Me Je i
Jon Jaqen
Aqunec Je
Me je i cel dana bahic jaqen eu je oso qee nijel. Euqa Jon uqa me je i jaqen. Malogom oso Jisas uqa culaug ona eu Jon. (Age 13.23, 19.26, 20.2, 21.7, 20, 24 feiga.)
Me je ina Jon uqa Anutna Je cebac bileceb catanena eu Jisas, odocob Cebac Bilec Catanec Je eu dana deweg ibuldumei ege gemona jo cehi bilen ec jaqen (1.14). Jon uqa dana cajaca age Jisas uqa Anut Melah eunu dumeig uqanu wawaga meleigiannu gale dona. Odimei Jisas uqa Anutna Krais uqa Anutna dana caja cahahaadecnu wele nesili ehuden eunuha dana cajaca wawaga meleigiannu gale dona. Dana cajaca age Jisasnu wawaga meleeceb uqa ijanna cebac bilec oqagan ec jaqen. (Age 20.31 feiga.)
Jon uqa Anutna Je cebac bileceb catanena eu Jisas ec casac jaqimei Jisas uqa kobolkobol odoc filfil odon eunu jaqen. Kobolkobol odon eu Jisas uqa Anut Melah, uqa Anutna Krais eunu ihacena. Odimei Jon uqa Jisas kobolkobol odon eu agena gugnu sildiaden. Odimei saen euna dana cajaca leih age Jisasnu wawaga meleeceb toodoin, euqa leih Jisasnu wawaga qee meleel ec jaqen.
Jon uqa dac 13-17na Jisasna cad age uqa hewoqaga bili odoin witic euna Jisas uqana malogomca sab jejegin Jisas cesuladecnu je maaden ec jaqen. Jaqec je hedocob Jon uqa age Jisas hewudi gesildumeig na babalecna tuitu qocobil cal men, odimei Jisas ceseli cajimei uqana malogomnu camasac calen ec jaqen.
Me je ina je leih eu ben nijia, eu odi. Je oso eu cebac bilec (1.4). Jisas uqa cebac bilec dana cajaca adena (10.28), odimei cebac bilec eu Jisas (14.6). Je oso eu fulacdoc (1.4). Dana cajaca agena fulacdoc eu Jisas (8.12). Je oso eu je qasali madec (1.7). Wa Joadec Jon uqa Jisasnu je qasali maaden (1.6-9). Je oso eu wawaga meleec (1.7, 20.31). Je oso eu mele gug. Mele gug eu Jisas (14.6). Je oso eu Anut Melah. Anut Melah eu Jisas (1.49), odocob Jisas uqa gaid Anut “Mei,” en.
Je Dunuhnu Dado Mec
1. Aqunec je (1.1-18)
2. Jisas uqana cabi oc sanan men (1.19-51)
A. Wa Joadec Jon, Jisas aqunidoc, uqana cabi on (1.19-34)
B. Jisas malogom 4-pela ceden (1.35-51)
3. Jisas dana cajaca amagana cabi on (dac 2-11)
A. Uqa wa odocob wain ibuldon (2.1-11)
B. Uqa tempel jo soidon (2.12-25)
C. Uqa Nikodimasca je madesin (3.1-21)
D. Wa Joadec Jon Jisasnu qasali madeceb malogom age Jisasca belein (3.22-4.3)
E. Jisas Sameria hatuna cocobon Sameriadec cajaca je madesin (4.4-42)
F. Jisas uqa kingna cabi dana oso eu melah me muden (4.43-54)
G. Uqa Jerusalem Juda agena sab ben jecnu ono nuen (dac 5)
H. Uqa dana 5,000 sab adimei cebac bilecnu bred eunu je iwaladen (dac 6)
I. Uqa Jerusalem talah jo sab jec benna ono nuen (dac 7-8)
J. Uqa dana ameg galuc mec calen eu me muden (dac 9)
K. Uqa sipsip cofadec me bahic galolo je maaden (10.1-21)
L. Uqa Jerusalem wele tempel eeldoin deel eunu cisdocnu ceguleinna ono Juda danaca fee dadanein (10.22-39)
M. Uqa Peria hatuna cabi on (10.40-42)
N. Uqa Lasaras cal mecnadec tulidocob cajen (dac 11)
4. Deel 6-pela hedocob Pasowa Sab Jec Ben Deel caligiannu ninijen Jisas uqa age qocobil cal migiannu Jerusalem ono nuen (dac 12-19)
A. Maria uqa mool dedemanca Jisas jaihna basecdu qon (12.1-11)
B. Jisas uqa kingwe Jerusalem dunuh len (12.12-19)
C. Grik dana leih age Jisas walein (12.20-36)
D. Juda dana cajaca mati bahic age Jisasnu wawaga qee meleel (12.37-50)
E. Jisas uqa uqana malogom isi culadigen ec maaden (dac 13-17)
1. Jisas Pasowa sab jecna uqana malogom je maaden (dac 13-14)
2. Jisas Getsemani Cabina nunuen uqana malogom je maaden (dac 15-16)
3. Jisas uqadodocnuca, uqana malogomnuca, dana cajaca uqanu wawaga meleigian eu cunugnuca Anut inondon (dac 17)
F. Judas uqa Jisas cad ebenegana mudeceb age Jisas hewudein (18.1-12)
G. Age Jisas gesildoin (18.13-19.15)
H. Age Jisas na babalecna tuitu qocobil cal meceb uqa heel cisein (19.16-42)
5. Jisas ceseli cajen (20.1-29)
6. Buk i uqana gug (20.30-31)
7. Cit qoc je (dac 21)
1
Cebac bilecnu je
1 Wele gug qocna sao mahaca qee ifanecna je eu wele bilen. Je eu uqa Anutca bilen. Je eu Anut ijom. 2 Gug qocna bahic je eu uqa Anutca bilen. 3 Je euna dih Anut ceteteh cunug ifanen. Ceteh oso uqaca qee Anut ifanen eu qee bilel. 4 Je eu uqa cebac bilecnu gug. Cebac bilec eu dananu fulacdoc ileten.
