Maol Aposeli
Basef bandami ma Maol aposeli
1:1-26 Jisas naꞌipa alupumi ananimi ma maol eaꞌ nalata heven ilif
2:1–8:3 Alupusi Jisasi sofaꞌ pepel Ambal Buꞌunai Godi ma sondaꞌ maol sowalipasa basef felefeleꞌma Jerusalem
8:4–12:25 Alupusi Jisasi safeꞌ sawalipasa basef etap hiagoma Judia naloma Samaria
13:1–21:16 Pol nafeꞌ wambel hiagoma nawalipasa basef Jisasi epes hiesi
21:17–28:31 Pol nafeꞌ Jerusalem naꞌipasa basefa maol anan nandaꞌanai nagiambama esis Kristen hiesi ma basef Godi eaꞌ esis Juda sandaꞌ kotimana nafeꞌ nandaꞌ kalabus Rom. Eaꞌ dembinai gavman nameꞌ basef ananimi.
1
1 *Lu 1:3Alupinai Tiofilus, buk anama fowaꞌ aeꞌ andaꞌanai* Luk nandaꞌ basef amama ma amam aposel mandaꞌ maol Godi. Eaꞌ nandaꞌ anona buk fowaꞌ naliꞌ nandaꞌanai nafeꞌma Tiofilus, buk anama basef buꞌwami Luk nandaꞌami.
andaꞌ basefa amamaga hiami Jisas nandaꞌami nawalipa esis amam nematawa 2 *Mk 16:19; Lu 24:49-51ma dambadamba naliꞌ nandaꞌam eaꞌ nafiꞌi natagama nemaf anama God nofaꞌana nalata gani heven ilif. Fowaꞌ Jisas owaꞌ ataꞌ nolata heven ilif, Anan naliꞌ naseꞌama basef amama naꞌipam mehipa maol amam aposel amama Anan nandandepami. Anan naseꞌama maol amama pepel anama Ambal Buꞌunai Godi. 3 *Lu 24:36-49; Ap 10:41Fowaꞌ saha Jisas nefaꞌ nimanimi luꞌwami nagaꞌ eaꞌ notanima nohafel wapotiꞌ nafeꞌ natagama alupumi ananimi. Eaꞌ nape aon siꞌinai tuꞌwaninai nandaꞌ pepel hianai ma nihiꞌambam mogawa endilisi anan nofaꞌ ambal namunai nape. Nimeguf amama Anan nawalipasa epes hiesi siowis wambota Godi numafias. 4 *Lu 24:49; Jo 14:16-17; Ap 2:33Anan ataꞌ nape nalomam naꞌipam mehip naꞌi, “Ipeꞌ deiꞌ ina pekwaha Jerusalem ulal, owaꞌ. Pepe pehafa amamaga amama Ahalome naꞌi endilisi niesiꞌipami. Amama fowaꞌ aeꞌ aꞌipipami.
5 *Mt 3:11Fowaꞌ Jon napisiꞌ amam nematawa hiesi embel. Eaꞌ ipeꞌ nambimb God nondaꞌ baptaisimipa Ambal Buꞌunai Ananinai.”
6 *Lu 24:21Nemaf anama amam alupumi Jisasi mandatama etifigin mahaliꞌana maꞌi, “Dembinai, aꞌi nambimb nogota anaeꞌ ineꞌ nendaꞌ apeꞌ mofaꞌ agof luꞌwami ma motofa esis naumbih ma afaꞌ atofa umafi wambel hiagoma afaꞌima?”
7 *Mk 13:32Eaꞌ anan naꞌipam naꞌi, “Amama ina amamaga ipeꞌimi ma pegawa nogota anama ma nimeguf Ahalome nandandepami, owaꞌ. Anan atona numafi amama. 8 *Mt 28:19; Lu 24:48; Ap 2:32; 3:15; Ap 5:32Eaꞌ basef ipeꞌimi amama. Nambimb Ambal Buꞌunai Godi nifiꞌmai ipeꞌ, nemaf anama pefaꞌ pepel Ananinai, pewalapa basef Aeꞌami Jerusalem eaꞌ ganima etap hiagoma Judia eaꞌ ganima etap hiagoma Samaria, eaꞌ pefeꞌ anama etap wambel hiagoma hiꞌilagon.”
Jisas nalata heven
(Mk 16:19-20; Lu 24:50-53)
9 *Jo 6:62Jisas naꞌi basef amama hiꞌalam, esis ataꞌ saitu satiligini etin, sati Anan nandegia nakwaha etap nalata ilif. Eaꞌ anom elagw mofaꞌana mafeꞌ eaꞌ ina satolona wapotiꞌ, owaꞌ. 10 *Lu 24:4Anan nafeꞌ eaꞌ, esis ataꞌ saitu satologon etin ilif otaga, eaꞌ deiꞌ atef anom amam biam mola klos afitimi mondokwama mataga malomas maitu. 11 *Mt 26:64; Lu 21:27Eaꞌ maꞌipas maꞌi, “Ipeꞌ amam nematawa Galilipei, ipeꞌ ina pitu piti otaga ilif, owaꞌ. Jisas anama deiꞌ God nofaꞌana nakwahipa eaꞌ nofaꞌana nalata heven ilif. Anona nemaf notanima nifiꞌi petolona naꞌama etin siꞌi deiꞌ paitu patolona nalata heven ilif.”
