11
Amam biam mawalapa basefi
Eaꞌ esis saseꞌe ikwaf aeꞌ ma indilaꞌwifa amamaga dendeꞌam etin saꞌipi saꞌi, “Ineꞌ hafel nembeꞌ ikwafa ipat luꞌunai Godi noloma balata anama sondolalima Goda. Eaꞌ neamba esis amam nematawa sandaꞌ lotu ma Anani sataga maꞌwis. Eaꞌ ina nendaꞌ endalelemb amama mape andeꞌma ipat anama, owaꞌ, hapaimi. Deiꞌ main, endalelemb amama esis amam nematawa sololama Godi sofaꞌam. Ama esis anona nemaf sotaga sohambombaga wambel luꞌwagoma Godi buꞌunai sope sefeꞌ sondahama aomb 42-peleim, afagof siꞌimi wanom tuꞌwaninai. Eaꞌ nambimb Aeꞌ God esapaꞌo amam amama biam aeꞌami endaꞌam laꞌifim mowalapa basef Aeꞌami. Eaꞌ amam nambimb mowahoꞌ begah waꞌami* Basef amama amam amama biam mowahoꞌ begah waꞌami siꞌi luwaguf awami maꞌi amam mondolaꞌwifa amam ukup aoma esis owaꞌ somboma opalef sofeꞌma God.
siꞌi luwaguf awami eaꞌ miꞌipasa basef Aeꞌami mofeꞌ mondahama nimeguf 1,260-peleim, afagof wanom tuꞌwaninai.”
* Sek 4:3,11,14Amam biam siꞌi lawah oliv biam maloma lamifah biam laꞌelaꞌef motawa naep Dembinai ma etap hiagomai. * 2 Sml 22:9; 2 Kin 1:10; Sam 97:3; Jer 5:14Iꞌi enis epes siꞌi sondaꞌ amam biam aom, atuwasi nif motaga malogof amamumi fendo esis naumbih amamisi endilisi. Endilisi, emi egafin niꞌi neham, waf anama atona enin negaꞌ. * 1 Kin 17:1; Eks 7:17,20; 1 Sml 4:8Amam biam laꞌfima mosopama otaga ma asaf owaꞌetina nimeguf hiami mawalapa basef Godi. Amam agel luꞌunai ma momboma embel hiami motaga akwahim siꞌi esimbel eaꞌ mofaꞌ pepel luꞌunai ma moha esis amam nematawa etapasi ma amamaga awami mamumami. Maina nemaf amam miꞌi mondaꞌam naꞌama, amam laꞌifima mondaꞌam.
* Dan 7:21; Re 12:17; Re 13:1,7; 17:8Amam mowalapa basef Godi hiꞌilam, anona mafin luꞌunai aonai nokwaha hul anama nagal nowala etini nolatawi ilif. Eaꞌ okom numbutina nopaꞌ nolomam. Eaꞌ noham nofofoꞌasom eaꞌ afum. * Lu 13:34Eaꞌ alop amamunai noꞌoh eaf luꞌunai taun anama luꞌwagoma, apeꞌ maꞌiagon basef womun etin maꞌi agel Sodom naloma Isip. Anama taun anama etin fowaꞌ esis saha Dembinai amamunai nagaꞌ lawag usiꞌinai tuꞌwanainai. Enis epes alop hianai naninani sape wambel etap hiagomai saloma esis diga hianai naninani, epes hiesi siti alop amam biami laꞌelaꞌef sondahama nimeguf wanom siꞌina tuꞌwaninai. Eaꞌ esis ina siꞌi ahoꞌma enis epes sowam hiꞌagilif, owaꞌ. 10 Eaꞌ esis amam nematawa etapasi sondanifel ma amam magaꞌ eaꞌ sondaꞌ gwaꞌaimi seaꞌam sealemb eaꞌ sandasoꞌama amamaga buꞌwami maloma alupisi asasisi. Deiꞌ main, profet amama biam maseꞌasa nimanimi luꞌwami amam nematawa hiesi sape etapi.
