27
Age Pol wagna mudecebil Rom ono nuen
Odocob ege wagna Itali hatuna nuecnu je nijeceb eu age Pol gihacdoc leihca han dana 100 agena ilo oso ebenna mudein.* Luk uqa “ege” haun jaqen, eunu Pol uqa Rom taun ono nuen saenna Luk uqa gami belesin eu odi fena. Age Aposel 16.10ca, 21.17ca euha feiga. Uqa ijan Julias. Uqana han am age “Sisa Ogastasna han am” doloig. Odocob ege wag Adramitiamdec eu taun Esia lan toodu nijeginana nuigiannu saciadon tatawen euna tobi belom. Aristakas uqa Masedonia dana Tesalonaikadec uqa egeca osoben belom. Cojageceb ege Saidon taun ono calom. Odocob Julias uqa Polnu waug qocob uqa Pol cois ec madocob uqa uqana danah eundecca limei meciadeceb ceteteh utoin. Odocob ege onodec haun wag tobimeb belom qa fufu medemige cagu qahi ege nom odi becebnu ege Saipras nui hibilohu isec qaqali belom. Odimeb ege Silisia Pamfiliaca macasna qeti limeb Maira taun ono calom, eu Lisia hatu ono. Ono han dana 100 agena ilo Aleksandriadec wag Itali ono nuigiannu tatawen fimei wag euna cedi migen.
Odimeb ege macas launa deel mati cebitnana cobom. Cabi memeb hibna taun Naidas ono calom. Fufunu ege macas eu gemogemo odi toodu nuecwe qeenu ege Krit nui hibilohu isec qaqali Salmoni cemenug mumudi cuculdeb macas lan toodu belom. Odimeb ege lan toodu belom. Cabi memeb wagnu macas sucun qoc cudun me bahic egina ono calom, eu Lasia taun cemenug nijia.
Odocob ege ono saen cecelac bahic cusdom. Juda agena Cud Bilec Saen eu hedon. Cud Bilec Saen eu Anut Dana Cajaca Cunug Agena Silail Cagasiadennu Deel. Age Wok Pris 25.9 feiga. Saen euna eu Septemba leceb Oktoba odi fufu gagadic eu Mediterenian Macasna fulufuluen cajen. Odocob wag age macas eu alildudu beloloig. Eunu wag cobocnu saen me qee calen. Odocob Pol uqa cisdon eu maaden, 10 “O dana, ege wagna nuecnu saen me qee bahic eu ija figina. Ceteteh wagca cunug fadaligian. Dana agena cebac bilec ha felacudoqagan,” aden. 11 Euqa han dana 100 agena ilo wag hewec dana wag gugca je madesin eu hewen qa Polna je eu qee hewel. 12 Odocob wag tawec cudun macas sucun qoc eu duen saenna ono tawecnu me qee. Eunu dana matica age cisdoin, wag macas gemo lecnu cois ein. Odimeig Finiks ono nuecnu ihocfi beleqannu cisdoin. Finiks eu wag cudun macas sucun qoc Krit nuina eu cam noc anse meulaca isec macas mecidoc tawoloi. Odocob age ono wag ehi li duen saenna mecebil tawecnu ihoc ein.
Fufu ben hocob macas qahen
13 Odocob tim me bahic cam noc ansena isec fulufuluen. Odocob dana eu age agena cisdoc ihoc ligian ec cisdoin. Age anka hewecebil teceb Krit nui lan cemenug bahic lein. 14 Euqa nag odi bahic fufu gagadic Jawalti egina eu cam bec anse isec fulufuluen cajen. Fufu nuina isec cajimei macas qahen. 15 Fufu caji wag qocob wag fufu amegna bahic nonnu hewecwe qee ege culdocomun fufu u hewi nuen. 16 Odocob ege Koda nui nag macas gemo leceb qaqali cobom. Ono wag nag wag ben uqa didon eu wag benna cabalu mecnu odom qa cabi bahic. 17 Eu age didocobil wag benna ten. Odocob age halu gagadic helecebil wag ben bisalu lecebil diadimeig wag ben qataneiaunnu qagein. Eu age Libia hatu lanna ono gadgad esic of qowainnu cucuiein eunu age lai hewegin toneceb wag culdecebil fufu fulufuluaaden belein. 18 Odocob fufu ben bahic odi huhu nijen eunu deel osona eu age ceteteh wagnadec cedi helec sanan mein. 19 Odocob deel eu toodocob eu age wag uqana cabi ceteteh age ebenegagulna cedi helein. Cabi ceteteh eu wagna haluna hewen. Eunu wag eu cabi ceteteh macas dunuhna didocob wag eu mahuc qee nuel. 20 Deel mati bahic ege cam malaqaca qee folom. Odocob fufu odi huhu nijen. Euna ege cahahagecnu qee cisdolom qa ege fadaleqannu cisdom.
