Angig Mo Jon Ginofena
Ohuna buk enaig esog
Ohuna buk wa emba sambaganigi mog mo sihig. Jon membeg Kristenim kwaganiba so ma mungo olug Humuan God i afa heafna Leg Sisas Krais i ahfei. Ehe enaig membeg ehegel ese sikifig elim esogonif au ambugog go. Emba ehegel negelni olug onigigim mwakwale gonibi eso ne Godum wahinim wahigwa gam nem wanahuf. Afa enaig el emba sikigieg wa nai el fig afa ehengel enaig sihifig og, “Ohuna bitena gawig eba amtakwalig. Afa Sisas eba Godna Leg, eso ehe mas ohunaig elig na bonam el lofugfei afa mungwali bite nai gawigna angoguli eso bigel esfafif. Afa ehegel enaig esogog, el membig God i lahlag ahagag ahfe ehegel ese bite nai gawigim hugna onigiafofuf.” Afa ehengel gaba enaig esogog, “Lahlag nihe afa elim membeg nihe eba bitenai nihe nofena enam hugna oniginim afa enag nihem pahluku.” Afa Jon membeg Kristen el nofe ka enaig mo higi. Ehe enaig sihifeg og, Sisas inim bona eso el lofug gona afa el so Sisasim olug oniginig ehegel so Godum hugna membig afa so ma mingnagim gaba membegoni.
1
Nofkenagag Mo eba Sisas
Kagel nengelim ginofegonig enag el ehe nofkenagag mo. Enag Mo autunam nemug ati gofena. Enag ati kagel higig afa kiafna nofna nangug, afa kiafna ningana kehligim faig efig. Autunam enag higeg nofkenagag el eba Awag i ahagag afa yuwaba ati bigim ambagwa fenig. Afa mahim enag nofkenagag el pugugba kagel nangug eso kagel nengelim sihigonug. Kagel ati higig afa nangug afa nengelim sihigonug eso bigel mungo oningig fi. Soma Awag i heafna Leg i Sisas Krais olug musuwag wa bigim ahwangofi. Kagel ohuna mo ginofig soma bigelni sifakal hugna gofi.
Bigel eso afwambusug mina pahluku
Ohuna mo Sisas kagelim sihinigbi afa kagel higigim eso ka nengelim sihigonug. Enag mo enaig sihifeg Godba afwambusug sikifig mas ehena yi go mo, eba awai nemug. Afa bigel ahanaig ahanaig nihem pahlukuiba eba bigelbi sikifig wa agfohe. Afa enaig esinim afa bigel esogof kagelbi heafna eba awai bigelni mo eba mwakwaleg afa bigel mas lahlag nihem pahluhug mo. Afa bigel afwambusug yi agfohefiba eso God enaig esef eso heafna Legna taf wa bigelni amtakwaligim hugufafatif afa bigel mungo oningig mungwali nuwagig.
Afa bigel esogof kagelbi ahanaig ahanaigba awai eba bimbefim mwakwalig afa inim mo mas bigelni oningig wa feg mo. Afa biafna ahanaig ahanaig amtakwalig Godum sihinaiba eba enaig esef ehe ati sihi wahiag eso bigelni mungwali ahanaig ahanaig amtakwaligim hugufafatig eso mas big nuhwefni agfofi. 10 Afa God enaig esog nengel mungwali el ati ahanaig ahanaig amtakwalig esig. Afa bigel esogof kagelbi mas ahanaig ahanaig esig mo eso enag mo enaig esog Godna mo eba mwakwaleg afa heafna mo mas bigelni oningig wa feg mo.