3
Nhai fasoh nefmn yak nohruhatmm dborioh nefm
Bro Nkifrar nd tha pukneft ahti duha yirt, Judam ka be yufapa duhatm rhurfomn nd rroh tha pukneft nhai wom fipa duhatt rhurfott? Nhai. Judam yufayetem. Bro Nkifrar barkof htayuk boririfhut rroh tirtn htamort. Rroh tirtn rhuhato romn kakitohahukwomr. Wom Judam nd Bro Nkifrar htayuk boririfhut hik duha rhuneft, Bro Nkifrar ka nhai wom hikruhatr nd Judampno bi kfo htayuk mrokfom? Nhai. Rompno bi finji finji kfir, ror to be nd tur kfoyuk mrokfo yuharpatn hikwor. Nhai yima mifnom kanjo kfo nhehtahato tfit mikfota mkfotakahr. King Defitr kfoyuk mrokfom kanjo ror kfo memohat,
“Yimam htirahmm ni kfoyuk mrokfom tu fipet mrokfom kforahn.
Yimam inji htihato mirahm ayak wunanomn,
to nhai, ninn mrokfom myakni myakni kfo wunafrahnm.” Sng 51.4
Wom Judam kfo mirahm, “Nmoh fasoh nefm yorhwatm Bro Nkifrarhu dborioh neft tafont mfrfnahnewut. Nmoh fasoh nefm arhu duha yim to fitoh yuhatn rorhu dborioh neft tafont mfrfnahnarfot? Nmoh fasoh nefm kfiwatm rorhu dborioh neft mfrfnah-newut. Ndnettn to tamohmpno tfit kfo yamukar, yak gnngtat gnngiruhanm?” Yimar inji kfoneft yima dukef duha yimar kanjo inji pthewur. Bro Nkifrar kangr ayak gnngtatanm, nhai mrokfom. Inji anatwarnom. Yo tfit kto tur ndar bbinysofthu tuhan yindari bugaroh kotkfot yakitohhirahrm. Wom Judam duka mirahm, “Nmoh mrokfom kfo fura kfo nhehwatnomm, ee Bro Nkifrar inji htihato rorhu mrokfom kfo yembindthato kfo mifworm. Nom akfo fura duha yinom Bro Nkifrarhu mrokfom nhai kfo yembindthato kfo mifrfotrm. Ndnettn to tamohmpno tfit kfo yamuka, yak gnngtat gnngi-ruhanm?” Inji kfoyuk yimar tu be yima dukef duha yimar inji kfiwur. Be nd yimarhu mrokfom aptha hik marnyarm, ka kfo marifonom, “To btn nom fasoh fasoh nefm ananom. Inji nakahtnom yimam Bro Nkifrar hifa hti yindhorrahmr.” Wom yimam nanhu yufat yutahato kfo kangm, “Rorn inji wapthakmor.” Inji kfo wokwoma. Tamoh tamoh nefm nd yimam nayukm Bro Nkifrar yak nhombra bugaruharm fasoh tkit yuhatn yak hatohaforahrm.
Nhai ndar bbinysofthu wom yimar dborioh neft nakahr
Nom Judanmoh toh nmbuhati wom yima tangiroh toh nmbuhat Bro Nkifrar finji htitart? Bi kfo hniyanko Judanomi yima tangim rpahtet ruheft korhnom. Rpahtet fasoh nefrpam kuny ki hmbritamnom nd fasoh nefmn hatonitmnom. 10 Bro Nkifrarhu rfa borngt yorhwa mrokfot to kfo kangt,
“Nhai wom rpa yimar rorhu yima rifhurio
wuthar rhuhato dborioh yimar tohkahr.
11 Nhai wom yimar Bro Nkifrarhu dukefrn rhuhato
kfo bruttna ba inji nawon o rorpno brbo yi rhuwon inji nakahr. Nhai.
12 Kmi kmim be tu mong troh twanhiwumr.
Nhai ndhtet dborioh dukefm rhukahmm.
Nhai wom rpa dborioh net yimar ndar bbinysoft tohkahr.” Sng 14.1-3
13 “Rroh tngm nnarihayem. Womm yak nnariyefiwatmm fasoh yuham kitwom.” Sng 5.9
14 “Womm nhai be tu hifa nyingar hmbrikahmm.
Riyakhato kfo rindho borindho thuwomm.” Sng 10.7
15 “Kangm, ‘Be asomif womm amtuhaknikahnomm
aye nohnomm gobenm kanjo.’
16 Wom fitoh kmim yinyeft wuskapam tamohm riyaka-hukamm
kafring bokafring tanyahu-kammn
yo tfit wom kmim yinyeft to be rpahtet neft nahukmm.
