5
Jisas uqa aluh ohis dana cajaca je maaden
1 Jisas uqa dana cajaca mati bahic uqaca hohogin feciadimei uqa aluh osona ti bibilen uqana malogom uqaca hoin.*Jisas uqa Juda agena kobol toodu odon. Agena kobol eu Anutna jenu doc dana uqa dana cajaca iwaladecnu gale docobfi uqa bilimei je iwaladoloi. Age Matju 13.2, 24.3ca Luk 4.20ca euha feiga.
Jisas uqa madi maden, dana cajaca cunug age eeladec ocnu ihoc, en
3 “Dana age Anutnu doc dumanaga ihoc qee eunu dogina eundec saona gun cul eu agena.
Eunu age eeladecca bilegina.
4 Dana age qada qajegina eundec Anut age wahohogadigian.
Eunu age eeladecca bilegina.
5 Dana age gemanaga jocosaigca eundec mahamaha cunug eu age mugumuga oqagan.
Eunu age eeladecca bilegina.
6 Dana age tutuc odoc ihoc ligiannuca, agedodoc agena odoc tutuc migiannuca odogina eu odi sab wen adenaweca, wa gab adenaweca eundec Anut uqa cesuladeceb age ihoc oqagan.
Eunu age eeladecca bilegina.
7 Dana age cotogail walocca bibilegin feciadimeig wawaga qocob me madegina eundec age saen osona walocca bibilebil Anut feciadimei waug qocob me madigian.
Eunu age eeladecca bilegina.
8 Dana age wawaga cataniec eundec age Anut ola foqagan.
Eunu age eeladecca bilegina.
9 Dana age maul qetegina eundec age ijanaga Anut melahul oqagan.
Eunu age eeladecca bilegina.
10 Dana age tutuc odoginanu aaqati tootooadec gahidogina eundec saona gun cul eu agena.
Eunu age eeladecca bilegina,” aden.
11 “Dana mahanadec eundec age, age ijana bilegina eunu cewadimeig aaqati tootooadimeig age agenu je me qee uhulaadi madegina saen euna age eeladecca bilegina. 12 Odi bahic ha dana age je hahun madec dana wele biloloig eu aaqati tootooadoloig. Age sao jobonna ameg me bahic oqagan. Eunu age wawaga me meceb ceeli bileigale,” aden.
Age odi macas fulacdocca cinigwe
(Mak 9.50; Luk 14.34-35)
13 Jisas je haun maaden, “Age odi mahamahanu macas bilegina. Euqa macas uqana mug qah becebfi adi haun mugca migian? Macas qah bec eu ceteh osonu qee ihoc lena. Age dana lahacluhucdoqagannu helegina,” aden.
14 “Age odi mahamahanu fulacdoc bilegina. Jobon ben aluhna cehein nijia eu jahunec nijecnu qee nijel. 15 Dana age gowoc oso madacdumeig hal dunuh qee tacena qa age gowoc ohisna caqusegina. Odocobil jona bilegina eundec cunug fulacadena. 16 Dana age agena me odoc eu fimeig age Memega sao jobon bilia uqa binan suluqagannu age eu odiwe agena gowoc madacdocobil eu dana fulacadeiale,” aden.
Jisas uqa Anutna loo jenu maden
17-18 Jisas je haun maaden, “Ija mele maadigina, sao mahaca qee mudigian deel qee cali hoc ninijeb loo je jaqec naha nag osolha qee fadaleiaun. Loo je ninijeb li ceteh cunug ihoc ligian. Eunu age ijanu uqa Mosesna loo jeca je hahun madec dana agena iwaladec jeca bebesi qee mudigiannu hon odi cain cisdowain. Qeeo, ija loo jeca agena iwaladec jeca qee mudigennu qee holom qa ija loo jeca agena iwaladec jeca toodu bahic ihoc ligiannu hom. 19-20 Ija maadigina, agena tutuc odoc eu Farisica loo je iwaladecca agena tutuc odoc qee wooldocobfi ageha saona gun culna qee lowain. Eunu dana oso loo je nag odi besimei dana odi ha toodu odocnu iwaladena eu uqanu saona gun culna age uqa caunca qee oqagan. Osoqa loo je toodu odimei dana ha odi odocnu iwaladena eu saona gun culna ijan meca ugian,” aden.