5 Fulacdoc eu tuna fulacdona. Odocob tu eu fulacdoc cafuli qelecwe qee. 6 Anut uqa dana oso suldocob hon, ijan eu Jon. 7 Uqa dana cajaca me je qasali maadecnu hon. Uqa fulacdocnu qasali maadeceb uqa umna fulacdoc eunu wawaga meleigiannu hon. 8 Dana eu uqadodoc fulacdoc qee, uqa fulacdocnu qasali maadecnu hon. 9 Fulacdoc mele bahic dana cajaca cunug wawaga fulacadena eu mahana cali hugia odon.
10 Aria, je eu mahana bilen. Anut uqa je euna maha ifanen qa dana cajaca cunug mahana bilein age uqanu qee doloin. 11 Uqa uqana gunna cali hon euqa uqana eundec age uqa qee oidelein. 12 Euqa leih age uqa oidein age uqa ijannu wawaga meleen. Eunu uqa Anutna mel ibuldocnu gagadic odoc aden. 13 Age Anutna mel cali hoin eu dana gale adecnafo, age dewenega gale docnafo anagail memegail golanagana qee basadelein euqa Anut uqadih odocna cali hoin.
14 Je eu dana deweg ibuldumei ege gemona jo cehi bilen. Uqa Anut amegna me bilecca mele bilecca am bec. Ege uqana kobolkobol fom. Kobolkobol eu Memige Anut Melah osol uqana, Memige Anut uqa suldocob nen.
15 Jon uqa uqanu je qasali madi utaen, “Ija qee cali hoc bibiligin uqa wele bilen. Eunu dana inu ija mamadi maadem, ‘Uqa ija hib tooti hona eu ija wooltec,’ adem,” en.
16-17 Anut uqa loo je Moses umna igen qa Anut uqa amegna me bilecca mele bilecca eu Jisas Krais umna igen. Eunu uqana Anut amegna me bilec am bec eunadec ege cunug eelgen. Eeldoc me bahic eu filfil igen. 18 Dana oso Anut qee fel. Anut Melah osol, eu uqaha Anut, uqa Memige Anut wowogonu bilina, uqa Anutnu mageceb dom.
Wa Joadec Jonna je
(Matju 3.1-12; Mak 1.7-8; Luk 3.15-17)
19 Jon uqana qasali maadec eu odi. Juda agena ilo dana Jerusalemdec age dana leih ihanec danaca Liwaica suladecebil Jonca li sisildu madoin, “Hina in?” doin.
20 Odocobil Jon je qee jahunadel qa uqa camasac qasali maaden, “Anutna Krais*Krais eu dana Anut uqana dana caja cahahaadecnu wele nesili ehuden. eu ija qee,” aden.
21 Odocob age sisildoin, “Odiqa eeta odeia? Hina Ilaijafo?” doin.
Odocobil uqa jejenega hewi maaden, “Qeeo, ija Ilaija qee,” aden.
Odocob age sisildoin, “Hina je hahun madec dananu ege sumuduquna eufo?” doin.
Uqaqa jejenega hewi maaden, “Eu qee,” aden.
22 Odocob age haun sisildoin, “Odi qeefi hina in bahic magaga. Dana age sulgecebil hoqa eu hinadodocnu cel je magecem ege ageca ceseli li maadecnu madoqona,” doin.
23 Odocobil Jon jejenega hewi maaden:
“Ija jejeg oso uqa wadauna†Age je Matju 3.1na nijia eu feiga. bibili utai maadena,
‘Tibudna jic tutuc mudeiga!’ adena.
Eu odi weleca je hahun madec dana Aisaia uqa maden,” aden. (Aisaia 40.3)
24 Aria, dana age Jon sisildoin eu Farisi suladecebil hoin. 25 Odocob age Jon sisildoin, “Hina Anutna Krais qeefi, hina Ilaijaha qeefi, hina je hahun madec dana euha qeefi eetanu dana cajaca wa joadagana?” doin.
