11
Anut uqa Isrelnu waug qon
1 Eunu ija sisiligina, Anut uqana dana cajaca wele hibemadenfo? Qee bahic! Ijaha Isrel dana. Ija Ebraham jajanig oso. Ija Benjamin sihulnadec. 2 Anut uqa uqana dana cajaca wele don uqa qee hibemadel. Age Ilaijana dodonu Anutna jaqec je nijia eunu qee doginafo? Ilaija uqa Isrel agena odoc me qeenu Anut odi inondon:
3 “O Tibud, age hinana je madec dana aqecebil cal mein.
Age hinana ihanec cabal eu wagaladein.
Euqa ija himec biliga.
Eu age ijaha qituqagannu walitegina,” don. (1 King 19.10, 14)
4 Euqa Anut uqa cel je ceseli madon? Uqa odi jejeg hewi madon:
“Ija dana 7,000 eu age Baal tibud amegna gob qee cehelein eu ijadodoc hewadem bileiga,” don. (1 King 19.18)
5 Eu odiha qila saen ina am nag oso bileiga Anut uqa uqana eelgec uum igecna nesili cedaden. 6 Euqa uqa age loo je toodoinnu qee ehadel. Uqa age loo je toodoinnu ehadecebfi uqana eelgec uum igec eu uum igec mele bahic qee.
7 Eunu adi? Isrel dana cajaca age Anutna ititom kobol eu oqagannu walein eu age qee oloin. Dana cajaca Anut nesili cedaden eu age himec oin. Odocob leih wawaga eu menen. 8 Anutna jaqec je odi madena:
“Anut uqa odadeceb amaga amusein.
Uqa odadeceb amaga qee mecielein, odocob dahiniga qotum qoin.
Odocob eu age odi bibilegin hu qila deel i calen,” ena. (Loo 29.4; Aisaia 29.10)
9 Odocob Dewidha odi maden:
“Agena ja qoc saenna
aisais hewadeceb tonoqagan.
Age heel benna tonoqagan,
eu agena wadac ameg odi aig qugian.
10 Age amaga tu hocob qee meciowain.
Odocob hina cois homoga akuldocom odi himec bilecebil catanigian,” en. (Buk Song 69.22-23)
Anut uqa Juda dana sihul qee eundec ceseli ceden
11 Eunu ija sisiligina, age wele toni aqen odimeig odoc eu odina wele me qee meinfo? Qee bahic! Age Anutna me je hibemdoin eunu jic euna Anut uqa Juda dana sihul qee eundec cahahaaden, odocob Isrel age sihul fil eu Anutna cahahaadec ocobil fimeig wawaga me qee migian. 12 Isrel age Anutna me je hibemdoin saenna Anut uqa dana cajaca filfil me bahic cesuladen! Odocob age silail meinna Anut uqa Juda dana qee eundec me bahic cesuladen. Eunu Anut uqa Isrel dana cajaca cunug cahahaadi egeca gabangigian saen euna uqa ege dana cunug me bahic cesulgi cuhadugian!
13-14 Euqa ija qila Juda dana qee eundec age je maadigina. Ija Anutna aposel Juda dana qee eundec age gemo cabi ocnu Anut gesilten. Ija ijana Juda sihul eu age amaga qocomin Anut age leih cahahaadigiannu ijana cabi oc sulecemin ohis tena. 15 Ge, Anut uqa Isrel ititacaden, odocob eu odocna uqa dana cajaca maha cunugnadec cedadeceb eu age uqaca tanawadecebil wawaga osol mein. Eunu Anut uqa Isrel haun ceseli cedifei eu cal mecnadec haun ceseli cajecwe moqagan.
16 Age bred mudecnu ooldodoig saen euna age casac ooldoc ceteh eu manecnu cagu umeig am naha oso Anutnu qagu bilecnu abes megina. Eu odi odifeig ooldoc ceteh cunug eu Anutnu qagu bilia. Odocob na bebeig eu Anutnu qagu bilecebfi na batac euha cunug Anutnu qagu bilia. 17 Isrel age na oliw manan cinigwe. Odocob Anut uqa batac leih na oliw eunadec qahadi helen. Odimei uqa age Juda dana qee eundec oliw batac cus euna na oliw manan eu tubadeceb agena cudunna bilegina. Odocob age na oliw bebeignadec lalo oliw batac leih gami ogina. 18 Eunu age oliw batac Anut qahadi helen eu age cain fileadowain. Age fileeiga adecebfi casac cisdu cuhadumeig age bebeig eu qee gahidogina qa bebeig age gahiadena.