Jisas uqa je tutuc mudec kobolnu maden
(Luk 12.57-59)
21 Jisas je haun maaden, “Loo je age jajanagail wele oin eu age dogina eu odi madena:
‘Hina oso cain qocom cal meiaun.
Oso qocob cal meceb eu uqa gesilec jona ligian,’ ena ec je nijia. (Kisim Bek 20.13)
22 Ijaqa maadigina, oso uqa cotignu gemag bena eu gesilec jona ligian. Odocob oso uqa cotig cewudec je me qee madona eu Juda dana matu agena cegulec age dana eu gesildocnu ihoc. Odocob oso uqa cotig madona, ‘Hina dana gad,’ dona eu oloqanih jana lecnu ihoc,” aden.
23 “Eunu hina ihanec cabalna tatawi hinana ceteh ihandoga bibili hina cotin hina dewennu je hewihewi cobona eunu dahin fogo docobfi 24 hina casac hinana ceteteh ihanec cabalna ninijeb cuculi cotinca li je tutuc mudesiale. Odimeg hu hinana ceteteh ihandogale,” aden.
25 “Dana oso hina dewennu um qocobfi hinana cad gesilec dana ben uqa ebenna mihiaunnu, odocob gesilec dana ben uqa gesilec jona cofadec dana ebenna miheceb uqa gihacdoc jona tacihiaunnu eunu hina hinana cadca gesilec jona bebelesi jicna uqaca tanawecnu wawin nijiale. 26 Ija mele mahigina, hina meen qaig ihoc lec qee helecemfi qee bahic besihuwain,” aden.
Jisas uqa dana wal kobol odona eunu maden
27 Jisas je haun maaden, “Age jajanagail wele loo je oso oin eu ageha dogina je eu odi madena:
‘Hina dana cajaca alena sisi jelalec cain wagalagaun,’ ena ec je nijia. (Kisim Bek 20.14)
28 Ijaqa maadigina, oso dana osona caja fimei nenehegdudu hewoum ena eu uqa wele waug dunuhna cajaca wal kobol odosin,” aden.
29 “Hina amen meula isec eu silail mecnu faninhigia odocobfi selimeg helagale. Hina dewen cunug oloqanih jana helowaindainnu hina dewen naha culimeg silail qee moum eu me. 30 Hina eben meula isec eu silail mecnu faninhigia odocobfi qeti helagale. Hina dewen cunug oloqanih jana helowaindainnu hina dewen naha culimeg silail qee moum eu me,” aden.
Jisas uqa dana aideg culdina eunu maden
(Matju 19.9; Mak 10.11-12; Luk 16.18)
31 Jisas je haun maaden, “Wele age odi madoloig:
‘Oso uqa aideg culdina eu uqa sisi jelec cufalec jaqec je utigian,’ oloig ec je nijia. (Loo 24.1)
32 Ijaqa maadigina, dana oso uqa aideg dana osoca qee leceb nijelesin euqa gauc dana caja sisi jelec cagumei caja culdina eu uqa aideg odudeceb aideg wal kobol odona. Eetanu? Uqa aideg dana oso ocob ale wal kobol odosina. Odocob dana oso uqa caja gemug culden eu ona uqaha dana caja sisi jelec cufalimei wal kobol odona,” aden.
Jisas uqa age hahun je Anut amegna madegina ec eunu maden
33 Jisas je haun maaden, “Ageha age jajanagail je oso oin eu mamadegin odi doin, ‘Hina Tibud amegna ceteh oso odigen ec je cagoc oso madecemfi hina je cagoc eu cain dahin celeiaun. Hina Tibud amegna je madem eu cisdudu toodu odogale,’ madegina ec je nijia. 34 Ijaqa maadigina, Tibudca ceteh osoca amegna madigina odi cain bahic owain. Odocob sao eu Anutna bilec bahim. Eunu sao amegna madigina cain owain. 35 Odocob maha eu bahim Anut uqa jaih tatacan mudina. Eunu maha amegna madigina cain owain. Odocob Jerusalem eu King Ben uqana jobon. Eunu Jerusalem amegna madigina cain owain. 36 Hinaha hina gosin osol cas lec eu senenec ibuldocwe qee, odocob hina gosin osol senenec eu cas lec ibuldocwe qee. Eunu hina ija ilomina je tutuc madigina cain agaun. 37 Age sisiladecebil eu melefi age ‘Ese’ ec dih madeigale. Qeefi, age ‘Qee’ ec dih madeigale. Age je eu je oso tubdufeig Setenna je ec madoqagan,” aden.
