2
Porri wom aposerm tfit rpa yima yuhur fakmom
Fotin gunyjimm tohnihato ee kto tfit Jerusalemko Barnabasr-pno yimno. No yimohat Taitusr faknimno. Tu Bro Nkifrarn niahato kasinyamora Jerusalemko yinyeft. Na Jerusalemko yi tohmohat tuha Jerusalemthu sios hingrneft tohwa yimarpampno turpatnom rhuhato kfo nuhas bonuhasmoyanm na yima tangimpno yihato gutniuskfot kfo nuhasmo yuhat. Memoya, “Rroh dukeft wany marnya duha be nanhu dukefrpatn hingrnaruha nanhu hingrneft yi furaraht.” 3-4 Na sios hingrneft tohwa yimampno rhu rifinyhato nom napthamohat nmoh mrokfefm wany rikohyuk yimam yuwi yimomn mkfo nheh memomnom, “Nom Jisasr hiket yimayenom. Kangnom, rhuhato niko pthayuk mrokfefm wany yakitohrahnomko.” Yuwi inji mkfo nhehmomnom. Rroh dukeft memom, “Rhuhato wany yakitohrahnomm. Judaroh boririfhut finji kforuhamt? Yak yiritiyafrahmt o yakitohrahmt?” Na nd riny swirt mrokfo kfo pthamohat nhai marimoya nd nkifra boririfhuthu nmbuhat ptha srhrahnomt, nhai. Rifak htafmoyant. Gutnius mrokfothu mrokforpat rhu napthamonom. Ndnatn nd yimam wanysihato kfo memom, “Wakfotwanm, ‘Judaroh nkifra tha puknefti boririfhut mirahn ayafho thunomt.’ Yafho thurahmt Bro Nkifrar nhai yindhorruhatrm.” Rom yihato inji kfo pthamohat Jerusalemthu sios hingrneft tohwa yimam nhai rom pthamo mrokfot hikhato kfo mari-moma, “Nd ninpno niayuk yima Taitusr nndo Grik thofer, tha wapuk-twanr.” Nhai inji kformoma. To na nhai marimoya, “Nd yi pthayukroh mrokfom wany yakiohato Taitusrhu that puk thurahnomt.” Nhai. Nanhu yima yuhur nhai wofnkahr gutnius mrokfo yuhat kfo nuhashany tfit wuyakhato tfit wom yuhat pthakni inji nakfot. Gutnius mrokforpat pthewunomt ndrpat ptha nuhashato niko yimako nd gutniuskfot wanyukko wanyhato ndrpat hikrahko.
Na nhai bro yufat mhtiyakkaha. Yo Bro Nkifrar nhai yima hatohyuk bro yufatn htikahr. To na nd Jerusalemthu sios hingrneft tohwa yimampno rhuhato na hingrna habrimo hingr-nefthu hingrna yuham kfo ptha nuhasmohat rom nhai wom mrokfom kfo ptharmom. 7-8 Kfo memoyanm, “Bro Nkifrarn Pitar mrokfo rifhur hemotrr aposer hingrneft Judampno hingrna habrimort. Nd Pitar mrokfo ptha rifhur hemo kanjo, na inji mrokfo ptha rifhur hemotra aposer hingrneft yima tangimpno hingrna habrimoyant.” Na inji kfomota nd bro yimam kfo memom, “Pitarn Bro Nkifrar fak htamor Judampno tohhato gutniuskfothu kfo ptha htfasneft. Porrne yima tangim-pno.” Sios hingrneft, met yindarim htimoahat htimoum Jemsri, Pitare, Jonr, romn bromoumt sios hingrneft. Nd bro yimam nanhu hingrnefthu mrokfom wanymohat memom, “Be tu Bro Nkifrar yuhuwafhato nd aposer hingrneft fak htamorr.” Be nd yiha rifakitohakmomno Barnabasrpno. Riyakitohakhato hingrna yuham nafak nhtamonomm. Nonn yima tangimpno aposer hingrneft fakitoh-mono. Romn tu Judampno. 10 Hingrna yuham nayak nhtanimohat rpa mrokforpat kfomomno. Memomno, “Nmoh siosn tohwom wom yimam maruha duhatm o wuskapa duhatm. Nd yimam mirahfn, ahti marsisanonm. Nifnhu tirtn arhutwam.” Na bi ndhtet yimam bi yakitoh hnetann tfit nd bro yimaroh tngt inji wanymohat na be yindhormoya nd yimaroh yakitohneft.
