Jonɨhomɨ Utɨpɨho Jɨho
Kɨmandɨ 1 Jonɨhopɨ Utɨpɨmandapɨ Nesɨpɨhande
Jisaasihomɨ otɨpɨpatɨhiyaamɨ wo komɨ ambɨpatɨ Jonɨho aimɨ noaipatɨ apɨpaahɨ aungwɨhondaatɨ kɨnaungwɨha 85-90 A. D. hura utɨpɨmo kɨmo jɨpatɨpiyahore. Ko Jonɨhomɨ utɨpɨho kapɨhounɨ amɨ ipotɨhounɨ naasɨkura jɨpatɨpiyahore. Jonɨho pɨwɨha wiwa apɨpaahɨ watɨpɨhaiwa kandaahandɨ kandɨ isɨhiyaapɨ gwɨnyapenataatɨ bɨpi napaisaatɨha kaundataase. Siyatɨ napaisaatɨha jɨpatɨpiyatɨ isɨhiyai kaundatɨ amɨ kiyaisɨ, “nisɨ maasɨhoyaate,” undatɨ napaisaatɨha kaundatɨ ambɨhundataase. Isɨhiya usa Jisaasihopɨ japɨhɨ napɨtaise tɨwɨ wɨndɨ baiwɨ gɨmunyaapɨ, amɨ Kopɨ Autaahaatɨhomɨ Mwaahore tɨwɨ wɨndɨ monɨwɨ gɨmunyaapɨhiyaare. Aihɨ kandapɨ isɨhiyaisɨ tɨtɨhemwatɨ amɨ pɨwɨha wihoaaŋɨha kaundatɨ jɨpatɨpiyahaare.
1 Jonɨhomɨ Utɨpɨho napɨmasataise
Jonɨhomɨ pɨwɨha namasatɨ katisɨha (1:1-4)
Autaahaatɨho apɨpaahɨ nausoaatahore. Nyamɨ usaanɨnɨ noaipawaatɨ komɨ mwaayaanɨ matiyaanimatahaawaahɨ asɨhatindɨhandamɨ pɨwɨhaunɨ, amɨ asɨhatindɨhandamɨ maipɨhaiwaisunɨ ahosumwaitɨhaawe. Ahosumwaatosaatɨ Jisaasihoai nuwipinjaatɨ gaahaiwaahɨhɨ kiyaanɨnɨ kaimɨ nutɨhaawe tisɨha (1:5–2:29)
Autaahaatɨhomɨ mwaaya maatiya gaahaiwa tɨtɨhɨhaiwa kiyawaahiya kiyaamɨ naisɨhiyai maarɨho nasisoaarɨ kiyaanɨhɨ nunyamɨ nutaapo. Saisaihɨ amɨ Bwaasɨrɨhɨramɨ mwaaya maatiya maipɨhaiwa tɨtɨhɨmetahaiwa taawɨ kaimɨ nowaahiya, amɨ kiyaamɨ naisɨhiyai maarɨho wɨndɨ napaitɨwɨ kiyaanɨhɨ nunyamɨ namutaapo tisɨha (3:1-24)
Isɨhiyaamɨ pɨwɨha katisaihɨha biyaatɨ newaatɨ tipɨtapaawaatɨ mmondɨhaawe, sa pɨwa Autaahaatɨhomɨhaaro e Bwaasɨrɨhɨramɨhaaro, taato tisɨha (4:1-6)
Kɨraisihomɨ isɨhiya sapaapɨ amɨ saitɨhaawe, tɨwɨ gwɨnyaapɨ amɨ kiya kiyaanɨhɨ gaahɨretɨ bimaamɨ nutaatɨwɨhandapɨ kaundatɨ osasepɨhaasɨha (4:7–5:21)
1
Kɨma Pɨwɨma Asɨtimatɨtaatɨwɨhandisahopɨhaare
1 Aihɨ Autaahaatɨhopɨ siyaho bindataise ta isɨhiyai nusesɨpatɨtandɨ auta nunjisɨhopɨ nɨnɨ jɨpatɨpaindɨ kasatataato. Iyataatɨ Autaahaatɨhopɨ siyahore ta nanyɨsisɨho so isɨhiya asɨtimatɨwɨ jinjapɨhɨ bimɨtaatɨwɨhandisahore. Iyataatɨ so jɨhɨ aimaahɨho bimainjahore. Isɨ ko wanɨ auta noaipasɨhɨ nyahɨ aposerɨhiyaanɨnɨ koai nyamɨ ndɨhaara usonaatɨ komɨ pɨwɨha atɨwisaatɨ numwɨhatahaayo. 2 Iyataatɨ isɨhiya asɨtimatɨwɨ jinjapɨhɨ bimɨtaatɨwɨhandisaho nyamɨ ndɨhetɨ ko wanɨ auta noaipasɨhɨ nyahɨ koai biyaatɨ usonahaayo. Iyataatɨ sawaho asɨtimatɨtaatɨwɨhandisahosɨ yamɨhapataatɨhɨ Sapɨhoaisatɨ maasɨ konɨhɨ bimainjaho auta noaipasɨhɨ nyahɨ koai usonahaawɨ kandapɨ nɨnɨ sangi akɨtɨnɨhɨ ausaatɨ kasatataato. 3 Ausaatɨ pɨwɨma kɨma kasatohɨma apaapɨmaato. Nyahɨ aposerɨhiyaanɨnɨ Autaahaatɨhoaisaatunɨ komɨ Mwaaho Jisasɨ Kɨraisihoaisaatunɨ maasɨ maarɨho naasohɨtanɨhɨ nyamɨ kiyohɨpatamataiwɨ napɨwɨ tɨmaamaitisaihɨ bapiyaatɨ maasɨ bimɨtɨhaawɨ mmona atisohɨwaiwaapɨ ausaatɨ sangi kasatataato. 4 Iyataatɨ nyamɨ maaritɨtɨhaahandɨ awaindɨhandɨ noaipaitandɨ utɨpɨhandɨ kɨmandɨ sapɨ jɨpatɨpiyataayo.
