YONI MA ESÉ ARAÍEN UVANTEIN BOMPON MINO
(1 Yoni)
Yoni Ma Esé Bompon Uvanteí Pákenai Afova Vaya Ino
Ma vompon ma uvantein banta ino.
Baya varen orin banta Yoni vei furin ádesí ukhan ma uvarein minon ten manáa afova vanta kéká iniyan mifo ída mana vanta ano fura sen afová ukhen mino.
Uvarein orana ino.
AD nainti (90) ráké mana antareti (100) ráké mai aúban mino.
Ma vompon ma uvantein baru ino.
Esiá barafin ma un non akhempá áau orun perápá ma vain baru Efesasí ino.
Ma vompon ma uvaman amikhein kéká ino.
Efesasí ma vain monó namun má Esiá barafin ma vain monó namun kayo vá inká minó akhen pá ma vain monó namun kayofin mái uvamádan oreraen mino.
Nái ana vará ma vompon uvanten nafino.
Minó akhempá ma monó tiyain kéká ano ma Yisasintá mumunan iyan ma kamaen ban avúavá ma varan nain má inká pefá ma Yisas Karaisini kama vaya siamikhá ein ma san mi sian amá ukhen mino. Ma vara ráke avúavá bá inká kampun monó doran banta kéká bái avúavá ba san mi ma vompon ma yankafin nain kayo afova amikhen mino. Inká ena avábá uantan ma kákaní ukhein nan tian amá iyáken mi Tiyarafenu ano ma setin avábá usintiyain oniyáké maé mai vará ben aya ven aya vá onon tikhen mino.
1
Ayun Ma Fara Van Oriyan Ban Baya Ino
* Yon 1:1Minó danasinta ma ída afoká ukhan ma varé ein mano setin má baya siyáká beni Vaya iniyáké oné tiféuno. Béi Yisas Karaisin báken Ayun Ma Fara Van Aunan mi varé íká béin oniyáké aruvé tiféuno. * Yon 1:14Pefá mai Aunan manon be Afóen má manafin baré íkan béin maman dákó urá purasé onteruna van mi ayun para van aunan mi véi van mino sé tiretin tiamiyá uno. Tetí ankan ma fura sé ódaré inikhé tiferuna yana san mi eresí manafin átaru uvé monó teno van tiretin tiamiyá uno. Manafin ma átaru uvé monó té tifanuna mai ve Afóen má be Anin Yisas Karaisintá bái monó tiantá tifanté uno.
* Yon 16:24Tetí ankampin moéken timusin bíkano van mi ma vompon uvaman amiyá tiféuno.
Tiyarafenui Kakhantá Ma Van Baya Ino
* 1Ti 6:16; Yem 1:17Ma vaya vá tiretin nan tiameno siren ma véi sisimikhá ein bayan tiretin tiamiyá uno. Tiyarafenu mai kakhan mi vákan béimpin ída sítípa van mino. * 1Yn 2:4Máan tukhantíi setí ankan ma manafin átaru uvé Tiyarafenu vá monó tiyá uno siré ma yuntein avúavápin para vá tifanté maé mai kampun mi siré ída fura sikhein avúaváká nó tiféuno. Máan tiyá tifé umpo Karaisin an dé ma Tiyarafenui kakhakhein avúavápin ma vá tifanté maé mai véin tái manafin átaru uvé monó tiyá tiféuno. Máan tiyá tifékun maen be Anin Yisasini nare ano setinti ume yo sesé usinté iyan mino.
* Íbo 32:5; Pro 28:13Tetí ankampin ída ume van mino ma sé tifanté mai setiyan mi máká máaka iyá tifékun pura sikhein aváuvá ano setimpin ída van mino. Máan tukhen mifo setisi ume ma sian amá uan béin amé tifékun maen béi ma sikhein ánain dakhafen mi setinti ume yo sesé usintáden puntákein avúaváká kainten mino. 10 Tetimpin ída ume van mino ma sé tifanté mai Tiyarafenu van mi kampun banta ino siyá tifékun mai avúavá anon beni vaya van tetin túpin ída van ne sen aní iyan mino.

*1:1: Yon 1:1

*1:2: Yon 1:14

*1:4: Yon 16:24

*1:5: 1Ti 6:16; Yem 1:17

*1:6: 1Yn 2:4

*1:8: Íbo 32:5; Pro 28:13