Aposel Agena Cabi Oc
Aqunec Je
Buk i, Aposel Agena Cabi Oc, eu Lukna Me Je tubdona. Luk buk iha jaqen. Buk ina Kis Gun uqa aposel jic dado madeceb age Jerusalem onodec Judiaca Sameriaca li hatuhatu cunugna dana cajaca Jisasnu me je qasali maadein (1.8 feiga) eunu Luk jaqen.
Buk Aposel i Jisasna tamanec eu Juda dana cajaca gemona sanan mimei eu hibna li dana cajaca age hatuhatu cunugna bilegina euna ben calen eunu dodo saena. Luk uqa ceteh oso ha ihacecnu gale dona. Eu Jisas Kraisna cabica, dana cajaca age Jisas toodogina agena cobocca eu wele Anut uqa Isrel dana cajaca je hahun oso maaden eu ihoc lena eunu ihacena. (Age 2.14-36 feiga.) Buk Aposel i ceteh ben osonu saena, eu Kis Gun, Anutna Kis uqana cabi. Pentikos Deel Benna Kis Gun nimei Jisasna malogomca bilen. (Age 2.1-4 feiga.) Odimei Kis Gun uqa Anutna gagadic odoc aposel adimei uqa aposelna cisdoc gaid dado meceb age agena cabi oin.
Buk ina me je qasali madec cecelac mati nijia, age 2.14-41, 3.11-26, 4.8-12, 7.2-53, 10.34-48, 13.16-41, 17.22-31, 22.1-21, 24.10-21, 26.1-23, 28.23-28 feiga. Dana cajaca mati bahic age me je inu wawaga meleeceb Jisasna tamanec ben calen.
Buk i aposel cunugnu saena, euqa aposel lecis odosinnu je mati saena, eu Pita Polca. Pita uqa aposel age Jisas gami coboin eundec oso. Pol uqa casac Jisas qee toodol, uqa Jisasna cad oso bilen. Uqa Jisasna tamanec cilehadecnu cabi gagadic oloi. Euqa uqa Damaskas jicna Jisas gulucdon. Odocob uqa Jisasna aposel ben eundec oso calen.
Saen osona Luk uqa Polca jic cobosin. Buk ina cudun leihna Luk uqa Pol odonnu saena uqa egenu madena. (Age 16.10-17, 20.5-21.18, 27.1-28.16 feiga.) Eunu Luk uqa Pol cabi hijagul oso.
Je Dunuhnu Dado Mec
1. Pitana cabica Kristen tamanec sanan menca (dac 1-12)
A. Aposel age Jisasnu me je Judiaca, Galilica, Sameriaca euna qasali maadein (1.1-9.31)
1. Aqunec je (1.1-2)
2. Krais ceseli cajimei cabi on (1.3-11)
3. Aposel age Kis Gun ocnu sumudein (1.12-26)
4. Aposel age Kis Gun oin (dac 2)
5. Pita Jonca ale dana jaih laleg mec me mudecebil age Pita Jonca gihacdoc jona malein (3.1-4.31)
6. Kristen tamanec age agena ceteteh eu osoben utecebuteceb ein (4.32-5.11)
7. Age aposel 12-pela gihacdoc jona madein (5.12-42)
8. Age dana 7-pela age aposel cesuladecnu nesiladein (6.1-7)
9. Juda dana age Stiwen cegulec amagana mudecebil je maadeceb age Stiwen meenna qocobil cal men (6.8-7.60)
10. Wawaga meleec dana cajaca Jerusalemdec age bilisadu belein (8.1-4)
11. Filip uqana cabi (8.5-40)
a. Uqa Sameria hatuna cabi on (8.5-25)
b. Uqa dana Itiopiadec me je madon (8.26-40)
12. Sol Jisasnu waug meleen (9.1-31)
B. Aposel age Fonisia hatunaca, Saipras nuinaca, Antiok taunnaca me je qasali maaden (9.32-12.25; 11.19 feiga)
1. Pita uqa Mediterenian Macas lanna cabi on (9.32-11.18)
a. Uqa Inias me mudimei Dokas cesuldon (9.32-43)
b. Uqa Koniliasna jona me je qasali maaden (10.1-11.18)
2. Juda dana qee eundec tamanec Antiokna calen (11.19-30)
3. Herod uqa Kristen tamanec me qee odadimei cal men (dac 12)
2. Pol uqana cabica, odocob Kristen Antiokdec Rom ono li ben fulusdon (dac 13-28)