Kɨma Pɨwɨma Nyahɨ Nausainjɨtɨhandetɨ Japepihɨrɨtɨhaahandapɨhaare
5 Iyataatɨ pɨwɨha kɨma Autaahaatɨhomɨ Mwaahomɨ kanyatihɨ atisohɨha amɨ sangi nɨnɨ sandɨ kasatɨtaano, Autaahaatɨho so asɨhatɨtandɨhandɨ apɨpaahɨ owehore. Nehɨ nausainjɨtɨhandisahore. 6 Iyataatɨ nyahɨ sataatɨ, “nyahɨ maarɨho naasohɨ gwɨnyaawaatɨ Autaahaatɨhoaisaatɨ maasɨ tɨmaamaitaatɨ naasaindetɨ bindahaayo,” taatɨ kataatosa maipɨhaiwa asɨhatindɨhandaatɨhapɨhaiwa kiyahaawaahɨ nyamɨ pɨwɨha Autaahaatɨhoaisaatɨ maarɨho naasohɨtihɨ naasaindetɨ tɨmaamaitaatɨ maasɨ bindahaayo, taatɨ katohɨha jaiwɨtaatɨ katahaayo. Jaiwɨta kataatosa sandɨ nausainjɨtɨhandɨ akɨtɨhandetɨ bɨmimaawaatɨ asɨhatindɨhandaatɨhɨ bindahaayo. 7 O Autaahaatɨho nausainjɨtɨhandetɨ bimipatamatiyaatɨ nyangisangi kandɨ nausainjɨtɨhandetɨ japepihɨrɨhaawaahɨ isɨhiya Jisaasihopɨ baiwɨ gɨwunyaahohiyɨhiyaisaatɨ maarɨho naasohɨtanɨhɨ naasɨkandetɨ maasɨ tɨmaamaitɨto. Iyonɨhɨ nyamɨ maipɨhaiwa nahatewa Autaahaatɨhomɨ Mwaaho Jisaasihomɨ jɨtɨpataahɨ bausatɨ nenyamaitaise. 8 Iyaatɨ nyahɨ sataatɨ, “maipɨhaiwa wɨndɨ kamaayaahiyaanɨne,” taatɨ katahaawaahɨ sandɨ nyangi omaŋɨtɨtɨhɨ wɨndɨ biyatɨ namaanyesɨpainjɨhɨ katahaato. Iyaatɨ amɨ sandɨ pɨwɨha akaahaamɨ tanyaaho Jisaasihoaisaatɨ biyaatɨ maasɨ tɨmaamaamaitɨhaayo. 9 Isɨ nyahɨ nyamɨ maipɨhaiwaapɨ, nyahɨ siya siya kiyahaayonɨ Autaahaatɨhonye nepɨnyamape, undaatɨ ausaasaihaahɨ Autaahaatɨho wɨndɨ ahosɨnyamaamaitaise. Owetɨtaise. Nehɨ komɨ pɨwɨha katirɨhɨrɨ kɨretɨ gaahatɨ kanyisatɨ tɨtɨhɨ nyamɨ maipɨhaiwa nahatewa nenyamaitaise. Nenyamahonɨhɨ nyahɨ noaipawaatɨ gaahiyaanɨnɨ ainahiyɨhiyaanɨnimatɨto. 10 O nyahɨ sataatɨ, nyahɨ maipɨhaiwa wɨndɨ kamaayo, taatɨ katahaawaahɨ sɨkandɨ Autaahaatɨhomɨ pɨwɨha isɨhiyaapɨ nahatiya maipɨhandisahiye, tatɨ katisɨhaapɨ jaiwɨtatise taatɨ katahaato. Iyataatɨ amɨ komɨ pɨwɨhaisangi wɨndɨ biyatɨ omaŋɨtɨtɨhɨ kɨmwaanyamundɨtaise.