Esis sandandepa anona aman nohoꞌofa Judas
12 *Lu 24:50-53Eaꞌ esis sakwaha halaf anama lawah oliv motawama, sotanima safeꞌ Jerusalem. Halaf anama ina laogona Jerusalem, owaꞌ, felefeleꞌ. Kilomita atotona siꞌi esis Juda safeꞌ safiꞌi nemaf anama sabat sapoma nomaꞌwanai. 13 *Mt 10:2-4Esis sotanima safiꞌi Jerusalem, safeꞌ sawis ipat eaꞌ safeꞌ sape ipat ilif esis sapeinai. Agof amamumi amama. Pita naloma Jems naloma Jon a Andru a Filip naloma Tomas naloma Bartolomyu Matyu eaꞌ Jems, Alfius nogalomana, Judas, Jems nogalomana eaꞌ Saimon anan wambota Seloti.† Basef amama wabota esis Seloti, niti futnot Matyu 10:4.
14 *Jo 6:42; 7:5Amam alupumi Jisasi mandatama etifigin nimeguf hiami laꞌelaꞌef ama mandaꞌ beten maloma anowa nematawa saloma akwaꞌw Maria Jisas mamaꞌwana saloma owapana Jisasi wapotiꞌ. Esis hiesi sape sandaꞌ beten etifigin.
15 Anom nimeguf mafeꞌma eaꞌ, esis Kristen 120-peleis hiesi sandatama etifigin sape eaꞌ Pita nohafel naitu naꞌi, 16 “Sahin owan aeꞌipei, anom basef mail buk Baibel fowaꞌ gani Ambal Buꞌunai Godi naꞌipa dembinai king Devit maꞌiam naꞌama maꞌi aman anama Judas anona nemaf nondaꞌ waf aonai ma nihiꞌamba Jisas naumbih Ananimi. Eaf ina nasoꞌ, owaꞌ. Nagal. Basef amama mataga alihim. God atona naꞌi, deiꞌ basef amama mataga mandawalap. Fowaꞌ Judas ina deiꞌ nandaꞌ waf aonai nawalapa Jisasa amam, ataꞌ owaꞌ, nogota anama 17 Jisas nandandepana anan alupunai afaꞌinai nandaꞌ maol anama Jisasi naloma afaꞌ.”
18 “Moni Judas nofaꞌana waf anama aonai ananinai natala anona etap. Anan nafeꞌ etap anama nowa opaf peꞌana koloꞌalanai hiꞌalana afuna. 19 Eaꞌ epes hiesi sape Jerusalem sogawa amama. Eaꞌ diga asasinai sofala anama agiliguma saꞌi Akeldama. Apeꞌ maꞌi etap anama esimbel koloꞌalami maꞌoma.”
20 Deiꞌ main, Pita naꞌi basef amama mape Buk Song maꞌi,
“ ‘Ipat ananinai anan nope wafina. Ina anona aman napaina, owaꞌ.’
Eaꞌ anom basef mape Buk Songi maꞌi wapotiꞌ maꞌi,
‘Anona aman anona nemaf nohoꞌofana nofaꞌ maol ananinai.’
21-22 Eaꞌ deiꞌ apeꞌ mondandepa anona aman apeꞌinai nohoꞌofana ma mowalipasa basef amama Jisas notanima nohafel wapotiꞌ. Apeꞌ mondandepa anona ma amam amama mape maloma apeꞌ ma nemaf anama Dembinai Jisas nape nalomapa. Nemaf anama Jon nawalipasa basef Godi napisiꞌ amam nematawa embel nafiꞌi nafiꞌi nataga ma nemaf anama God nofaꞌ Jisas nalata heven ilif nakwahepa.”
23 Pita naꞌiam naꞌama, eaꞌ esis Kristen sandandepa amam biam. Anona Josep, agel waꞌana Barsabas, eaꞌ agel waꞌana wapotiꞌ saꞌi Jastus. Eaꞌ anona Matias. 24 Eaꞌ esis sandaꞌ beten naꞌama saꞌi, “Dembinai, ineꞌ negawa ukup epes hiesi. Ineꞌ nendandepa amam amama biam nihiꞌambapa maina aman 25 nofaꞌ maol aposel nohoꞌofa aman anama Judas. Anan nakwaha maol anama nafeꞌ wambel aonai ma God nogwamana waf aonai ananinai.”
26 Eaꞌ esis sandaꞌ agof amam biam mail otamba biam. Eaꞌ sala otamba amama mala anona malep siꞌi tin sakotoꞌmam sati otam naliꞌ nataga agel Matias. Eaꞌ sandaꞌ anan nandaꞌ maol naloma amam aposel 11-peleima mondaꞌ maol Godi.
*1:1: Luk nandaꞌ basef amama ma amam aposel mandaꞌ maol Godi. Eaꞌ nandaꞌ anona buk fowaꞌ naliꞌ nandaꞌanai nafeꞌma Tiofilus, buk anama basef buꞌwami Luk nandaꞌami.
*1:4: Lu 24:49; Jo 14:16-17; Ap 2:33
*1:8: Mt 28:19; Lu 24:48; Ap 2:32; 3:15; Ap 5:32
†1:13: Basef amama wabota esis Seloti, niti futnot Matyu 10:4.