13
Ege cunug gaid gabman ilo bisalu bileqan
1 Dana cunug age gabman ilo bisalu gaid bileigale. Eu mele, gabman ilo eu gauc qee calena. Gabman ilo uqana cabi cunug eu Anut ebenna himec calen. Odocob gabman ilo cunug bileiga eu Anut uqadodoc madennu bileiga. 2 Eunu dana oso uqa gabman ilo jejeg wooldona eu uqa ceteh Anut men wooldona. Odocob dana eu age gabman ilo jejeg wooldogina eu age agedodoc agena ameg me qee oqagan. 3-4 Ge, dana kobol me odogina eundec age gabman ilo cucuiadoqagannu qee odogina. Euqa dana kobol me qee odogina eundec age gabman ilo cucuiadecnu biloub. Hina gabman ilo cucuidoga qee henafo? Uqa Anutna cabi dana uqa hina cesulheheb me bilegan. Eunu cucuidoganfi hina kobol me himec odoga, odocob hina binain suligian. Euqa uqa han sigin eu uqa ebenna bilina eu uqa gauc qee hewena. Uqa Anutna cabi dana dana kobol me qee odona eu ameg me qeena wadacdutocnu bilina. Eunu hina kobol me qee odifeg hina uqanu cucuiegan. 5 Eunu ege uqa bisalu bilecnu. Ege Anutna ameg me qee wadacdoc qee oqaunnu himec uqa bisalu biluquna qa ege wawigena doqona kobol eu me bahic ec madimeb toodu odoqona eunu uqa bisalu biluquna.
6 Gug eunu himec agena takis fajec qaig helegina. Eu eetanu? Gabman ilo age Anutna cabi dana bilegina, odocob saen gaid age cabi eu himec cofdocnu gagadic megina. 7 Age ceteteh filfil dana adecnu cabica eu odi himec dana cunug adeiga. Takis cedec dana filfil eu age qaig adeiga. Dana uqa bisalu bilegina eu uqa bisalu bileiga. Dana age binan sulegina eu uqa binan suleiga.
Ege dana cajaca cunug nalunuga mecnu
8 Dana oso uqa cotignu nalug mena eu uqa loo je bahic toodona. Eunu dana osona ameg age dewenegana cain nijiaun. Ameg osol eu himec saen cunug nijina, age nalug mecebmecebegina. 9 Loo je leih eu odi gagadic madena:
“Hina dana osona cajaca cain uqaca nijuwasin.
Hina dana oso cain qocom cal meiaun.
Hina cain heje magaun.
Hina osona cetehnu cain amen qoiaun,” ena. (Kisim Bek 20.13-15, 17; Loo 5.17-19, 21)
Loo je eu odocob loo je leihca eu cunug ilo osol himec eu je odi madena:
“Hina hinanel nalunin maganawe
odi hina utuqain bilec* Utuqain bilec uqana gug eu odi. Agena loofo, agena kobolfo eu dana osonu nalug magale ec qee madel, cois hina dana eunu nalug magale. eundecnu nalug magale,” ena. (Wok Pris 19.18)
10 Dana oso uqa nalug mena eu uqa utuqannu kobol me qee qee odona. Eunu dana uqa nalug mena eu uqa loo je bahic toodona.
Ege tutuc coboc bahic cobeqan
11 Eetanu ija kobol eu odi odoqagannu maadigina? Saen qila bilia eunu age wele doin. Qila us nijec cuculeb cajecnu saen. Age dogina, ege wele wawige meleec dana calom, odocob Anut cahahagecnu saen cecelacca nijen. Qilaqa saen i wele gohic mena. 12 Witic eu qee memen odi cujedugia odona. Eunu tuna kobol eu culecnu. Odimeb han lotoc tacimeb fulacdoc kobolna bilecnu. 13 Ege ititom coboc dana cam fulacdocna cobona odi cobocnu. Ege cain fileii deboii gad ceu jecomun dalul qigiaun. Ege cecenec kobol cain oodi wal kobol majagca qeena ilag uduqaun. Ege cain fee dadanii dana osona cetehnu amige qoiaun. 14 Euqa age Krais Jisas Tibud umeig han lotoc cinigwe taqeiga. Odimeig dewenegana gale doc me qee toodocnu cain cisdowain.
*13:9: Utuqain bilec uqana gug eu odi. Agena loofo, agena kobolfo eu dana osonu nalug magale ec qee madel, cois hina dana eunu nalug magale.