19 Euqa age madegina, “Anut uqa batac eu agena cudunna ege tubgigiannu qahaden,” egina. 20-21 Eu mele qa age wawaga mele qee el eunu qahaden. Euqa age wawaga meleena euna gagadic taweiga. Anut uqa na oliw batac bahic eu qee culadel. Eu odiwe uqa ageha qee culadeiaun. Eunu age cain fileowain. Age cois cumuneiga. 22 Eunu age batut feigale. Anut uqa waug susumulca qa uqaha kobolkobol gagadic odocca. Dana age Anut hibemdogina eu Anut uqa kobolkobol gagadicca odadegina. Euqa Anut uqa agenu waug qona, eu age uqana waug qoc euna bilifeig. Qeefi, ageha Anut qahadi qeladigian. 23 Odocob Isrel age wawaga qee meleec kobol eu culifeig Anut uqa ihoc ceseli tubadigian. Eunu Anut uqa euna ceseli tubadigian. 24 Age Juda dana qee eundec, age na oliw cuswe. Odocob Anut uqa age batacwe qetadimei na oliw mananna tubaden. Na eu agena sihul qee bahic. Odocob Isrel dana age na oliw manan cinigwe. Eunu na oliw manan eu agena sihul bahicnu Anut uqa age batacwe na oliw manan euna ceseli tubadecnu cabi hetec bahic.
Anut uqa dana cajaca cunugnu waug qon
25 O wawaga meleec cotiel, age je jahunec i fogo adigiannu ija wawi nijia, age Juda dana qee eundec agedodocnu cisdudu madowain, “Ege cisdoc silecca,” owainnu ija je jahunec i qasali maadigina. Eu odi, Isrel am naha age wawaga meneceb kobol eu ageca biligian, lecebleceb saen Juda dana qee eundec agena sihul eu limei agena wawaga meleec am sanijec eu ihoc ligian. 26 Odocob eunu kobol eu odina Anut uqa Isrel sihul cunug cahahaadigian. Anutna jaqec je odi madena:
“Saion gemo ono cesuladec caligian.
Anut uqa Jekob sihul odudeceb age Anut hibemdoc kobol eu culuqagan.
27 Odocob ija agena silail cunug cagasiadigen saen euna ija age gemo bal je cehigen,” ena. (Aisaia 59.20-21; 27.9; Jeremaia 31.33-34)
28-29 Isrel age Anutna me je hibemdogina eunu agenu, Juda dana qee eundec, age Anutna cad bilegina. Euqa Anut uqa age wele bahic nesili cedaden. Anut uqa age wele utaaden, uqa wele eeladec uum aden. Odocob uqa uqana cisdoc haun hibna qee falicdoiaun. Eunu Anut uqa Isrel jajanagailnu cisdumei Isrel dana cajaca nalunuga mena.
30-32 Anut uqa dana cajaca cunug age uqana loo je tefacdoginanu uqa ameg me qee wadacadigen ec maden. Eunu uqa dana cajaca cunugnu waug qona. Eunu age Juda dana qee eundec, age wele Anut filedoin. Qilaqa Isrel age Anut filedoinnu Anut agenu waug qoc ageca bilen. Eu odiwe Anut agenu waug qoc ageca bilennu Isrel age Anut agenu waug qoc oqagannu age qila Anut filedogina.
Ege Anut binan sulecnu
33 Anut uqana kobol me bahic,
uqana cisdoc silec,
uqana doc eu dunuh bahic,
eu macas ameg gemona cinigwe!
Dana ege uqana cisdoc gug cunug fecwe qee bahic.
Dana ege uqana jic cunug bahic ha toodocwe qee.
34 Anutna je eu odi madena:
“In uqa Tibudna cisdoc wele fen?
In uqa cisdoc uten? (Aisaia 40.13)
35 In uqa casac ceteh utennu ceteh eu wadac haun ceseli utigian?” ena. (Job 41.11)
36 Qee bahic! Anut uqa ceteh cunug ifanen.
Eunu ceteh cunug bilegina.
Odocob ceteh cunug eu Anutnu himec bilegina.
Ege uqa binan sulocomun cataneiale! Mele!