A. Aposel age Frigia hatunaca, Galesia hatunaca me je qasali maaden (13.1-15.35; 16.6 feiga)
1. Pol uqa me je maadecnu cabi cocobi hatu filfil nuen (dac 13-14)
2. Tamanec uqana cegulec ben Jerusalem ono calen (15.1-35)
B. Pol uqa Masedonia hatuna macas leti nuen (15.36-21.16; 16.9 feiga)
1. Pol uqana me je maadecnu cabi coboc lecisdoc odon (15.36-18.22)
2. Pol uqana me je maadecnu cabi coboc cijeddoc odon (18.23-21.16)
C. Pol uqa Rom ono nuen (21.17-28.31; 28.14 feiga)
1. Age Jerusalem ono tempelna Pol hewudein (21.17-23.35)
a. Rom agena han dana Pol hewudein (21.17-22.29)
b. Pol Juda agena cegulec benna amagana je maaden (22.30-23.11)
c. Han dana ilo Pol suldocob uqa Sisaria taun ono nuen (23.12-35)
2. Pol gihacdoc jona Sisaria ono bilen (dac 24-26)
a. Pol uqa Filiks amegna je madon (dac 24)
b. Pol uqa Festas amegna je madon (25.1-12)
c. Pol uqa Festasca King Agripaca amalana je maalen (25.13-26.32)
3. Pol uqa macasna Rom nuen (27.1-28.15)
4. Pol uqa cabi gel lecisna Rom ono uqana jona gihacdoc bilen (28.16-31)
1
Jisas uqa Kis Gun suldocob malogom ageca hugian ec maaden
1 O Tiofilas, ijana buk casac jaqem euna ceteh cunug Jisas odonca, iwaladenca saen uqa cabi sanan mennadec 2 hocob li Anut uqa Jisas ehudeceb enedec sao ohisna ten eunu jaqem. Uqa sao ohisna qee tec uqa Kis Gun odocna aposel*Age je eu Matju 10.2na nijia eu feiga. dana uqa nesili cedaden eundec uqa je gatitina ulicaadi dado maden. 3 Saen uqa dain ben umei cal meceb li deel 40 hedocob uqa ceteteh ihacadeceb uqa cebac bilia ec doqagannu uqa uqana aposel eu amagana saen mati bahic camas men. Age uqa fefegin uqa Anutna culnu age gami togodoin. 4-5 Saen age uqaca gabandu bibileig uqa je i maaden, “Jon wana wa joaden qa deel osooso hedocob Anut age Kis Gunna wa joadigian. Eunu age Jerusalem cain culuwain. Ceteh me Memige Anut adigiannu maden maadem eu sumudi bileiga,” aden.
6 Saen aposel age Jisas gami gabandu bibileig age sisildoin, “O Tibud, hina qila saen ina Isrel cul agena cofdoc haun ceseli Isrel adeganfo?” doin.†Wele bahic Isrel age agena eundec oso uqa agena king biloloi. Euqa Jisasna saenna Rom age Isrel hatu cofdoin. Odocob Jisas calen saenna dana mati age uqa Rom ititacadimei Isrel cul haun sanan migian ec cisdoin.
7 Odocob Jisas maaden, “Ceteh i cel saen cali hugian eu Memige Anut ebengulna odocob cali hugian. Age saen euna caligian ec docnu qee nijel. 8 Euqa saen Kis Gun ageca neceb age gagadic odocca biluqagan. Odocob age dana cajaca cunug ijanu je qasali maadoqagannu Jerusalem onodec Judiaca Sameriaca li hatuhatu cunug olom danigian,” aden.
Jisas sao jobon ceseli ten
9 Uqa je i madi hedumei Anut uqa ehudeceb sao jobon teten mecidu tawein. Oodogin ti taen dunuh li jebuc daneceb amagana haun qee felein.
10 Age amaga uqa sao ten odi tatiein tatawegin mahuc odi dana lecis lotoc senenec himec tacimesi age cemenega ni tawimesi 11 maadesin, “Galilidec dana, age eetanu sao jobonna tatii ene tawegina? Jisas i Anut uqa ehudeceb enedec sao jobon teia uqa teten feiga odi ceseli tonigian,” adesin.
