8
Anowa nematawa wafeꞌ wagiꞌma Jisas
Aꞌi owaꞌ main, Jisas nafeꞌ walemb hielimbi nasoꞌasa basef buꞌwafi amam nematawa sagape taun inimbai walemb hiagomai. Naꞌipasa basef ifimba buꞌwafi ma atiasi sogawis nomona maol Godi nope dembinai nugumafias. Alipumi ananimi maloma* Mt 27:55-56; Mk 15:40-41; Lu 4:43, 23:49 anowa nematawa safeꞌ salomana. Nematawa awamba fowaꞌ aowas nandaꞌawa Jisas natofamawa ambagof awami nandaꞌawa boꞌowa. Anoꞌw Maria sofalaꞌw saꞌi Makdalaiꞌwi, fowaꞌ nagatofamaꞌwa ambagof awami 7-pelaim magapauꞌwi. Eaꞌ anoꞌw Joana nemataꞌw anona aman nugumafi ipat Heroti, agol ananigili Susa. Aꞌ anoꞌw Susana kwaloma anowa nematawa hiawai daiawa wapani wafeꞌ walomana. Awo watopalopa anen naloma alipumi ananimi ma otamba gwaꞌaisi mais awausi.
Aman nogowaha nalelef gwaꞌaisi aofi
(Mt 13:1-9; Mk 4:1-9)
Esis amam nematawa hiasi safiꞌi taun hiagoma, safiꞌi sandakolas safiꞌmai Jisas. Eaꞌ anen nasoꞌasa basef waminif atin naꞌamba naꞌi, “Anona aman nafeꞌ nowaha olemb witimb siꞌi raisi anof aof. Nowahemb nafeꞌ, anemb bewa ufiaꞌw sagafeꞌma. Anis epes safeꞌ safafaꞌasemb eaꞌ amiguf fufiaꞌ fafiꞌi faꞌamb. Anemb bewa anagon otambaigima. Eaꞌ bataga apaꞌ itap owaꞌ embelepa. Gagalisimb eaꞌ alimb. Anemb bewala laꞌafena mandelef wandafumi mataga malomam maofana wit, eaꞌ amom ina mail mola gwaꞌaimi, owaꞌ. Eaꞌ anemb bewa begafeꞌ itap fasipai eaꞌ bataga balo bail bela gwaꞌaisi. Olemb ambamba atona bataga balo bail bela gwaꞌaisi hiasi 100-pelais atis.”
Jisas naꞌias naꞌamba ma eaꞌ, naꞌipas mehip naꞌi, “Ipaꞌ aligah hagagalipai ma pegameꞌ basef ifimbai, pendameꞌef andeandeꞌ ukup pendapomef.”
Jisas naꞌipasa basef ifimba kofagefa nagaꞌipasef waminif atini
(Mt 13:10-17; Mk 4:10-12)
Ama main amom alipumi Jisasi mahaliꞌanama basef kofagefa waminif atini.* Ais 6:9-10 10 Eaꞌ nagwamama basef naꞌi, “God eaꞌ nihimbaꞌmepa basef kofagefa fape fandambahiꞌi ma ipaꞌ pigawis nomona maol ananini nope Dembinai nugumafipa. Apaꞌ anis daias owaꞌ. God ina nihimbaꞌmas basef ifimba kofagefa, owaꞌ. Ama esis ina semeꞌ basef ifimba alihif, owaꞌ. Semeꞌ basef waminif atini atifa atiasi sotologon, apaꞌ ina siti anis maefah, owaꞌ. Eaꞌ sogahembeꞌ semeꞌ basef, apaꞌ ina sogawa kofagefa, owaꞌatin.”* 1 Pi 1:23
Basef kofagefa ma olemb gwaꞌaimbi
(Mt 13:18-23; Mk 4:13-20)
