6
Kristen dana uqa cotig gesilec jona cain mudiaun
1 Dana oso age gemona uqa Kristen cotignu jecafi adi uqa Anutna dana cajaca qagoc tutuc mudecnu ninijeb wooladimei gesilec jona dana mahanadec ititomca qee eu age gesildocnu mudigian? 2 Anutna dana cajaca qagu bilec age dana cajaca cunug mahanadec eu gesiladoqagan ec qee doginafo? Eunu age dana cajaca maha inadec gesiladoqagannufi adinu age je nag i edec eu gesilecwe qee? 3 Ege ensel ha gesiladeqan ec qee doginafo? Ege odi odocomunfi ege maha inadec cetehnu je gesiladecnu ihoc biluquna. 4 Eunu age maha inadec ceteh osonu jecafi adinu age dana tamanecna ijanca qee eu gesiligiannu cabi utegina? 5 Ija age majanaga adigiannu je i madigina. Age gemona dana cisdoc silecca uqa dana cotigca ale gemona je eu gesilecnu ihoc qee bilina eu melefo? Qee, dana oso ihoc bilina. 6 Euqa age gemona dana oso uqa cotig gesiladec jona mudina, odocob dana Kraisnu wawaga qee meleena eu amagana gesildogina.
7 Eu mele, age tamanecna dana cajaca gesiladec jona ehadi legina. Age kobol euna age Kraisna kobol toodocnu toni aqen euna fegina. Eetanu age qee culadecebil age me qee madegina? Eetanu age qee culadecebil agena ceteh didu cawaladegina? 8 Euqa age kobol me i qee odogina. Age agedodoc dana waadegina, odocob age agedodoc danana ceteh didu cawaladegina. Age kobol i himec age wawaga meleec cotogail bahic eu odadegina.
9 Dana qisol megina eu age Anutna cul qee mugumuga owain ec qee doginafo? Age agedodoc wawaga cain uhuldowain. Dana age cajaca wal kobol odoginaca, dana age kadan tibudnu cuha feginaca, dana age osona cajaca nijeginaca, dana age dana osoca kobol me qee majanagaca odoginaca, 10 dana age heje oginaca, dana age dana osona ceteh amaga gugca feginaca, dana age ceu jecebil dalul aqenaca, dana age dana leihnu je um aqeginaca, dana age dana agena ceteh didu cawaladeginaca, dana eundec cunug age Anutna cul qee mugumuga owain. 11 Age Korin tamanec leih age dana eundecwe odi biloloig. Euqa Anut uqa agena silailnu soiaden, odimei uqa age qagu maden, odimei uqa Krais Jisas Tibud ijannaca Anutna Kisnaca age dana cajaca ititom maden.
Ege dewenige eu Kis Gunna cuha jo
12 Age oso madena, “Ija eeta oso odigen eu cois himec,” ena. Eu mele, qa ceteh cunug eu hinana cesulhec qee. Ijaha madigina, “Ija eeta oso odigen eu cois himec,” igina qa ija eeta oso culdecemin ija uqana cabi dana qee caligaun. 13 Age oso madena, “Sab eu ija wawinu, odocob wawi eu sabnu,” ena. Eu mele, qa Anut ale lecis odi qee maligian. Age dewenega eu cajaca wal kobol odocnu qee ifanel, age dewenega eu Tibud binan sulecnu ifanen, odocob Tibud uqa dewenegana ilo bilia. 14 Anut uqa Tibud cal mecnadec tulidocob cajen. Odimei uqa egeha uqana gagadic odocna cal mecnadec tuligeceb cajeqan.
15 Age dewenega eu Krais deweg amihilon ec qee doginafo? Eunu ija Krais deweg amihilon umig wal caja deweg amihilon migenfo? Qee bahic! 16 Anutna jaqec je madena eu odi calena:
“Dana caja lecis ale dewenela osol caligian,” ena. (Jenesis 2.24)
Eunu dana uqa deweg wal cajaca fagdona eu uqa caja euca dewenela osol calesina ec age qee doginafo? 17 Euqa dana oso uqa Tibudca fagdona eu uqa Tibudca alena Kis osol calowasan. 18 Silail leih cunug dana odogina eu dewenega maha gumu nijia. Euqa dana wal kobol odona eu uqadodoc dewegna silail mena. Eunu age wal kobol eu culdimeig busaleiga. 19-20 Age dewenega eu Kis Gunna cuha jo gun ec age qee doginafo? Anut uqa age wele Kis Gun aden eu uqa age dunuh bilia. Ge, Anut uqa age ameg benna bahic fajadi ceden. Age dewenega eu agena bahic qee. Eunu age dewenegana Anut binan suleigale.