Kmi kmiroh wuska yawonr tamohr be nur krer korhr.
17 Rroh toheft nhai wommpno nayak marnyahato rpat tohkfot.
Tu be nhai mif.” Ais 59.7-8
18 “Bro Nkifrar nhai duka yanho mifkahmr.” Sng 36.1
19 Nom Judanom bi hti duka tungunewunom, nom nd boririfhuthu yinhit tohwonom. Nhai wom Judar tfit wom yak hhrif mrokfot kfo miruhatr, “Nhai dborioh dukeftpno nd fasoh nefm narmoyanm.” Nhai wom dborioh yimar asha tohkahr. Ndar bbinysofthu tuhan yindars Bro Nkifrarpno bi mrokfet bugayetem. 20 Ndnettn nhai boririfhu mrokforoh hikneftn Bro Nkifrar yukatohhato yima yuhum yak wuskahrnom. Nhai. Nom niwa nefm nd boririfhutn yak nuhas kangtnom ndt fasoh nefet.
Yimar Kraisr hikwar dborioh yufeter
21 To tfit arihat yima toh rawofm tu Bro Nkifrar hti wutha marnyewa htiyeftn Bro Nkifrar kfo pthewur. Nhai boririfhu hikneftn kfo pthakahr. Nd yima toh rawofroh hti wutha yuhat bi Mosesr pthamor. Yo tfit profetm pthamohat, Mosesr pthamo yuhatn ptha hikmom. 22 Bro Nkifrar yima toh rawofm hti wutha thoft nhai be hti wutha furakahrm. Yimaroh dukefmn hti hikwor. Tu yimamn duka kangm, “Nmoh fasoh fasoh nefm bi Jisas Kraisrn hanohnimorm.” Yimam inji dukewam, nd yimaroh yima toh rawofm hti wuthewurm. Bro Nkifrar nhai Judam yakitohwa yufam o yima tangiroh tamoh tamohm yukatohkahr. Nhai. 23 Kmi kmi buganom bi fasoh fasoh nefmn kasimotmnom to be Bro Nkifrar frtrohmornom. Nhai nompno brbo niarmoar. 24 Nmoh fasoh nefmn Jisas Kraisr suh nanyormorm. Bro Nkifrar inji htihato yuhuwafmornom. Yuhuwafhato nmoh fasoh fasoh nefm fak wus bowus thumorm. 25-26 Bingot toh hnamo fasoh net yimam Bro Nkifrar hti namburmourm. Inji hti namburmoahat nhai finji narmoarm. Be inji nyingarpaye kukatoh marsisamourm. Duka memour, “Kto rom nayuk fasoh fasoh nefm nhai yukatoh marsisarhotanm arihat niwa kanjo. Nhai. Rroh fasoh fasoh nefm yak thuhirhotanm hti duka tunguna-rahma.” To be nd mrokfot inji rhu hnamotn tfit arihat nd fasoh nefroh yak thuyuk yihotat Bro Nkifrar hingrnamotrt htitnomt bi. Jisasr nohmo yuhatn Bro Nkifrarhu nambur rifhur minoh hmbremorr. Jisasrhu kkut yohnemohat Bro Nkifrar be kukatoh hasiwur. Fitoh yimam kfo kangm, “Nom nahnayuk fasoh fasoh nefm bi Jisasrhu kkupamn fak thumomm,” yimam inji dukayukm, Bro Nkifrar hti wuthewurm.
27-28 Ndnettn mirahko boririfhut ahikkahnomn akfo grhanom. Nhai. Arihat nhai boririfhut hiket yimaroh toh rawofmn hti wuthakahr. Nhai. Arihat bi nd Jisasr hikwa yimarparoh toh rawofmn hti wuthewur.
29 Bro Nkifrar nhai be turhu kmi Judarpam yukatohkahr. Nhai. Wom yima tangim rpat kukatohworm. 30 Nhai wom nkifrarn yima tangim yak wuskahrm. Nhai. Nd rpa Bro Nkifrarpar Judami yima tangim kak wusworm. Fitoh yimamn Jisasr nohmo yuhat duka kangmt, “Bi nd Jisasrn suh nanyormorm nmoh fasoh nefm,” inji dukiwa yimaroh yima yuhum wutham korhmm. 31 To mirahko ka bi Jisasr hikwanomn nd boririfhut bi fipa duhattn riyak htafrahnomt. Nhai. Nom Jisasr hikneft nom tohhato wiyauyauneft, tamoh nefm naneft, boririfhut kfiwa yuhatn hikwonom.