Dana oso Judasna cabi ugiannu age nesildoin
12 Odocob aposel age Oliw Aluh eunadec haun ceseli Jerusalem belein. Eu Jerusalem taundec hocnu eu nag bahuca qee, eu kilomita osol odi. 13 Age taun benna limeig jo hamol ohis age nijoloigna tein. Aposel eu age ijanaga odi, Pita, Jon, Jems, Andruca, Filip, Tomasca, Batolomju, Matjuca, Jems, uqa Alfias melah, uqaca, Saimon, uqa Selot‡Selot agena am age Juda dana eu Rom dana Judiadec ititacadecnu ein. dana, uqaca, odocob Judas, uqa Jems melah uqaca. 14 Aposel ageca, caja age Jisas toodoloig ageca, Maria Jisas anagca, uqa waliagulca age cunug inondoqagannu wawaga osolca gaid ceguloloig.
15 Deel osooso hedocob euna wawaga meleec cotogail 120 odi cegulein. Odocob Pita je maadigiannu caji tawen. 16 Uqa maaden, “O cotiel, je oso eu Anutna jaqec je weledecna nijia. Wele bahic Kis Gun odocob Dewid uqa je oso Judasnu maden. Judas uqa Jisasna cad jic dado madimei uqa age ebenegana Jisas mudigian eunu je maden. Odocob je i wele aig qon. 17 Ge, Judas uqa egena eundec oso eunu uqa egena cabina cabi oso muguh mein,” aden.
18 “Judas uqana cabi oc me qeenu meen qaig on eu maha oso fajen. Euna uqa toni qocob cal men. Uqa big fugudocob big anag maliogca cunug basecdon. 19 Odocob dana cajaca cunug Jerusalem bilein eu dah mimeig age agena jena maha eu ‘Akeldama’ ein. Uqana gug eu odi ‘Golac Maha,’ ” aden.
20 “Ge, Buk Songna je oso age jaqein eu odi madena:
‘Uqana bilec gauc nijiale.
Dana oso euna qee biliaun,’ ena. (Buk Song 69.25)
Odocob je oso ha edi madena:
‘Uqana cabi cudun eu oso oiale,’ ena,” aden. (Buk Song 109.8)
21 “Eunu egenadec dana oso uqa Jisas Tibud cal mecnadec ceseli cajen eu fen uqa ege gami gabandoc bilom dana i uqa nesili ehudecnu. Uqa saen cunug Jisas Tibud ege gami cobom, 22 saen hahawan Jon uqa wa joadecnu je maaaden li deel Jisas uqa egecadec ehudi sao jobonna ehi ten eu gadac. Odocob dana i uqa egeca gami Jisas cal mecnadec ceseli cajennu je qasali maadec cabi oqale,” aden.
23 Eunu age dana lecis ijanala madein, Josef uqa Basabas doloig, uqa ijan oso ha Jastas doloig, Mataiasca. 24-25 Odimeig age inondu madoin, “O Tibud, hina cunug agena cisdoc dogona eunu dana lecis i alenadec in eu uqa aposel cabi cudun Judas uqa cuculi uqana gucna nuen eu ugiannu hina nesili ehudem ege ihacgaga,” doin. 26 Odimeig age ijanala meen lecis jaqimeig hal oso tacimeig lahidocobil meen oso toni non. Mataias ijan calen. Uqa ageca gabanadeceb uqa aposel bilec 11-pela odi age gami bilein.§Age Anut uqa dana oso nesili ehudeceb uqa Judas Iskariotna cudun ocnu gale aden. Eu Juda agena kobol age wele odi odoloig. Age 1 Stori 26.13-16 feiga.
*1:2: Age je eu Matju 10.2na nijia eu feiga.
†1:6: Wele bahic Isrel age agena eundec oso uqa agena king biloloi. Euqa Jisasna saenna Rom age Isrel hatu cofdoin. Odocob Jisas calen saenna dana mati age uqa Rom ititacadimei Isrel cul haun sanan migian ec cisdoin.
‡1:13: Selot agena am age Juda dana eu Rom dana Judiadec ititacadecnu ein.
§1:26: Age Anut uqa dana oso nesili ehudeceb uqa Judas Iskariotna cudun ocnu gale aden. Eu Juda agena kobol age wele odi odoloig. Age 1 Stori 26.13-16 feiga.