Pitar namo neftpno Porr yima nyingahato kfomorr
11 Kto Pitar tfit yimor Antiokko. Ndko tohhato wom neft namotr tu Pitarhu nyingahato kfo nyinga fnahmoyanr.
12 Na Pitar kfo nyinga fnahmo nmbuhat nhai be sfno. Pitar Antiokt tohmohat yima tangimpno yimoarn nuwa yemska inji namour. Wom yiha Jemsr kfo tkrurafyuk Juda Kristenm yimom nd Pitar tohmo kmi Antioktn. Pitar nd Juda Kristenm htiyakmohat nhai yima tangiroh kmifam tfit yihato yemskarmoar. Fakrmemor, memor, “Yima tangimpno rhu nafinyrhota hti nriyafrahma.” 13 Wom Judam nd tuha Antiok tohyukm, nd Pitar yimo yimbuyef duha yuharpatn hik bugamom. Barnabasr, ror nhaf nd yuharpat yimor. 14 Nhai gutniuskfot kfoyuk yuhatn hikrmom. Na nd rroh nefm htimoyann, Pitar yimaroh nyingahato kfo nyinga fnahmoyanr. Kfo memoyanr, “Ni Juda thofn arhun nhai tfit yima tangimpno yihato rhu nafif inji narfotn. Ni wom tangishofm kanjo tfit wom tangimpno yitann rompno rhu mska inji newun, to tamohmpno tfit kfo yamukanm, ‘Judaroh boririfhut wahikko?’ Ndt nhai tu dborioh neft nakahn.”
Met yindarim Krais Jisasr yakitohhato hikwam, tom nd yimamn Bro Nkifrar kak wus bowuswor.
(Sapta 2.15—4.31)
Yimam Krais Jisasr yakitohhato hiketm Bro Nkifrar kak wus bowusworm
15 Nom Juda nmoh trha yuhat, nom tu Juda frikef yuhtn trhamonom, nhai nd fasoh nefm nayet yima tangiroh frikef yuhatn trharmonom. Nhai. 16 To nom nhai duka mekahnom, Mosesr htanihemo boririfhutn yimam hikwamn Bro Nkifrar kak wus bowus-worm. Nhai. Nom nhai inji dukakah-nom. Nmoh dukeft duka kangnom, yimam tu Jisas Kraisr yakitohhato hikwam, tom nd yimamn Bro Nkifrar kak wus bowusworm. Ndnettn nom to inji buga. Nom Krais Jisasr yakitoh-watnom Bro Nkifrar kak wus bowus-wornom. Nhai nd boririfhuthu hikneftn. Bro Nkifrar bi kfo memor, “Yimar nhai boririfhu hikneftn yak wus bowusrhotanr. Nhai.” 17 To nom Judanom kangnom Jisas Kraisr hikruhanomn Bro nkifrar hifa hti wutharahrnom. Nd yuhat kangnom ainom, to tfit htinom nmoh ruheft yima tangim kanjo fasoh fasoh nefm furkihwom. Tom nom inji htineft ka tfit kfo mekfot Kraisrn nd fasoh nefm mhfnahnamorm? Ka inji kfokfot? Ka nhai. 18-19 Nanhu htiyeft inji htitant, bingot Mosesr htanihemo nkifra boririfhut hikmoahat Bro Nkifrar nhai hifa hti wutharmorr nanhu yima yuhur. Nhai. To be ndnatn nd nkifra boririfhut yafho thunimoyantn Jisasr bi hikwa. Jisasrpno bi tir niyakitohhato Bro Nkifrarpno rpat tohwono. Tfit arihat na Jisas Kraisr hik hany hik hany tfit Jisas Kraisr myafhonihato nkifrar boririfhut hikaknineft na nhai tu dborioh yimaya rhurfota. Tu fasoh yimaya rhurfoya. 20 Na bi bgre misn Kraisrpno rpatn tuhegirmoyann bi rpatn nohhato nfri yima yuhur fakmoya. Nd na yakitohwa nfri yima yuhur, tu Kraisrhu nfri yima yuhur korhra. Be nanhu duka yuhuwaf nmbuhatn nohmor. Ndnettn na tamoh tamoh nefm finji naneft nda bbinysoft, Bro Nkifrarhu Yonr yakitoh kihhato hingrnewanm. 21 Bro Nkifrar yuhu-wafmora. Ndnatn nd rorhu yuhuwaf nmbuhat na nhai yakhato rituhaftakfot. Mosesrhu boririfhutn nmoh yima yuhum yak marnyahato Bro Nkifrar ahti wutharnom, to be Kraisrhu noh nmbuhat be noh furarmort.