11 Basef waminif atini kofagefa naꞌamba. Olemb ambamba siꞌi basef Godi. 12 Anemb begewala ufiaꞌwi ambamba siꞌi epes sameꞌ basef, owaꞌ Satan nafiꞌi nelefata basef ifimba fagape nelelemb asasilimbi ma esis ina sahapifa God nakwahomas waf awafi sagape andeandeꞌ, owaꞌatin. 13 Anemb bewa bafeꞌ anagon otambaigimai, ambamba siꞌi anis epes sameꞌ basef Godi eaꞌ sofaꞌef sandagalamef. Apaꞌ isimba siꞌi masilimb owaꞌ bendala begewala itap awinia. Esis sahapilif nogota bandata ma aꞌi owaꞌ, Satan nagwambasa sondaꞌ waf awafi eaꞌ sandahagas sakwaha sagahapifa God. 14 Anemb begewala mandelef wandafumi laꞌafini, ambamba siꞌi anis sameꞌ basef sailif safeꞌ ama main owaꞌ, anom nimanimi mamimami maloma moni main a anom dagala maim itapami, hiahaom amamba masoꞌala esis. Eaꞌ ina sahapilif sandaꞌ waf buꞌwafi banages, owaꞌatin. A sowa siꞌi gwaꞌaisi owaꞌ sogalo andeandeꞌia. 15 Apaꞌ olemb ambamba begewala itap fasipai, ambamba siꞌi anis sameꞌ basef sahapilif tatalaꞌif. Nelelemb asasilimbi fasilimba sagameꞌ basef Godi sogailif. Esis sape banages sandaꞌ waf fasifi banagef, isimba sape siꞌi olemb bataga balo bail begela gwaꞌaisi andeandeꞌi.”* Mt 5:15; Lu 11:33
Nogwahis sogogalaꞌi sasapaꞌas sagambahoꞌas nomon lafili
(Mk 4:21-25)
16 “Epes ina sakata lambeh sopaloꞌambeh haꞌoh lafelagwa baketia o belitagw lafelagwa, owaꞌatin. Esis sawamonambeh hatoma belita ilifa epes isimba suwisi sigati nogogalaꞌ.* Mt 10:26; Lu 12:2 17 Hiahaom mape mandambahiꞌi anaf motaga alihigima hiasi sotolom sogawam. Apaꞌ hiahaom hiami ataꞌ sambahoꞌwam magaꞌihi, anaf aꞌ motaga mondawalap, hiasi sogawam.* Mt 25:29; Lu 19:26 18 Eaꞌ ipaꞌ solawaipa pendameꞌ basef andeandeꞌ. Epes ami sogahapila basef Godii, atiasi God aꞌ nowatanimasef wapani. Apaꞌ isimba owaꞌ sogahapilifia, atiasi basef kwawiaꞌwif ifimba esis sogahapilafi, God aꞌ nondalombasef esis sope dowaf.”
Jisas maꞌmana kwaloma owapana ananimi
(Mt 12:46-50; Mk 3:31-35)
19 Nemaf afamba maꞌmana Jisasi kwaoꞌwa owapana safiꞌmai anen. Owaꞌ amam nematawa hiasi sandakolasi siliꞌamana, eaꞌ esis ina safeꞌ felefeleꞌma anen, owaꞌ. 20 Eaꞌ anis epes sape sagalomanai saꞌipana saꞌi, “Inaꞌ nemeꞌ, maꞌmena ineꞌikwi kwaloma anom owapena ineꞌimi safiꞌi salutu andoꞌ, saꞌi solomena siꞌi.”
21 Eaꞌ nagwamasa basef isimba hiasi naꞌipas naꞌi, “Esis amam nematawa isimba sogameꞌ basef Godii sogailafi, isimba maꞌme sahin owan aeꞌasi.”
Jisas naꞌipa fufin luꞌunai nandahagas
(Mt 8:23-27; Mk 4:35-41)
22 Anef nemaf Jisas naoꞌwa alipumi ananimi malota anota bot. Eaꞌ anen naꞌipam naꞌi, “Afaꞌ ofeꞌ dumb ambamba fisanamb.” Eaꞌ amom malota bot mafeꞌ. 23 Bot atamba tafeꞌ atin, Jisas ambehahana naꞌoh nolola.
Ama main, anona fufin luꞌunai naluwi dumb ambamba, embel koloꞌwalam mawisi bot nomon taꞌi asiꞌita ma embel felefeleꞌma mogowala.
24 Eaꞌ mafeꞌ minimbalona maꞌipana maꞌi, “Dembinai, afaꞌ waꞌi ahigililafa.”
Anen nosafel ninifala fufini embel. Eaꞌ fufin nowala embel ina ataꞌ lasialiꞌ aꞌowaꞌ, betah hililiꞌ.