21 Odocob hibna dana eu age saen cecelac bahic sab qee jecebil Pol amagana tawimei maaden, “O dana, age ijana je doubmi wagna Krit nui qee culdi hoummi age ceteteh qee fadaloub. 22-24 Euqa qila ija maadigina, witic ensel oso ijana Anut ija binan suligina uqa suldocob ijaca hoia. Odimei uqa mateian, ‘Pol, cain cucuiagaun! Hina Sisa amegna tawec bahic tawegan. Odocob Anut uqana waug qocna dana cunug wagna hinaca cobogina i cahahaadeceb cebac biluqagan,’ teian. Eunu cisdu cuhadoigale! Agenadec oso qee fadaleiaun, wag himec fadaligian. 25 Dana age cisdu cuhadoiga! Anut mateian odi dih cali hugian eu ija wawi meleena. 26 Euqa ege nui oso uqana lanna ono ehi li heligigian,” aden.
27 Saen euna witic 14 ege fufu fulugegen Mediterenian macasna cobom. Witic tu gemo eu odi wagna cabi dana agena cisdoc madein lanna cedec muduquna ein. 28 Eunu age halu ceteh culumenca qagec culdegin nocob macas ameg eu 40 mita eu odi fein. Nag odi gieceb haun eu odi odimeig macas ameg eu 30 mita eu odi fein. 29 Odimeig age wag meen tobocdain ec cisdumeig cucuiein. Odimeig anka 4-pela felaculdecebil wag bigna isecdec macas dunuh non. Odimeig mahuc cojagigia bili inondoin. 30 Oodogin wagna cabi dana busaloqaga odoin. Age wag nag macasna hewecebil nocob uhulec eundec anka wag mededec culdecebil nugiannu euna memeig tein. 31 Euqa Pol han dana 100 agena ilo uqana han danaca maaden, “Wagna cabi dana i age wagna qee bilecebilfi ege cunug cahahagecnu ihoc qee,” aden. 32 Odocob han dana age halu wag nag hewecebil tawen eu cagocobil wag nag eu nuen.
33 Cam mamahon Pol uqa cunug sab jecnu maaden, “Qila age deel 14 sanijadec bahic sab qee jec bilein. Age ceteh oso qee jelein. 34 Eunu ija maadigina sab leih jeiga. Age sab i jimeig cebac biluqagannu. Age dewenegana ceteh nag osoha qee fadaleiaun,” aden. 35 Je eu madi hedumei Pol bred leih cedimei Anut inondumei eu age cunug amagana fenimei jecnu sanan men. 36 Odocob age gagadic cisdumeig cunug sab jein. 37 Dana 276 cunugca wag euna toboin. 38 Hibna cunugca odi ihoc jimeig age wag hetec mudecnu wit cedimeig cunugca macasna helecebil non.
Wag lanna qocob qatanen
39 Cojageceb wagna cabi dana age macas lan fimeig qa lanna hoqa ec qee doloin. Euqa age macas sucun qoc esicca eu fimeig wag euna esic qumeig salali tobigian ec cisdoin. 40 Eunu age anka cagocobil macas dunuh non. Odocob saen euna himec age halu culum qagec eu cufalein. Odimeig lai medena hewegin ten, fufu wag fuludocob medena isec gagadic migiannu. Odimeig cesawi lanna lein. 41 Euqa wag mede esic qatani ti of qocob maha heweceb tawen. Oodon bigna isec macas gagadic bahic qahimei qonqon qatani susul falen.
42 Odocob han dana age gihacdoc age agenadec oso cesawi lanna limei busalecdainnu qagaadoqaga bili je madi cagoin. 43 Euqa han dana 100 agena ilo Pol cahahadugia cisdon. Eunu uqa eu odi cain odowainnu cahacaden. Odimei uqa dana cunug ihoc wa cesawoqagan eundec age aquni wagnadec bitacimeig cesawi lanna loqagannu je gatiti maaden. 44 Odimei dana leih wagna culadein age hib wag qatanen fan eundec cedi mugumuga tacimeig cesawi lanna loqagannu maaden. Odocob eu odina ege oso fadalecca qee me himec wa cesawi lanna hom.

*27:1: Luk uqa “ege” haun jaqen, eunu Pol uqa Rom taun ono nuen saenna Luk uqa gami belesin eu odi fena. Age Aposel 16.10ca, 21.17ca euha feiga.

27:9: Cud Bilec Saen eu Anut Dana Cajaca Cunug Agena Silail Cagasiadennu Deel. Age Wok Pris 25.9 feiga. Saen euna eu Septemba leceb Oktoba odi fufu gagadic eu Mediterenian Macasna fulufuluen cajen. Odocob wag age macas eu alildudu beloloig.

27:19: Cabi ceteteh eu wagna haluna hewen. Eunu wag eu cabi ceteteh macas dunuhna didocob wag eu mahuc qee nuel.