3
Yowanis Ruruba Garam Itip Sanab
(Matiu 3:1-12; Markus 1:1-8; Yowanis 1:19-28)
1 King tsiraꞌ Taiberias udzufan mpada tayangꞌ gamp santan mpada warangꞌ i Rom ibawaꞌ 15, da Pontius Pilatus isu kiap tsiraꞌ impa tayangꞌ Yudia, da Herot isu garam gudzun gabman gan mpada tayangꞌ utup Galili, da rainggan Filip isu garam gudzun gabman gan mpada tayangꞌ utup Ituria da Trakonitis, da Lisanias isu garam gudzun gabman gan i utup Abilini. 2 Da Anas da Kaiafas isu garam pumuꞌa Anutu wain tsiraꞌ. Da gubuꞌ arigi da Anutu nan gan iwaꞌ da Yowanis, Tsakarias narunggan, imingꞌ nam manaꞌ dadauntan. 3 Da Yowanis iyung gamp sib angu mingꞌa uts da mpui Yordan, da ifis i nan da garam i parima i ruan da tanginda nanggan maisan rai da yiꞌa i mpui ruruban, i fadan da Anutu i siata i nanggan maisan rai.Mt 3:1-2; Mk 1:4 4 Da inang gum igi yatsungꞌ profet Aisaia nan gan nidan ibiani:
“Nifun mangan inuꞌ imingꞌ nam manaꞌ dadauntan ini ibiani,
‘Watip Nifutsarif sanaban yunga gin narururung.
5 Wasama marangruꞌ, da warab mamai da marabuntup santan naruꞌ nasu bump rururungan.
Sanab santan nguangꞌan narururung,
da sanab marangruꞌ nafafus.
6 Da garam gar santan bungꞌ atsangan Anutu nanggan rima sib.’ ”Ais 40:3-5; Mt 3:3; Mk 1:2; Ywn 1:23
7 Da Yowanis ini da ampi tsiraꞌ badan i arangan ruruban igi ibiani, “Muntsir narun rusan agam! Mangan ini sisingꞌ da agam i runta sinungꞌ Anutu nugu tsakia gan da agam iba da dzi? 8 Bida agam nida uda mpui ruruban, da wakap nidzun bini mungꞌ da nasantingꞌ nabi agam itangin nanggam maisan rai da iparim i ruam ifan da Anutu. Da anungꞌ nidan da runggam bida ani, ‘Abraham isu agi tafanggangꞌ,’ i nam igi anungꞌ isangꞌ i rima agam sib u. Dzi nani da agam, Anutu isangꞌ nanga tauf ani suda Abraham yangin rusan. 9 I dzantsun rumingꞌ uts da gai wain, da gai santan mamida i kapa nidzun bini da bungꞌ arab udziꞌ da natapu nayab dzaf.”
10 Da ampan santan igutin, “Aga nanga bida anungꞌ?”
11 Da Yowanis ini ribarangan nan gan mungaꞌ, “Da mangan ngarukui gan iruꞌ da narim bits da mangan sauda runggan. Da mangan nanggan gadan rumingꞌan da nanang nabinigi angu.”
12 Da garam uda takis fain iba i Yowanis ruruban bida nigi, da igut i arangan, “Nan Wain, aga nanga bida anungꞌ?”
13 Da arangan ini da ribarangan, “Gubuꞌ agam ntsungꞌan nam mingꞌa garamin da anungꞌ ntsungꞌa nam yusa nam bunump gudzun tangindan u.”
14 Da garam singaari fain igutin ibinigi, “Da agai nanga bida anungꞌ?”
Da arangan ini da ribarangan, “Agam madzur nan umpur ma narim tsakia da garam i uda i gan nam bunumpan ma. Nugum wanuf i nam bunump aru agam udan i gum agam nangan.”
15 Da ampan santan impa irim maran i Kristus, Garam Anutu Ragadan, badan, da maran ifur i Yowanis igi mani Kristus arangan. 16 Da Yowanis ringanta i ampan igi nan gan da ini i nifunggan mungaꞌ ibiani, “Dzi rurub agam i mpui utaꞌ. Da bitsintaꞌ mangan atsungꞌa dzi, ruta nampang tsiraꞌ iyus dzi, bungꞌ aba. Dzi wadaum i piraꞌa fufuai i Arangan faga gangkang gan da adzuꞌa Arangan faganggan u. Arangan bungꞌ arurub agam i Marapayam Mararam da dzaf.Mt 3:11; Mk 1:7-8; Ywn 1:26-27; Ap 1:5; 11:16; 13:25 17 Da bangin rugif fok i aruda nam gangan mingꞌa mumai piriangꞌa nam nidzun gin, ufuma nam nidzun atangꞌa ungar da bungꞌ afanga nam gangan santan i dzaf gada ratar ntingan.” 18 Da Yowanis imus ini Anutu sisingꞌ bini gan i nan ampi bingan i untapa i garam uwayantan.