25 Eaꞌ Jisas naꞌipam naꞌi, “Hapif ipeꞌinai nape ani?”
Amom ombal maham ukup hiahawep. Eaꞌ mandaꞌipama maꞌi, “Anen epen ami? Naꞌipa fufini embel sameꞌana sagahapifana.”
Jisas nandaꞌ anona aman ambagof awami magapaunai boꞌona
(Mt 8:28-34; Mk 5:1-20)
26 Aꞌi owaꞌ main, Jisas naloma alipumi mafeꞌ mataga anagon esis Gegesa sagapoma, anamba nape waꞌol dumb fisanamb itap apamba Galili. 27 Eaꞌ Jisas nakwaha bot nisilaꞌ nafeꞌ akata, anona aman nagape taun inimbai nafiꞌmai anen. Anom ambagof awami mapaona. Anen ina nowahoꞌ anef lowaf nape andeandeꞌ anota ipat, owaꞌatin. Fowaꞌ anen aona nape atapina nafiꞌi nafiꞌi nataga deiꞌ. Nape nafeꞌ wandelef matmati atom. 28-29 Anona ambal aunai nahapilana tatalaꞌina. Esis sombaloꞌana sumafiana dondol sandaꞌ seni hankap sowaꞌana lagof boꞌwagah, owaꞌ, owaꞌatin. Nahapeꞌam atin. Eaꞌ ambal anamba aunai nofaꞌana nafeꞌ anamba epes akagoma.
Aman anamba nafiꞌi nati Jisas, goꞌala nalef nafiꞌi nindiwa nembawa notawa felefeleꞌma boꞌwagah ananigahi. Eaꞌ Jisas naꞌipana dindinip naꞌi. “Inaꞌ ambal aunai kwaha aman anamba foꞌo.”
Eaꞌ nofalana mehip aꞌowaꞌ naꞌi, “Jisas, inaꞌ Nogamana dembinai God nagape ilif endilisii, inaꞌ naꞌi nendaꞌ maina aeꞌ? Aeꞌ aꞌipina endilisi gani ilifa agol Godi, inaꞌ owaꞌi neseꞌe akafimia.”
30 Aꞌi owaꞌ main, Jisas nahaliꞌana naꞌi, “Agol ineꞌigili ami?” Anen naꞌi, “Agol aeꞌagili ambagof hiami.”
Deiꞌ main, ambagof awami hiami mafeꞌ mawisana.
31 Eaꞌ ambagof amamba gigal maꞌoh banagambel mofala Jisas atapim maꞌi, “Inaꞌ owaꞌi netofafa ofeꞌ owala nowaga launai owaꞌ nowala nogotambilia.”
32 Anamba anogof bogof hiagufi falutu faꞌ gwaꞌaisi anota damota felefeleꞌ. Eaꞌ ambagof awami mofala Jisas dindinip maꞌi, “Inaꞌ niꞌi ahoꞌma afaꞌ ofeꞌ uwis bogof gwagwafumba!”
Eaꞌ naꞌi ahoꞌmam, 33 makwaha aman anamba mawisi aꞌ mafeꞌ mawisa bogof. Eaꞌ bogof agwafomba hiagufi mafaꞌ mafeꞌ mehip mowala taꞌalogol awagoma tata, mowala embel dumb afum hiꞌalam.
34 Eaꞌ amom mugumafiagufi mati hiahaom magatagama bogof agwafumbai, mafaꞌ mafeꞌ maꞌipasa hiahaom amamba amom magatulumi amam nematawa sagape tauni sagail aofah felefeleꞌi wapani. 35 Eaꞌ esis safeꞌma sigati hiahaom amambai. Safiꞌmai Jisas sati aman anamba fowaꞌ ambagof awami magapaunai deiꞌ makwahona eaꞌ amboꞌona nomonas fasisi sapaona andeandeꞌ nowahoꞌ lowaf tol nape felefeleꞌma boꞌwagah Jisasi. Esis sati amamba aꞌ ombal mahas. 36 Eaꞌ epes isimba sagati hiahawes isimbai, saꞌipas saꞌi waf Jisas nandaꞌafa aman anamba fowaꞌ ambagof awami magapaunai deiꞌ amboꞌona wapani. 37 Eaꞌ epes hiasi sagape anamba Gegesai ombal mahas aꞌowaꞌ saꞌipa Jisas saꞌi, “Inaꞌ nekwaha apaꞌ a foꞌo.”
