13
Age wawaga meleec cotogailnu nalunuga meigale
Age wawaga meleec cotogailnu nalunuga megina, odocob age gaid odi agenu nalunuga meigale. Dana cele agena jona hoqagan eu age cesuladecnu cain dahiniga celeiaun. Age dogina, wele dana leih odi odimeig ensel leih agena jona ehadi ehi limeig cofadein. Eu age eu ensel ec qee doloin. Eu age cisdoin eu dana bahic ein.
Age cotogail age wawaga meleenanu gihacdoc jona bilegina eu agenu cisdoiga, ageha osoben gihacdoc jona biluqunawe ec cisdu cesuladeiga. Odocob dana dewenegana culumen gahidogina eundecnu ha cisdoiga, ageha osoben ege dewenigena culumen gahidoqonawe ec cisdoiga.
Caja danaca ocobocobec eu me bahic. Age cunugnu ocobocobec kobol eu ceteh soidocca bahic Anut amegna nijigian. Qee fifi gegehin qowain. Age dogina, hibna Anut uqa dana cajaca wal kobolna ocobocobec wagalegina euca, dana uqa osona caja cajaca nijesina euca eu age ameg me qee adigian.
Age meen qaignu amaga qoc kobol eu cain toodowain. Odocob Anut wele maden:
“Ija hina qee culihigaun.
Ija hina qee tacewihigaun,” en. (Loo 31.6)
Eunu ceteh age hewegina eunu odi cisdoiga, “Eu me bahic. Eu egenu ihoc,” odi doiga. Eunu ege wawige ihoc gagadic mumudi edi madoqale:
“Tibud ija cesultenanu. Ija qee cucuiigaun.
Dana age ija cel oso oditecnu ihoc? Qeeo!” oqale. (Buk Song 118.6-7)
Ege Jisas toodocnu cain majanige geiaun
Age agena cofadec age wele Anutna me je qasali maadoloignu cisdoiga. Age eu agena cobocnu cisdoiga. Odimeig eu agena wawaga meleec kobol toodoiga.
Jisas Kraisna kobol eu cumca qilaca, odocob saen cunugna ha eu kobol osol himec bileceb catanena. Je filfil wawaga dunuh limei wawaga falicdocob Anutna jic culuwainnu Anutna eelgec uum igec ege wawige gagadic mudinafi eu me bahic. Wawige eu ege sab jecnu loo je filfil toodoqona euna gagadic odoc qee ona. Dana cajaca kobol eu toodogina eundec oso qee cesuladena.
10 Ege Anut ihandoc cabalca. Odocob Anutna nawel tawec ihanec dana talah cuha jona cabi oloig age cabal euna sab ocwe qee. 11 Nawel tawec ihanec dana ilo uqa bulmakauca sipsipca agena golanaga umei talah eu cudun gun hamol limei silail cagasecnu ihanoloi. Euqa dool dewenega eu age jana cudun eu jobon hahagum manoloig. 12 Eunu Jisas uqaha dana cajaca uqadodoc golacna qagu madigiannu gel cebec jobon hahagum deweg tudoc culumen gahidon.* Juda agena loo je eu ihanec dana age dool cuhunuga dana cajaca age Anutnu ihanecnu ehadi hoin eu jeiga ec madena. Euqa cuhunuga age Anut Dana Cajaca Agena Silail Cagasiadecnu Deel Benna ihanadein eu age cain jowain, age jobon hahagum maneiga ec madena. Age Wok Pris 6.24-30ca, 16.27ca feiga. Odocob Jisasna ihanec eu Deel Ben ina ihanec uqana cudun on. Age Hibru 9.7-14 feiga. 13 Eunu egeha cudun eu jobon hahagum uqaca lecnu. Odimeb uqa majag don odi egeha majanige gigian. Dana leih age Kristen age Juda agena loo je toodu odocnu madein eu odi fena. (Age but 9 feiga. Euqa dana uqa Hibru jaqec je jaqen eu Kristen age Juda agena jobon dunuhna cain biluwain ec madena. Ege loo je eu toodu odifeb ege Anut amegna cataniec bileqan eunu cain cisdowain ec madena. Age Kraisna cabi oc euna himec age Anut amegna cataniec bilegina. Eunu age Krais gami bileginaca, age uqa toodoginaca eunu cain majanaga adeiaun. 14 Ege doqona, maha ina taun ben oso ege gaid bilecnu qee nijina. Euqa ege taun ben hibna caligian eu gulucdocnu odoqona. 15 Eunu ege Jisas ijanna Anut binan suluqale. Odocob binan sulec eu ihanec cinigwe uqa gaidgaid utuqale. Mele, ege conigena uqa ijan qasali mamadi uqa binan suluqale. 16 Odimeig age dana cajaca kobol mena meme madecnu cain dahiniga celeiaun. Odocob ceteh ageca bilina eu dana cetehca qee eundec cesuladeiga. Anut uqa ihanec eundec geh bahic gale dona.
