Pol Uqa Jaqec Je Oso
Failimon Jaqiton
Aqunec Je
Failimon eu dana ben oso. Uqa Kristen dana eu Kolosi taunna bilen. Uqana cabi dana bega meh oso, ijan Onisimas, uqa uqana benna ceteh heje umei uqana ben culdu busalimei taun osona nuen eu odi fena. (Eu 15 feiga.) Saen euna cabi dana bega meh uqa odi odocobfi Rom agena loo jena age qocobil cal moloi. Odocob taun euna Onisimas uqa Pol gulucdumei Kristen calen.
Saen euna Pol uqa uqana waug meleecnu gihacdoc jona bilen. Odimei uqa Failimon nui fecnu ihoc qee. Euqa uqa jaqec je i jaqimei Onisimas uti suldocob uqana ben ceseli nuen. Jaqec je ina Pol uqa Failimon Onisimasnu cain gemag beiaunnu ninidona. Euqa qila Onisimas uqa Kristen bilina eunu Failimon uqa wawaga meleec cotigwe ehudigiannu ninidona.
Je Dunuhnu Dado Mec
1. Feele adec je (1-3)
2. Pol uqa Failimon binannu sulen (4-7)
3. Pol uqa Onisimasnu ninidon (8-21)
4. Cit qoc je (22-25)
1
Ija Pol, ija Krais Jisasnu gihacdoc jona biligina. Ija ege wawige meleec cotige Timotica ele Failimon jaqihuwuna, hina elena danah bahic, hina ele cabi hijile. Ele cebinamile Apiaca, Akipasha jaqialowona. Akipas uqa han cadec dana eleca osoben Anutna han ina biluquna. Odocob ele tamanec hinana jona ceguleginanu ha jaqiadowona.
Memige Anut Jisas Krais Tibudca alena eelgec uum igecca malol bilecca adesiale.
Failimonna nalug mec waug meleecca
4-5 O cotile Failimon, ija hina Anutna dana cajaca qagoc cunugnu nalunuga maganaca, hina Jisas Tibudnu wawin meleenaca eunu dah migina. Eunu ija saen cunug ijana inondocna ija hina ijain umig ijana Anut hetaga dugina. Hina eleca osoben gabangec wawige meleena. Eunu hina eleca osoben Kraisca gabangec biluquna eunadec eeldoc me cunug ege oqona eunu du cuhadogannu inondugina. O wawile meleec cotile, hina dana cajaca qagoc cesuladecem age wawaga ceelena. Eunu hina dana cajaca ititomnu nalunuga magana eunu ija dumig wawi ben ceelen, odocob ija wawi duuec taweia.
Failimon uqa Onisimas cotigwe ceseli ugian
Hina nalunuga mec ben gug eunu ija Krais ijanna hina eeta odocnu nijia eu mahecemin odogannu ija gagadicca bilecnu ihoc mahigen. Euqa ija hina nalunin miginanu ija ninihigina. Ija Pol, ija Krais Jisasna me je hewigina, ija qila Krais Jisasnu gihacdoc jona biligina. 10 Ija hina ijana mel Onisimasnu* Grik jena ijan Onisimas uqana gug eu “cesuldoc.” ninihigen. Ija gihacdoc jona bibilig saen euna ija uqana memeg calem. 11 Wele uqa hina cesulhecnu cabi qee oloi. Qilaqa uqa hina ijaca cesullecnu cabi ona.
12 Ija qila uqa suldocomin hinaca ceseli lena. Ija wawica bahic osoben lena. 13 Ija me je maadec cabinu gihacdoc jona bibiligin Onisimas uqa hinana cudun umei cesultecnu ija cahacdocomin ijaca bilewan bili odocnu gale toub. 14 Euqa ija je gagadicca mahecemin kobol me odogan eu qee gale tena, euqa hinana gale hecna kobol me odogan eu ija gale tena. Eunu hina eunu cois qee ifeg ija uqa qee cahacdugaun.
15 Eu mele, Onisimas uqa hina saen nag odi culihen. Euqa ija odi cisdugina, hina uqa ceseli oidecem hinaca gaid biluwasan eunu uqa hina saen nag odi culihen. 16 Odocob qila uqa begabeg meh cabi dana dih qee bilina qa uqa begabeg meh cabi dana wooldoc bilina, uqa wawige meleec cotige ija nalug migina eu odi bilina. Ijadodoc uqa ija coti bahic ec cisdumig uqanu nalug migina! Odocob hina uqa begabeg meh cabi danaca Tibudca gabandoc cotinca ec cisdufeg uqanu gehca nalug megan.
17 Eunu hina ija hinana cabi hijen ec cisdufeg hina ija alalagtoumwe ceseli uqa alalagdoga. 18 Uqa hina cahuldoc oso odihecebfi, hinana ceteh oso umig isi wadacdugen ecebfi uqa ijan eu falicdumeg ija ijanina maga. 19 Ija Pol, ija ene ijadodoc ebenina je i jaqigina. Ija ceteh eu wadacdu fajihigen. Mele, hina ija ceteh wadacdutecnu nijia eu hinana cebac bilec! Euqa ija eunu madecnu qee nijel. 20 Ese ija coti, hina Tibudnu ijana gale tec odogamo. Hina Onisimas ceseli oidogale. Odocob hina Kraisca gabandoc coti eu odiwe ija wawi me muditegan.
21 Ija je i jaqihigina eu toodu odogannu du hedugina. Euqa ija hina odogannu mahigina eu hina wooldoc odogannu eu dugina. 22 Ija Anut uqa agena inondoc dah migiannu sumudi biligina. Odocob ija ceseli ageca ligen. Eunu saen euna dih cudun oso ijana saciaduteiga.
Cit qoc feele adec
23 Epafras uqa ijaca osoben Krais Jisasnu gihacdoc jona biluwuna eu feele adec sulduadena. 24 Odocob ija cabi hijeniel Makca, Aristakasca, Dimasca, Lukca ageha agena feele adec sulduadegina.
25 Jisas Krais Tibud uqana eelgec uum igec age dolonogaca biliale.

*1:10: Grik jena ijan Onisimas uqana gug eu “cesuldoc.”