4
Basef ifimba ma epes sagambasoꞌami
1 Ambal buꞌunai Godi naꞌi basef alihif naꞌamba. Anaf owagama anis epes sokwaha sagahapifa basef endilisifi Godi. Eaꞌ asemeꞌ malogofa epes isimba ambagof awami magambasoꞌami sila basef ambagof awami magaꞌiami.* 2 Ti 3:1; 2 Pi 3:3; 1 Jo 2:18; Ju 18 2 Anom amam magambasoꞌami mawalipasa basef ifimba basoꞌafi. Malogof fagape opalef amamilifi nomoni fasoꞌ siꞌi saofa otamba sagasambagof. Amom ina atiasi ataꞌ momemeꞌma waf awafi mogawaf, aꞌ owaꞌatin.* Jen 9:3; Ro 14:6; 1 Ko 10:30-31 3 Atiasi muwalipasa basef ifimba ma esis sigihiꞌa waf sandasoꞌamafi sigihiꞌa anis gwaꞌaisi epes sagaꞌasi wapani. Apaꞌ gwaꞌaisi isimba God atona nandaꞌasa apaꞌ epes mahapifana mogogawa basef endilisifi. Amambai, apaꞌ mofaꞌam minifela Goda mogaꞌam.* Jen 1:31; Ap 10:15 4 Hiahaom hiami God nandaꞌami, buꞌwami atom. Iꞌi minifelonamam, andeandeꞌ mofaꞌam. Ina mokwahom, owaꞌ. 5 Deiꞌ main, basef Godi faloma beten sandaꞌ gwaꞌaisi isimba sataga boꞌwes hililiꞌ.
Timoti, nepe aman buꞌunai nendaꞌmana maol Kraisi
6 Inaꞌ iꞌi negasoꞌasa basef ifimba esis Kristen alipisima, daoꞌ atiasi nepe epen buꞌwinai nendaꞌ maola Krais Jisasi. Eaꞌ nefaꞌ banagami luꞌwami ma basef fagasaꞌma hapif ineꞌinii ma gawa nefaꞌan nagailani.* 1 Ti 1:4, 6:20; 2 Ti 2:16 7 Apaꞌ esis amam nematawa sagaꞌi numunefisa basef atom wafimi, newaꞌ alafugamam. Inaꞌ nendelafa waf Godi andeandeꞌ nendegawam.* 1 Ti 6:6 8 Inaꞌ negawa, waf afamba niwalipa alop siꞌipa pondaꞌ maol pigiawi, isimba laꞌifis kwasala ma sogatopalopapa. Apaꞌ inaꞌ nendelafa waf Godi daoꞌ, banagef endilisi ma fegatopalopapa ma waf hiafi. Iꞌi inaꞌ nelafa waf Godi, afamba fatopalopa apaꞌ epes hiapai ma deiꞌ magape itap nogota ataꞌe, eaꞌ fetopalopapa anaf heven wapani.* 1 Ti 1:15 9 Basef ifiꞌi endilisifi atifa epes hiasi siꞌi awi ma semeꞌef sogahapififi, ifimba naꞌamba.* 1 Ti 2:3-4
10 God anen ambal namili lagapaunai. Anen naꞌi nowambilai amam nematawa hiasi hiꞌilas sotanimai sogape andeandeꞌ. Eaꞌ deiꞌ endilisi atis nowambilai epes mamahisa sagahapifanai. Deiꞌ mape mohafana maꞌi endilisi nogofaꞌapa. Isimba atis deiꞌ mandaꞌ maol numaꞌuni endilisi.
11 Inaꞌ neseꞌasago basef ifimba fefeꞌmago esis amam nematawa, eaꞌ niwalipas dindinipa sigailif.* Ta 2:15 12 Esis sati inaꞌ ukup pandandaꞌ paꞌi, inaꞌ ataꞌ saꞌwinai, apaꞌ ina siꞌi inaꞌ aman falafunai, owaꞌatin. Inaꞌ nendape siꞌi ametal buꞌwani ma esis Kristen sigaila waf buꞌwafi ineꞌifi ma feꞌ, poe, ki, hapif ineꞌisi, soloma waf afamba okom magaila anis deindeiasafi, soloma waf buꞌwafi hililiꞌi. 13 Nogota atamba inaꞌ ataꞌ nepe atapina nehafago aeꞌ. Inaꞌ nendaꞌago maol banagambela nigatalifa basef Godi alihigima ma epes hiasi, eaꞌ nesaꞌmago ukup asasipi ma waf sondaꞌafi eaꞌ niwalipas niꞌipaso andeandeꞌ.* 2 Ti 1:6; Ap 6:6, 8:17 14 Fowaꞌ agufumi mugumafi siosi mawamona lagofena. Ambal buꞌunai Godi nasaꞌma mandaꞌmena beten eaꞌ anom amam maꞌi basefa presen inimba anen nagasiꞌinani. Deiꞌ nendaꞌ maol banagen nindimafi presen andeandeꞌ inimba God naliꞌ nagaseꞌenan dowafi.* 1 Ti 5:22 15 Dondol inaꞌ nindimafi maol inimba banagena atapina nendapoman. Ama epes hiasi sigati waf ineꞌifi fegataga fasif. 16 Solawaina andeandeꞌma waf inaꞌ nandaꞌafi, ma basef ifimba nigawalipasafi. Dondol nindaꞌam naꞌamba atapina banagambel. Inaꞌ iꞌi nendaꞌas naꞌamba, atiasi God notopalopena neloma esis sogagahembeꞌma basef malogol ineꞌigili, nowambelepa pitanimai pegape andeandeꞌ.