Age ameg me qee wadac cain adowain
(Luk 6.29-30)
38 Jisas je haun maaden, “Age je oso odi madoloig ec doin:
‘Oso uqa cotigna ameg me qee mudecebfi
ageha uqa ameg me qee mudeigale.
Oso uqa cotigna maih me qee mudecebfi
ageha uqa maih me qee mudeigale,’ oloig ec je odi doin. (Kisim Bek 21.24; Wok Pris 24.20; Loo 19.21)
39 Ijaqa maadigina, qisol mec dana age, age dewenega me qee mudegina eundec age ameg me qee wadac cain adowain. Oso hina sihom oso naha qahecebfi hina naha ha ihacdogale. 40 Oso hinaca cetehnu tutuac cacadesi hinana siot cawalihecebfi hinana lotoc meca ha culitogale. 41 Oso uqaca nuecnu kilomita osol ihoc lecnu ninichecebfi hina kilomita leciscadoc belesiale. 42 Oso ninihecebfi eu ceteh utugale. Oso cesultagale hecebfi cain hibemdogaun, cesuldogale,” aden.
Jisas uqa age agena cad nalunuga mecnu kobol eunu maden
(Luk 6.27-28, 32-36)
43 Jisas je haun maaden, “Age je oso odi madoloig ec doin, ‘Hina hina utuqain bilec eundecnu nalunuga magale. Hinana cad sagagadagale,’ oloig ec je odi doin.‡Je i “Hina hina utuqain bilec eundecnu nalunuga magale,” oloig eu Wok Pris 19.18na nijia. Euqa je i “Hinana cad sagagadagale,” oloig eu anadec bahic hon doc dana age qee dogina. Euqa age Loo 7.2, 20.16ca, Song 139.21-22ca eu feiga. 44-47 Ijaqa maadigina, age, dana age agenu nalunuga megina eundec himec nalunuga meginafi Anut cel ameg me adigian? Takis cedec dana eu ageha odi odogina. Odocob age agena danah eundec himec feele ec maadeginafi age in wooldu odogina. Haiden ageha odi odogina. Euqa Memega Anut uqa me odoc eundecca me qee odoc eundecca cam sulduadena. Uqa tutuc coboginaca tutuc qee coboginaca osobennu waha sulduadena. Eunu age Memega sao jobon bilia eu age uqa melahul bilegina eu camas moqagannu age agena cadnu nalunuga meigale. Aaqati tootooadegina eundecnu Anut waug qugiannu inondoigale. 48 Age Memega sao jobon bilia eu uqa odoc me ihoc lec bilina. Eunu ageha agena odoc me ihoc lec bileigale,” aden.
*5:1: Jisas uqa Juda agena kobol toodu odon. Agena kobol eu Anutna jenu doc dana uqa dana cajaca iwaladecnu gale docobfi uqa bilimei je iwaladoloi. Age Matju 13.2, 24.3ca Luk 4.20ca euha feiga.
†5:2: Matju 4.23-25 (9.35ha eu Jisas uqa cabi lecis odon ec madena. Cabi oso uqa dana cajaca je iwaladen, odocob cabi oso uqa dana caja hag filfilca eu meaden. Eunu Matju dac 5-7na Jisas uqa dana cajaca Anutna culnu kobol iwaladen eunu je mati nijen ec foqona. Eu toodumei Matju dac 8-9na Jisas uqa dana caja hagca meaden eunu je mati nijen ec foqona. Matju bukna Jisas uqa je cecelac 5-pela maaden, eu dac 5-7ca, dac 10ca, dac 13ca, dac 18ca, dac 24-25ca. Je cecelac i dac 5-7na nijen, eu iwaladec je osoldoc. Jisas uqa je i aluh ohisna maaden.
‡5:43: Je i “Hina hina utuqain bilec eundecnu nalunuga magale,” oloig eu Wok Pris 19.18na nijia. Euqa je i “Hinana cad sagagadagale,” oloig eu anadec bahic hon doc dana age qee dogina. Euqa age Loo 7.2, 20.16ca, Song 139.21-22ca eu feiga.