꞌ Agu i U rima dzi sib,
da U ringant i dzi.
Dzi mpa iruꞌ garam mampan gampan,
da dzi rang ibiaꞌ da Agu,
da U ringant i dzi nanggangꞌ rangan.
3 U tapu dzi ruꞌ uruts warangꞌ
da mpui ifingꞌ i dzi ruꞌ rungum warangꞌ bingan.
Uruts ibuarum dzi
da U iyamiyamam tsiraꞌ ititam i dzi.
4 Dzi buni gaꞌ U tiasa dzi rai i U maranggam,
da bitsintaꞌ dzi bungꞌ atip atsanga Agu Ungaram Mararam.
5 Mpui tsiraꞌ igangum dzi
da yintsungꞌ dzi yu fufin da asapangꞌ sib
da ibuafir dzi nting angu.
Da dzi nang i mampan.
Biningꞌ biningꞌ yudzu dzi gudzungꞌ gangꞌ sib.
6 Dzi sasatup iruꞌ ifa mamai wain mingꞌa uruts warangꞌ bingan,
da intap igi itsungin dzi sib i dzi gangꞌ tipa yaban.
Da bitsintaꞌ Yawe, dzi Anutu gangꞌ Agu;
U tip iyu dzi sinungꞌ garam mampan gampan
da dzi rungꞌ impa marataꞌ.
7 Gubuꞌ dzi nanga i mampan
da dzi marangꞌ ifur Agu, Yawe,
da dzi nanggangꞌ udagin ibiawaꞌ da Agu
imingꞌ U Ungaram Mararam.
8 Rib pumuꞌa mugus maraganun mamida i nanga nam waꞌan
irim barun da U maraampi gam.
9 Da bitsintaꞌ dzi bungꞌ arim nam tsaradan nabiaꞌ da Agu
ruta mint tsarifa U binganggam.
Da dzi bungꞌ anang nam santan dzi tagada ruangꞌ gin sib.
I nam rima sib iba imingꞌ Agu Yawe gin angu.”
10 Da Yawe ini da yafas itsup Yona iwaꞌ ifa uruts ringan.