1 Deel 6-pela hedocob Jisas uqa Pitaca, Jemsca uqa waliag Jonca cedadimei ehadi aluh ohis osona dana oso qee bilec euna ti cuhanuc bilein. 2 Ono bibilegin Jisas uqa age amagana ibuldon. Uqa ola cam odi camalen, uqana lotoc senenec bahic fulacdon. 3 Odocob uqana malogom age Moses Ilaijaca ale hocobil Jisasca togododogin feciadein. 4 Odi bibileig Pita uqa fimei Jisas madon, “O Tibud, ege ene odi bilecnu eu me bahic. Hina madecemfi ija ene talah jo cijed cehigen, oso hinana, oso Mosesna, odocob oso Ilaijana,” don.

5 Uqa je eu madudu bibilen taen oso fulacdoc bahic ni jahuladen. Taennadec jejeg oso camas mimei maden, “Ija melami nelugca, ija uqanu gale ben tena eu ihen. Age uqa jejeg toodu odoiga,” en.

6 Odocob malogom eu dah mimeig ni mahulein. Age ben bahic cucuiein. 7 Euqa Jisas ageca limei hewadi maaden, “Age cain cucuiuwain. Cajeiga,” aden. 8 Age caji meciimeig dana oso qee felein, Jisas himec fein.

9 Age aluhnadec totoni Jisas malogom cijed je gatiti maaden, “Qila feiga eu oso cain saadowain. Dana Melah cal mecnadec qee cajec ninijeb je i oso cain doiaun,” aden.

10 Odocob malogom age Jisas sisildu madoin, “Eunu eetanu loo je iwaladec age Ilaija uqa aquni hugian egina?” doin.*Loo je iwaladec dana age cit qoc saennu je oso iwaladegina. Je uqana gug eu Malakai 4.5-6. Age Ilaija uqa Krais aqunitu cali hugian ec madegina.

11 Odocobil Jisas maaden, “Ilaija uqa mele hugian, humei ceteh cogogen eu cunug tutuc mudigian. 12 Euqa ija maadigina, Ilaija uqa wele hon. Hocob dana age uqanu qee doloin. Agedodoc wawaga maden eu age uqa odudein. Eu odiwe ageha Dana Melah odudecebil deweg sogoec ben gahidugian,” aden. 13 Jisas odi saadeceb malogom age Jisas uqa wa joadec dana Jonnu mageia imeig wawaga fogo don.

14 Jisas malogom cijedca age dana cajaca mati cemenega lecebil dana oso hu Jisas jaihna isec gob cehimei madon, 15 “O Tibud, ija melami uqa titi hudec hag qona eu me qee bahic odudina. Saen matica janaca wanaca toni mahuli cosolena. Eunu hina uqanu walol heiale. 16 Ija ijana mel hina malogom cemenega mudecemin ageqa me mudecnu ihoc qee,” don.

17 Odocob Jisas uqa jejeg hewi madon, “O dana cajaca qila bilegina, age wawaga meleecca qee, age cisdoc cogogecca! Saen ganic ija ageca haun biligen? Saen ganic ija camuhulaadi cobigen? Mel eu cemeni ehudi ahoigale,” don. 18 Odi odocobil Jisas uqa buga me qee eu cahacdudu madocob uqa mel eu cuculdi nueceb mel qila i medocob bilen.

19 Odocob malogom age Jisasca jahuni humeig sisildu madoin, “Ege eetanu buga me qee eu ititacdocnu ihoc qee lel?” doin.

20-21 Odocobil maaden, “Agena wawaga meleec eu nag eunu ihoc qee lel. Ge, ija mele maadigina, age wawaga meleec eu nag bahic, eu mastet aig cinigwe tawecebfi age aluh i madoubmiqa, ‘Hina cajimeg onoca nuuga,’ doubmiqa odocob uqa conoga toodu odoub. Ceteh odoc oso odocwe qee eu qee nijiaun. Odoc cunug ihoc ligian,” aden.†Grik jaqec je hilah leihna age je oso tubdu jaqein eu odi: “Euqa Setenna eundec i cinigwe age gauc ititacadecnu qee nijel. Eu sabnu qagu bilimeig inondumeig ha odocnu nijigian,” aden.

22 Age odi ono Galili hatuna bilimeig Jisas maaden, “Dana Melah eu dana ebenegana mudecebil 23 age uqa qocobil cal migian. Odocob deel cijeddocna Anut uqa tulidocob ceseli cajigian,” aden. Uqa odi maadeceb wawaga me qee men.

24 Age haun ceselimeig Kapaneam jobon hoin. Bibilegin tempel cabinu takis helecebil cedein dana eundec osooso Pitaca limeig sisildu madoin, “Agena iwaladec uqa tempel cabinu takis qee helenafo?” doin. 25 Pita uqa maaden, “Ese, uqaha takis helena,” aden.

Hibna Pita uqana jona bibilen Jisas uqa Pita sisildu madon, “Saimon, hina eeta madagana? King mahanadec age in takis helecebil ogina? Age agena mel helecebil oginafo, qee dana maha fildec helecebil oginafo?” don. 26 Odocob Pita madon, “King mahanadec age dana maha fildec takis helecebil ogina, igina,” don. Odocob Jisas madon, “Odi mele, eunu kingna mel age takis helecnu je qee nijel. 27 Ageqa elenu gemanaga beiaunnu hina Galili wa cagoc lanna limeg cawil wana helagale. Hina odi odocom dool oso cawilna umeg didu ogale. Umeg uqa biahna meen qaig oso eu ninijeb cacawi umeg meen qaig eu tempel cabinu hinanuca ijannuca helagale,” don.