Herot Itangin Yowanis Yatangꞌ Ungar Karabus
(Matiu 14:3-5; Markus 6:17-18)
19 Da bitsintaꞌ Yowanis impiꞌ Herot Antipas, garam gudzun gabman gan mpada tayangꞌ Galili ugu, i asuban uda rainggan fininggan, Herodias, da asuban ampi bingan nangan. 20 Raiyi da Herot itip inang asub mangan i tanginda Yowanis atangꞌa ungar karabus.
Yisu Iyiꞌ Mpui Ruruban
(Matiu 3:13-17; Markus 1:9-11)
21 Gubuꞌ aru Yowanis rung ruruba ampan ampi bingan da arangan irurub Yisu impruꞌ. Yisu muntida udagin, da gunungun idagangꞌ. 22 Da Marapayam Mararam isu busir maran iruꞌ imingꞌ ragun i Yisu. Da nifun mangan iwaꞌ imingꞌ gunungun ini binaꞌ, “Dzi narunggangꞌ agu, da dzi marangꞌ yari da nugungꞌ inuf nidzun i agu.”
Yisu Tafan Rusan Nan Gan Ragidan
(Matiu 1:1-17)
23 Da Yisu udzufan waꞌa bida 30, da iraꞌ i gan guman.
Da ampan maran ifur da ibuni Yisu igi Yosef narunggan.
Da Yosef igi Heli narunggan. 24 Da Heli igi Matat narunggan.
Da Matat igi Liwai narunggan. Da Liwai igi Melki narunggan.
Da Melki igi Yanai narunggan. Da Yanai igi Yosef narunggan.
25 Da Yosef igi Matatias narunggan. Da Matatias igi Amos narunggan.
Da Amos igi Nahum narunggan. Da Nahum igi Esli narunggan.
Da Esli igi Nagai narunggan. 26 Da Nagai igi Mat narunggan.
Da Mat igi Matatias narunggan. Da Matatias igi Semen narunggan.
Da Semen igi Yosek narunggan. Da Yosek igi Yoda narunggan.
27 Da Yoda igi Yoanan narunggan. Da Yoanan igi Resa narunggan.
Da Resa igi Tserubabel narunggan. Da Tserubabel igi Sealtiel narunggan.
Da Sealtiel igi Neri narunggan. 28 Da Neri igi Melki narunggan.
Da Melki igi Adi narunggan. Da Adi igi Kosam narunggan.
Da Kosam igi Elmadam narunggan. Da Elmadam igi Er narunggan.
29 Da Er igi Yosua narunggan. Da Yosua igi Elieser narunggan.
Da Elieser igi Yorim narunggan. Da Yorim igi Matat narunggan.
Da Matat igi Liwai narunggan. 30 Da Liwai igi Simion narunggan.
Da Simion igi Yuda narunggan. Da Yuda igi Yosef narunggan.
Da Yosef igi Yonam narunggan. Da Yonam igi Eliakim narunggan.
31 Da Eliakim igi Melea narunggan. Da Melea igi Mena narunggan.
Da Mena igi Matata narunggan. Da Matata igi Natan narunggan.
Da Natan igi Tafit narunggan. 32 Da Tafit igi Yesi narunggan.
Da Yesi igi Obet narunggan. Da Obet igi Boas narunggan.
Da Boas igi Salmon narunggan. Da Salmon igi Nason narunggan.
33 Da Nason igi Aminadap narunggan. Da Aminadap igi Atmin narunggan.
Da Atmin igi Arni narunggan. Da Arni igi Hesron narunggan.
Da Hesron igi Perets narunggan. Da Perets igi Yuda narunggan.
34 Da Yuda igi Yakop narunggan. Da Yakop igi Isak narunggan.
Da Isak igi Abraham narunggan. Da Abraham igi Tera narunggan.
Da Tera igi Nahor narunggan. 35 Da Nahor igi Seruk narunggan.
Da Seruk igi Reu narunggan. Da Reu igi Pelek narunggan.
Da Pelek igi Eber narunggan. Da Eber igi Sela narunggan.
36 Da Sela igi Kainan narunggan. Da Kainan igi Arfaksat narunggan.
Da Arfaksat igi Sem narunggan. Da Sem igi Noa narunggan.
Da Noa igi Lamek narunggan. 37 Da Lamek igi Metusela narunggan.
Da Metusela igi Inok narunggan. Da Inok igi Yaret narunggan.
Da Yaret igi Mahalalel narunggan. Da Mahalalel igi Kenan narunggan.
38 Da Kenan igi Inos narunggan. Da Inos igi Set narunggan.
Da Set igi Adam narunggan. Da Adam igi Anutu narunggan.
3:3: Mt 3:1-2; Mk 1:4
3:6: Ais 40:3-5; Mt 3:3; Mk 1:2; Ywn 1:23
3:16: Mt 3:11; Mk 1:7-8; Ywn 1:26-27; Ap 1:5; 11:16; 13:25