26 Odocob Jon jejenega hewi maaden, “Ija wana wa joadigina qa age gemona dana oso bilia eu age qee dogina. 27 Eu uqa hib tooti hugian. Ija uqana cabi dana me bahic ihoc qee, ija uqa jaih tacec cufalitocwe qee,” aden.
28 Ceteteh i cunug Betani jobon Jodan wa naha ono isecna calen. Ono Jon dana cajaca wa jojoaadien.
Jisas uqa Anutna Sipsip Nag
29 Deel osona Jon uqa Jisas uqaca hohon fimei maaden, “Feiga, Anutna Sipsip Nag ihen. Uqa dana cajaca cunug mahana bilegina agena silail cagasiadecnu hon. 30 Dana inu ija wele maadem, ‘Ija qee cali hocna uqa bilen. Eunu dana oso ija hib tooti hona eu ija wooltec,’ adem. 31 Ijadodoc uqanu bahic qee dolom qa Isrel dana cajaca uqanu doqagannu ija wa jojoaadiem hom,” aden.
32 Odimei Jon uqa je iha qasali maaden, “Ija Kis Gun cuhudid cinigwe sao jobonnadec ni uqaca bibilen fem. 33 Ijadodoc uqanu qee dolom qa Anut ija dana cajaca wana wa joadecnu sulteceb hom eu uqa maten, ‘Hina Kis Gun nimei dana osoca bibileb fimeg eu uqa Kis Gunna wa joadigian,’ ten. 34 Eu oodon femnu dana i uqa Anut Melah eunu wele qasali maadem,” aden.
Jisas malogom 4-pela ceden
35 Deel osona Jon uqa uqana malogom lecis gami tawein. 36 Tataweig uqa Jisas cocobi nunuen fimei maalen, “Fesia, Anutna Sipsip Nag ihen!” alen.
37 Odocob malogom lecis eu ale odi maaleceb dosin eunu ale Jisas toodocobil belein. 38 Bebeleig Jisas qaalimei eu ale toododosin fecialimei sisilalen, “Eeta walesina?” alen.
Odocob ale Jisas jejeg hewi madosin, “Rabai, (uqana gug eu ‘Iwaladec’) hina cel jona nijigina?” dosin.
39 Odocobil maalen, “Belimeb fesiale,” alen. Odocob ale uqaca belimeig uqa bibilen fimesi eu wesu 4 kilok odinu deel eu uqaca bilein.
40 Dana lecis ale Jon uqa Jisasnu maalen dah mimesi Jisas toodosin eundec oso eu Andru, uqa Saimon Pita waliag. 41 Odocob uqa Jisas cuculdi limei uqa waliag Saimon gulucdumei madon, “Ege wele Mesaia gulucdoqan,” don. (“Mesaia” uqana gug eu Anutna Krais uqa Anutna dana caja cahahaadecnu wele nesili ehuden.) 42 Odimei uqa ehudeceb Jisasca hosin.
Odocobil Jisas uqa Pita mecidudu madon, “Hina ijain Saimon, Jon melah. Hibna age Kifas hoqagan,” don. (“Kifas” eu Aram jena. Age Grik jena falicdocobilfi eu “Pita.”)‡“Kifas Pitaca” alena gug eu “meen.”
Jisas uqa Filip Natanielca utaaleceb toodosin
43 Deel osona Jisas Galili hatu ono nuigia bili caji nuen. Nuimei uqa Filip gulucdumei madon, “Hina ija tootaga!” don. 44 Filip uqa Betsaidadec, eu Andru Pitaca alena jobondec. 45 Odocob Filip uqa Nataniel gulucdumei madon, “Moses uqa loo jenaca je hahun madec dana ageca dana oso cali hugiannu jaqein eu ege gulucdoqan. Uqa Jisas Nasaretdec, Josef melah,” don.
46 Odocob Nataniel sisildon, “Cel ceteh me oso Nasaretdec hugianfo?” don.
Odocob Filip madon, “Ono limeu fegan,” don.
47 Odocob Jisas uqa Nataniel uqaca hohon fimei uqanu maaden, “Feiga, eu dana Isreldec bahic, uhulec oso uqa waugna qee nijel!” aden.
48 Odocob Nataniel uqa Jisas sisildu madon, “Hina adi ija dumaninu dumeg madagana?” don.
Odocob Jisas jejeg hewi madon, “Filip qee li mahec ninijen hina na dan saluna bibilegen mecihem,” don.
49 Odocob Nataniel uqa Jisas jejeg hewi madon, “O Meca, hina Anut Melah! Hina Isrel agena king!” don.
50 Odocob Jisas madon, “Hina na dan saluna bibilegen mecihem ec mahigannu wawin meleenafo? Hina isi ceteh qila fagana eu wooldoc ceteteh caloqagan eu fegan!” don. 51 Odi madumei maaden, “Ija je mele maadigina, age sao jobon hudec tataweb Anutna ensel age Dana Melahca toni tobi eebil foqagan,” aden.