1 Watip wani nan marafur da rib muarutsan i atangꞌa warangꞌ i gabman garam gudzun rusan da ringanta i nan gan, da nugun puꞌa i nanga nam bini angu, 2 da anungꞌ rima ub ma nida nan maisan i mangan u, da tsanganda ruan bini, da maran fura rib fain aga suda miamun, da yafada nan angu i ampan santan. 3 I wain ibiani, mungꞌ ugu da agi binigi isu garam bururiꞌan, da imami ringanta i nan, da yatsungꞌ nan umpur. Da isu mamaꞌ gum utaꞌ i nam wangun akatsan intap ani gan da nam mara maran rima nugun tsiaꞌan da rini uriats. Da agi mpa wasaꞌ i nam maisan da nugun ruaꞌa i ruan da buginda ruan maiꞌ maiꞌ. 4 Da bitsintaꞌ gubuꞌ Anutu, aru rima agi sib, maraampi gan da maran aridan gan kupisa ruan wasi, 5-6 da Arangan irim agi sib, i wain, anungꞌ agi sanabangꞌ bini nangan mangan u, imaꞌ, Arangan nanggan gaiban angu. Irim agi sib i sanab bida ani: i Yisus Kristus, Garam rima agi sib, nanggan mampan angu da Anutu iyats Marapayam Mararam isisungꞌ agi i adzuꞌa agi nanggangꞌ maisan rai da nanga agi wangunggangꞌ suda faꞌ da rima nam maran taꞌan faꞌ da agi. 7 Anutu inang ibinigi iyab i maraampi gan angu, i faringꞌa agi bida garam rururungan da agi suda i gan narun rusan da rima marangꞌ i ruta Arangan mpada ratar ntingan angu.

8 Nan igi nan nidzun bingan. Ibinigi da dzi ni da agu i u dziwara i nan santan igi babampafan angu, i rib muarutsa Anutu ugu rima uwayantan santan i nanga nam bini. Nan igi bini iyus da bungꞌ arim rib santan sib. 9 Da bitsintaꞌ agu anungꞌ mingꞌa wasaꞌ i nan brabruꞌan da branga ruan ma nan ufuai ragida tafan ruas ma mpiꞌa ruan i nan faidagin, i nan igi nidzunggan bini imaꞌ da wasangꞌ i rima garam gar sib u. 10 Da waradzungꞌ garam branga ampan muarutsan, da bida mamida i ringanta i nan, da watip waradzungꞌ, da maꞌan, da watiri arangan rai da warim barum rutin. 11 I u tsanga sib wa, nam maisan yis marawafir i garam bida nigi da iwaya i uwayantan, da gan nanggan maisan nangan irim arangan rai.

12 Gubuꞌ dzi tanginda Atemas ma Tikikus biawaꞌan da agu, da waintsaꞌ i rima runggam santan i bawaꞌan da dzi mingꞌa gamp Nikopolis, i dzi ni biaꞌan i mpada nigi da gubuꞌ nam rangarang. 13 Waintsaꞌ i nanga nam santan i rima Dzinas, garam gudzupuꞌ i nan faidagin,*garam gudzupuꞌ i nan faidagin — Garam ani guman nangan anungꞌ idzidziwan. Isu garam gudzupuꞌ i garam Yuda ma garam Grik ma garam Rom nan gan faidagin. da Apolos sib i gan sanaban yunga fadan, i anungꞌ sauda ruan i nam mangan u. 14 Agi ampan gangꞌ muarutsan narim uwayantan santan i nanga nam bini i rima rib sauda runggan sib, i ribarangan suda garam kapa nidzun bini.

15 Rib santan ruta dzi mpadan ani irim nan gan nufan ibiaꞌ da agu. Warim aga nan gangꞌ nufan da rib muarutsan maran arida i agai mpada nigi.

Nifutsarif maraampi gan narut agam sib angu.