Me Je i
Matju Jaqen
Aqunec Je
Me je i cel dana bahic jaqen eu je oso qee nijel. Euqa Kristen tamanec cofadec dana age wele Jisas Krais mahana cobon saennadec li saen qila nijia eu Matju, uqa aposel 12-pela eundec oso, me je i jaqen ec madein. Matju i uqa takis cedec dana, uqa uqana cabi culimei Jisas toodon. (Matju 9.9-13 feiga.) Makna me jenaca, Lukna me jenaca ale Matju ijan fil qosin, eu Liwai.
Me je i Matju jaqen eu Jisas mahana bilen saenna ceteh calen eunu saadena. Eu Jisas Kraisnu me je 4-pela eundec oso. Oso eu Mak jaqen, oso eu Luk jaqen, oso eu Jon jaqen. Me je i Maria uqa Jisas basecdon saenna sanan mimei leceb age Jisas qocobil cal mimei ceseli cajimei uqana malogom culadimei sao jobon ten eunu saadena.
Matju uqa ceteh ben oso ihacdocnu gale don. Wele Anut uqa Isrel dana cajaca hahun je oso maaden. Uqa dana oso uqa Anutna dana cajaca cahahaadecnu suldugian ec maden. Dana i uqa ijan eu Hibru jena eu Mesaia, eu Grik jena eu Krais. Matju uqa Juda dana cajaca Jisas eu agena Krais eunu ihacadecnu gale ben dona. Me je ina je mati bahic odi odona, eu odi: 1.22-23, 4.14-16, 8.17, 12.17-21, 13.35, 27.9-10. Me je ina je mati ha nijia eu Jisas uqa uqana odocna Anut hahun je wele maden eu ihoc lena, eu odi: 2.4-6, 2.14-15, 2.23, 21.2-5, 21.16, 26.24, 26.31, 26.54.
Matju uqa ceteh oso ha ihacdocnu gale don, eu Jisas uqa Juda dana cajaca agena king. Wele bahic Isrel agena king ben oso bilen, uqa ijan eu Dewid. Eunu Matju uqa Jisas eu Dewid Melah ec je mati maden, eu odi: 1.1, 1.6, 1.17, 1.20, 9.27, 12.3, 12.23, 15.22, 20.30, 21.9, 21.15, 22.42-45.
Euqa Matju uqa Jisas eu Juda agena Kraisca, agena kingca himec ec qee madel. Jisas uqa dana cajaca cunug agena Kraisca, agena kingca echa maden. Galili eu Juda dana qee eundec agena hatu. Odimei Jisas uqa Galili hatuna uqana cabi sanan men, odimei uqa Galili hatuna uqana cabi cit qon. (Matju 9.1-2, 28.7 feiga.) Matju himec uqa Jisas eu je hahun madec dana Nasaretdec ec maden. (Matju 2.23 feiga.) Nasaret jobon eu Galili hatu ono nijen. Odimei Matju uqana me jena Jisas uqa Juda dana cajaca age Jisas hibemdocobilfi Anut uqa uqana cul eu Juda dana qee eundec adigian ec ulauladen, eu 21.43. Odimei Jisas uqa Anutna culnu me je i mahamaha cunug qasali maadecebil ihoc lili ninijeb dana cajaca cunug doqagan ec maden, eu 24.14. Odimei Jisas uqa uqana malogom age mahamaha cunug beladimeig dana cajaca ijana malogom madeiga ec maden, eu 28.19. Je i cunug eu Matju uqana me jena himec nijia.
Matjuna buk naha 5-pelana Jisas iwaladec je cecelac maden eu nijia. Je cecelac aqunec eu dac 5-7na nijia, je eu Jisas aluh osona maden. Je ina Jisas uqa dana cajaca age Anutna bilegina age adi cobocnu dado maden. Je cecelac lecisdoc eu dac 10na nijia. Je ina Jisas uqa uqana malogom 12-pela age dana cajaca uqanu me je qasali maadecnu suladeceb belein. Jisas uqa malogom qasali mamadeig adi odocnu, adi cobocnu ec maaden. Je cecelac cijeddoc eu dac 13na nijia. Je ina Jisas uqa galolo jena Anutna cul eu cel ceteh dana cajaca sildiaden. Je cecelac 4-peladoc eu dac 18na nijia. Je ina Jisas uqa dana cajaca age adi uqana malogom bilecnu maaden. Je cecelac 5-peladoc eu dac 24-25na nijia. Je ina Jisas uqa deel cit qocna cel ceteh caligiannu maaden.