11  * Esi 37:5,10Nimeguf siꞌimi wanom tuꞌwaninai hiꞌilam, God nosapaꞌi ambip Ananimi mofeꞌ muwis nomona amam biam eaꞌ ambal nopaim mohafel mitu. Eaꞌ epes sotolom umbamahas endilisi. 12 Eaꞌ momeꞌ anona malogel niꞌi notagai heven nofalam mehip naꞌama niꞌi, “Ipeꞌ bipa letowi naꞌae ilif!”
Eaꞌ mofeꞌ heven muwis elagw nomon esis naumbih situ sotolom mofeꞌ. 13 Nogota anama atona, sowambon luꞌunai nokotoꞌ taun anama luꞌwagoma tuꞌwanigin peꞌogon eaꞌ 9-peleigin ataꞌ nope boꞌwagon. Eaꞌ esis amam nematawa 7,000-peleis sogaꞌ ma sowambon anama. Eaꞌ esis enis amam nematawa seapani esis umbamahas endilisi, sefela agel God nape heveni. 14 Amamaga nimanimi luꞌwami mafeꞌma bifi amama mafeꞌ hiꞌalam, eaꞌ pemeꞌ! Nogota bandana ma nimanimi luꞌwami mafeꞌma wanomi motaga.
Ensel anama nafeꞌma 7i nufapula biugel ananinai
15 Ensel anama nafeꞌma 7i nufapula biugel ananinai, anom malogof moga maꞌi mehip matagai heven naꞌama maꞌi,
“Dembinai apeꞌinai naloma Krais Amam biam deiꞌ mefaꞌ pepel mataga king dembemi etap anaeꞌ hiagoma mumafiagon. Eaꞌ Anan nope king Dembinai laꞌelaꞌef hihif!”
16 Eaꞌ amam amama agufumi 24-peleim natoma balata luꞌunai amamunai ma naep Godi mape etap mindiwa balagah amamumi mati etap mandaꞌ lotu mandanifel ma God 17 maꞌi,
“Dembinai, ineꞌ God pepel hianainai. Fowaꞌ gani endilisi ineꞌ napani, deiꞌ ineꞌ nape. Ineꞌ deiꞌ nefaꞌ pepel hianai ineꞌinai nape king Dembinai numafi epes saloma amamaga hiami. Eaꞌ afaꞌ wanifelina. 18 Esis sololama Godi opalef aom ukup numbutim, eaꞌ deiꞌ okom ineꞌinai wandafuna nataga eaꞌ. Deiꞌ nemaf ineꞌ newaloga esis sagaꞌi ma sotagama kot. Deiꞌ nemaf ineꞌ noseꞌasa amamaga buꞌwami ma amam profet mandaꞌ opeh ineꞌimi. Deiꞌ ineꞌ noseꞌasa amamaga buꞌwami esis amam nematawa ineꞌisi saloma isima hiesi sandaꞌ lotuminai sape owina ineꞌ, esis agufisi saloma isima agof aꞌasi wapotiꞌ. Deiꞌ nemaf ineꞌ neha epes isima saha epes sape etapi!”
19 Amam maꞌiam eaꞌ ipat luꞌunai Godi nape heven nandawisiꞌ eaꞌ bokis buꞌwami amama miꞌuli Godi napaimi amama mataga maꞌoh alihiguma nomon ipat Ananinai. Eaꞌ otaga holala pelepeleꞌ, dilili bugwalagw nafeꞌ, etap nalemb etin asaf luꞌunai ondowa luꞌwamunai siꞌi otamba mambip mowai.

*11:3: Basef amama amam amama biam mowahoꞌ begah waꞌami siꞌi luwaguf awami maꞌi amam mondolaꞌwifa amam ukup aoma esis owaꞌ somboma opalef sofeꞌma God.

*11:4: Sek 4:3,11,14

*11:5: 2 Sml 22:9; 2 Kin 1:10; Sam 97:3; Jer 5:14

*11:6: 1 Kin 17:1; Eks 7:17,20; 1 Sml 4:8

*11:7: Dan 7:21; Re 12:17; Re 13:1,7; 17:8

*11:8: Lu 13:34

*11:11: Esi 37:5,10