17 Agena cofadec eu age age cesuladec cabi hewegina. Odocob eu age gaid age dolonoga cofaadi bilegina. Odimeig hibna eu age cabi cunug odoginanu Anut qasali madoqagan. Eunu age eu agena je toodudu eu age bisalu bileiga. Age odi odifeig eu age ceelecca cabi oqagan, wawagaha qee culumen adeiaun. Eu age age cofadecnu wawaga culumen adeccafi eu age cesuladecnu ihocca qee.
Age Anut cesulgecnu inondoiga
18 Age Anut ege cesulgigiannu inondoiga. Ege wawige Anut amegna eu tutuc himec ec tebandoqona. Egena cisdoc silec eu camasac. Odocob ege gaid saen cunug tutuc himec cobocnu wawige nijia. 19 Age Anut ija cesultigiannu inondoiga ecnu niniadigina. Eunu ija ageca mahuc ceselecnu ihoc.
20-21 Anut uqa egena Tibud Jisas tulidocob cal mecnadec ceseli cajen. Jisas uqa sipsip cofadec dana me bahic. Uqa ihanec cabi gug eu golacna bal cehec je bilec catanec eu hedon. Odocob Anut malol bilec gug uqa uqana gale doc toodoqagannu ceteteh meme ihocna himec age adeiale. Odocob ege cunug gemona kobol me uqadodoc gale dona, odi camasac mudecnu ihoc Jisas Krais umna. Saen cunugna Krais uqa ijan benca bileceb cataneiale. Mele.
Cit qoc je
22 O wawige meleec cotiel, ija je gagadic maadigina age wawaga gagadic mudec je i maadiginanu dahiniga meigale ec niniadigina. Je jaqiadigina i eu gohic cinigwe. 23 Age docnu ihoc, ege cabi cotige Timoti gihacdoc jonadec felacudein uqa haun gihacdoc jona qee bilel. Uqa mahuc bahic ijaca calecebfi eu ele osoben li age meciadewan.
24 Age egena feele ec agena cofadec cunug adeigale. Odocob egena feele ec Anutna dana cajaca qagoc cunugha adeigale. Anutna dana cajaca ititom age Italidec feele adec suldoiga ec maadeigale.
25 Anutna eelgec uum igec age cunugca biliale.

*13:12: Juda agena loo je eu ihanec dana age dool cuhunuga dana cajaca age Anutnu ihanecnu ehadi hoin eu jeiga ec madena. Euqa cuhunuga age Anut Dana Cajaca Agena Silail Cagasiadecnu Deel Benna ihanadein eu age cain jowain, age jobon hahagum maneiga ec madena. Age Wok Pris 6.24-30ca, 16.27ca feiga. Odocob Jisasna ihanec eu Deel Ben ina ihanec uqana cudun on. Age Hibru 9.7-14 feiga.

13:13: Dana leih age Kristen age Juda agena loo je toodu odocnu madein eu odi fena. (Age but 9 feiga. Euqa dana uqa Hibru jaqec je jaqen eu Kristen age Juda agena jobon dunuhna cain biluwain ec madena. Ege loo je eu toodu odifeb ege Anut amegna cataniec bileqan eunu cain cisdowain ec madena. Age Kraisna cabi oc euna himec age Anut amegna cataniec bilegina. Eunu age Krais gami bileginaca, age uqa toodoginaca eunu cain majanaga adeiaun.