Je Dunuhnu Dado Mec
1. Jisas uqa calimei mel men (dac 1-2)
A. Jisas uqana sihul ijanaga (1.1-17)
B. Maria uqa Jisas basen (1.18-2.12)
C. Jisas uqa Isip hatuna bilen (2.13-23)
2. Jisas uqa uqana cabi oc sanan men (3.1-4.11)
A. Wa Joadec Jon uqa Jisas aqunidon (3.1-12)
B. Jon uqa Jisas wa jouden (3.13-17)
C. Seten uqa Jisas temdu fen (4.1-11)
3. Jisas uqa Galili hatuna uqana cabi on (4.12-14-12)
A. Uqana cabi Galili ono sanan men (4.12-25)
B. Uqa aluh ohis dana cajaca me je maaden (dac 5-7)
C. Uqa kobolkobol odoc filfil odon (dac 8-9)
D. Uqa aposel 12-pela agena cabi oc aden (dac 10)
E. Uqa Galili hatuna cocobi li cabi on (dac 11-12)
F. Uqa sao cul jobonnu galolo je filfil maden (dac 13)
G. Herod uqa Jisasnu uqa Wa Joadec Jon ec cisdon (14.1-12)
4. Jisas uqa Galili hatu culdimei cudun filfil nuen (14.13-17.20)
A. Uqa Galili wa gad cagoc leti uqa cudun ono isec nuen (14.13-15.20)
B. Uqa Fonisia hatuna nuen (15.21-28)
C. Uqa Dekapolis hatuna nuen (15.29-16.12)
D. Uqa Sisaria Filipai taunna nuen (16.13-17.20)
5. Jisas uqa Galili hatuna uqana cabi hedon (17.22-18.35)
A. Jisas uqa cal mimei ceseli cajigian ec maden (17.22-23)
B. Tempel cabinu takis helec (17.24-27)
C. Sao cul jobonnu je (dac 18)
6. Jisas uqa Judia hatunaca Peria hatunaca cabi on (dac 19-20)
A. Jisas uqa ocobocobec kobol cagocnu iwaladen (19.1-12)
B. Jisas uqa mel simnu iwaladen (19.13-15)
C. Dana haun cehewanca uqa Jisasca hocob madesin (19.16-30)
D. Wain cabi ocnu galolo je (20.1-16)
E. Jisas uqa cal mimei ceseli cajigian ec haun maden (20.17-19)
F. Jems Jonca anala uqa Jisas je madugiannu bilen (20.20-28)
G. Jisas uqa Jeriko ono dana amala galuc mec lecis me malen (20.29-34)
7. Deel 6-pela hedocob Pasowa Sab Jec Ben Deel caligiannu ninijen Jisas uqa age qocobil cal migiannu Jerusalem ono nuen (dac 21-27)
A. Jisas uqa kingwe Jerusalem dunuh len (21.1-11)
B. Jisas uqa tempel jo soidon (21.12-17)
C. Jisas uqa Juda dana benben gami fee dadani hedoin (21.18-23.39)
D. Jisas uqa Oliw Aluhna cit qoc saennu maden (dac 24-25)
E. Juda dana benben age adi Jisas qocnu togodoin (26.1-6)
F. Caja oso Jisas ilona mool dedeman me bahic joiden (26.6-13)
G. Age Jisas hewudi gesildumeig na babalecna tuitu qocobil cal men (26.14-27.66)
8. Jisas ceseli cajimei uqana malogom age cabi oqagannu maaden (dac 28)
1
Jisas Krais uqana sihul ijanaga
(Luk 3.23-38)
1 Jaqec je i Jisas Krais uqana sihul ijanaganu je. Jisas uqa Dewid sihulnadec, odocob Dewid uqa Ebraham sihulnadec.
2 Ebraham uqa Aisak memeg.
Odocob Aisak uqa Jekob memeg.
Odocob Jekob uqa Juda waliagulca memega.*Judaca waliagulca age Isrel sihunugail 12-pela jajanagail.
3 Odocob Juda uqa Peres Seraca memela. Ale anala eu Tema.
Odocob Peres uqa Hesron memeg.
Odocob Hesron uqa Ram memeg.
4 Odocob Ram uqa Aminadab memeg.
Odocob Aminadab uqa Nason memeg.
Odocob Nason uqa Salmon memeg.
5 Odocob Salmon uqa Boas memeg. Uqa anag eu Rehab.
Odocob Boas uqa Obed memeg. Uqa anag eu Rut.
Odocob Obed uqa Jesi memeg.
6 Odocob Jesi uqa King Dewid memeg.
Odocob Dewid uqa Solomon memeg. Solomon anag wele eu uqa Uria aideg.†Caja i cunug age ijanagail lista ina nijen eu age Isrel sihuldec qee, age sihul celedec. Age Isrel dana oin. Tema Rehabca lecis i ale Kenan sihuldec, odocob Rut uqa Moab sihuldec. Batseba, uqa Solomon anag, uqa himec eu Isrel caja. Euqa hahawan uqa Uria aideg, odocob Uria uqa Hit dana. Lukna lista uqa caja celedec inu qee madel. Age Luk 3.23-38 feiga.
7 Odocob Solomon uqa Riaboam memeg.
Odocob Riaboam uqa Abaisa memeg.
