1 Age gemona han cadecca gonagona mecca eu cunug anadec hona? Wawaga cajecnu kobol eu ageca bilina. Odi eu age dewenega cunug eu gemona hannu belicanagaca kobol eu himec han cadecca gonagona mecca odocob calena. 2 Age cetetehnu gale adena qa age qee owain. Eunu age qagaadegina. Age cetetehnu amaga qona qa age cedecnu ihoc qee eunu age gonagona mimeig cadegina. Age gale adena eu qee ogina eu eetanu? Age eunu Anut qee sisildogina. 3 Agena cisdoc eu tutuc qee. Odocob ceteteh agedodoc agena belicanagana odoqagannu sisildogina. Eunu saen age sisildogina eu age qee ogina. 4 Age dana cajaca ocobocobimeig cagogina cinigwe. Dana uqa mahana kobol gawifei uqa Anutnu cad mec kobol odona. Age eunu qee doginafo? Eunu dana uqa mahana kobolnu gawenafi uqa Anutna cad caligian. 5 Anutna jaqec je edi madena, “Kis i Anut ege dunuhna men bilina eu Anut uqa uqadodocnu biligiannu gagadic cahacdona,” ena.*Je i edec Buk Baibel cunugna oso qee nijel. Odocob Grik jena gug eu camasac qee. Jems eu ceteh cunug ifanadec saenna kis cebac Anut uqa fuldutocob dana cebac men eunu madenafo (age Jenesis 2.7 feiga, qee uqa Kis Gunnu madenafo ege qee doqona. Uqa Kis Gunnu madenafi uqa cudun ina dih eunu madena. Age jaqec je i eu gauc himec ec cisdoginafo? 6 Euqa Anut eelgec me geh bahic uum igena. Eunu Anutna jaqec je madena:

7 Eunu age lal qu jogoimeig Anut bisalu bileigale. Age Seten feedoigale. Odocob uqa age culadimei busaligian. 8 Anut cemenug hoiga. Odocob uqa age cemenega hugian. Age silail dana! Ebenega cuseiga. Dana wawaga lecisca age wawaga soidoigale. 9 Age wawaga tucieceb gehca qajeigale. Age qada qajeigale. Dana age qila asalegina eu age asalec culimeig qajeigale. Dana age qila celeboegina age dumanaga culiale. 10 Age Tibud amegna agedodoc lal qu jogoeigale. Age eu odi odifeig Tibud uqa age suladeceb cajoqagan.

11 O cotiel, agenu je me qee cain madocobmadocobowain. Dana cotig oso cotignu je me qee madenafi cotig gesildonafi eu uqa loo jenu je me qee madena.†Loo je osonu Jems cisdon eu Wok Pris 19.18na nijia eu odi fena. Age Jems 2.8 feiga. Odocob uqa loo je gesildona. Euqa hina loo je gesildogonafi hina loo je toodu odoc dana qee qa hina loo je gesildoc dana. 12 Eu loo je igec dana osol bilia. Euha gesilgec dana osol bilia. Eu Anut himec. Uqa himec cahahagecnuca fadalgecnuca ihoc. Eunu hina cel dana eu hina utuqain gesildogona?

13 Age dana leih edi madegina, “Qilafo, uqadecfo ege taun ben osona belimeb cabi gel osolna ihoc bileqan. Odimeb ege idadimeb meen qaig geh bahic oqan,” egina eu age qila ija dah miteiga. 14 Agenu uqadec eeta oso caligian eu age qee dogina. Age hut cinigwe eu qila himec calimei ficagonawe. 15 Age i edi madoub, “Tibud uqa cois ecebfi ege cebac bilimeb cabi ifo, cabi osofo odeqan,” oub. 16 Ageqa agena me bilec saenna culaec je madegina. Agena culaec je eu me qee bahic. 17 Age cisdu cuhadoiga. Dana kobol me odocnu dona qa uqa qee odona dana eu uqa silail mena.