Odocob Abaisa uqa Esa memeg.
8 Odocob Esa uqa Jehosafat memeg.
Odocob Jehosafat uqa Joram memeg.
Odocob Joram uqa Usia memeg.
9 Odocob Usia uqa Jotam memeg.
Odocob Jotam uqa Ehas memeg.
Odocob Ehas uqa Hesekias memeg.
10 Odocob Hesekias uqa Manasa memeg.
Odocob Manasa uqa Emos memeg.
Odocob Emos uqa Josaia memeg.
11 Odocob Josaia uqa Jekonaia waliagulca memega. Saen euna Isrel dana cajaca age Babilon ono belimeig gihacdoc bilein.
12 Age Babilon ono gihacdoc bibileig
Jekonaia uqa Sialtiel memeg.
Odocob Sialtiel uqa Serababel memeg.
13 Odocob Serababel uqa Abiut memeg.
Odocob Abiut uqa Elaiakim memeg.
Odocob Elaiakim uqa Eso memeg.
14 Odocob Eso uqa Sedok memeg.
Odocob Sedok uqa Ekim memeg.
Odocob Ekim uqa Elaiat memeg.
15 Odocob Elaiat uqa Eleasa memeg.
Odocob Eleasa uqa Matan memeg.
Odocob Matan uqa Jekob memeg.
16 Odocob Jekob uqa Josef memeg.
Odocob Josef uqa Maria gemug. Odocob Maria uqa Jisas basen, eu uqa Krais‡Krais eu dana Anut uqana dana caja cahahaadecnu wele nesili ehuden. egina.
17 Eunu sihul cunug eu Ebrahamnadec leceb Dewid calen eu sihul 14. Odocob sihul cunug eu Dewidnadec leceb Isrel dana cajaca age Babilon ono belimeig gihacdoc bilein saenna calen eu sihul 14. Odocob sihul cunug eu Isrel age Babilon ono gihacdoc bilein saennadec leceb Krais calen euha sihul 14.
Maria uqa Jisas Krais basen
(Luk 2.1-7)
18 Jisas cali honnu je eu odi nijia. Jisas anag Maria uqa Josef col codoc bibili uqa qee ocna Kis Gun odocna waugca men. 19 Uqana dana, Josef, uqa Anut amegna tutuc coboloi. Odimei uqa Maria waugca ec dumei uqa culdigen ec cisdon. Euqa uqa Marianu cewudec je uqa dewegna cain hoiaunnu naha jahuni culdigen ec cisdon. 20 Odi cisdudu cocobon Tibudna ensel Josef witic us ninijen bebelecna camas mimei madon, “O Josef, hina Dewid sihulnadec, hina aiden Maria ocnu cain cucuiagaun. Faga, uqa melca eu Kis Gunnadec. 21 Uqa mel baseceb uqa uqana dana cajaca agena silailnu fadalowainnu cahahaadigian, eunu hina uqa ijan Jisas§Hibru jena ijan Jisas eu hutan odi, “Jehowa sus.” Uqana gug eu “Tibud cahahaadena.” Ijan Jisas eu Grik jenadec. Eu Hibru jena age Josua ein. qogan,” don.
22 Eu Tibudna je uqa je hahun madec dana cona maden eu ihoc ligiannu ceteh eu calen. Je hahun madec dana uqa wele odi maden:
23 “Feiga, mel aid taula oso waugca mimei mel basigian.
Odocob age mel eu ijan Emanjuel qoqagan,” en. (Aisaia 7.14)
Je eu Anutna jaqec je tawena. (Ijan Emanjuel eu uqana gug eu, “Anut egeca biluquna.”)
24 Odocob Josef uqa us niji cajimei Tibudna ensel maden eu odi toodu uqana caja, Maria, ehuden. 25 Euqa Josef uqa Maria mel qee basec ninijen uqaca qee niji lesin. Mel baseceb uqa ijan Jisas qon.
*1:2: Judaca waliagulca age Isrel sihunugail 12-pela jajanagail.
†1:6: Caja i cunug age ijanagail lista ina nijen eu age Isrel sihuldec qee, age sihul celedec. Age Isrel dana oin. Tema Rehabca lecis i ale Kenan sihuldec, odocob Rut uqa Moab sihuldec. Batseba, uqa Solomon anag, uqa himec eu Isrel caja. Euqa hahawan uqa Uria aideg, odocob Uria uqa Hit dana. Lukna lista uqa caja celedec inu qee madel. Age Luk 3.23-38 feiga.
‡1:16: Krais eu dana Anut uqana dana caja cahahaadecnu wele nesili ehuden.
§1:21: Hibru jena ijan Jisas eu hutan odi, “Jehowa sus.” Uqana gug eu “Tibud cahahaadena.” Ijan Jisas eu Grik jenadec. Eu Hibru jena age Josua ein.