Eaꞌ Jisas nalota anota bot notanima nafeꞌ.
38 Aman anamba fowaꞌ ambagof awami magapaunai nahaliꞌ Jisas dindinip naꞌi, “Aeꞌ aꞌi efeꞌ elomena.”
Owaꞌ Jisas nasapaꞌana naꞌi, 39 “Inaꞌ tanima foꞌo wambel ineꞌimbili, newalapa basefa hiahaom hiami God nandaꞌmenam ineꞌi.”
Eaꞌ aman anamba nafeꞌ nawalapa basefa hiahaom amamba ma amam nematawa hiasi sagape taun inimbai hiꞌalasa hiahaom Jisas nandaꞌmanam anini.
Jisas nandaꞌ nematawa biawa boꞌowa. Anoꞌw Jairus nogamana kwaloma anoꞌw aowas luꞌunai nandaꞌakwi
(Mt 9:18-26; Mk 5:21-43)
40 Jisas notanima nafiꞌi, anis amam nematawa hiasi sape sohafana. Eaꞌ sandaꞌmana nemaf buꞌwafi sandagalama nagafiꞌi. 41-42 Ama main, anona aman nataga agilinama Jairus. Anen nugumafi ipat esis Juda sandakolasatai. Nogamana nemataꞌw atotoꞌw afagof akwaꞌugufi 12-pelaiguf felefeleꞌ kwaꞌi kogaꞌ. Eaꞌ nindiwa nembawa notawa felefeleꞌma boꞌwagah Jisasi, nahaliꞌana dindinip naꞌi, “Inaꞌ nifiꞌi ipat aeꞌatai.”
Jisas nafeꞌ esis amam nematawa hiasi safeꞌ salipana dogw. 43 Anen ataꞌ nafeꞌ atin, owaꞌ, anoꞌw nemataꞌw kwafiꞌi felefeleꞌma alafuga ananigai. Aowas awasini nandaꞌakwa kwape gamba atapiꞌw afagof 12-pelaiguf. Otamba akoꞌumbai basa bewala hiꞌalambama kwagatala dokta hiami, apaꞌ ina anom laꞌifima mondaꞌakw kogataga boꞌokw, owaꞌatin. 44 Eaꞌ kwafeꞌ kwasa lagola saket Jisasi daꞌmalifitama. Kwandaꞌas naꞌamba, kwafalis atin esimbel aꞌ masoꞌ, eaꞌ ina ataꞌ maluwi wapani, aꞌ owaꞌatin.
45 Eaꞌ Jisas nahaliꞌas naꞌi, “Ami nasa lagola aeꞌ?”
Eaꞌ esis hiasi saꞌi atin atin saꞌi, “Aeꞌ owaꞌ.”
Eaꞌ Pita naꞌi, “Dembinai, epes hiasi isimba salutu salipina, esis safeꞌ gol inaꞌ.”
46 Owaꞌ Jisas naꞌipas naꞌi, “Aeꞌ ameꞌ banagami aeꞌami makwahowe mafeꞌma mondaꞌ anin epen boꞌwen. Aeꞌ egawa anin epen nasa lagol alop aeꞌapi.”
47 Eaꞌ nemataꞌw akwamba kogawa akoꞌw ina atiasi kondambahoꞌw ma anen, owaꞌ. Naꞌamba akoꞌw bolalaꞌw kwafiꞌi kowafa kotawa itap felefeleꞌma boꞌwagah ananigahi ma naep amam nematawa hiasii. Eaꞌ kwawalapa basef kofagefa akwaꞌufi ma deiꞌ kwagasa lagola anen. Eaꞌ kwaꞌi, “Aowas aeꞌani ahiꞌalan kwafalis atetef.”* Lu 7:50
48 Jisas naꞌipaꞌw naꞌi, “Nogame, deiꞌ inaꞌ eaꞌ nahapifa aeꞌ banagiwai. Isimba atis deiꞌ andaꞌena boꞌwena. Inaꞌ foꞌo opaf ineꞌifi fope awanef.”
49 Anen ataꞌ naꞌi atin owaꞌ, anona aman nakwaha ipat Jairusi nafiꞌi naꞌipa Jairus naꞌamba naꞌi, “Nogamena ineꞌikwi a kwagaꞌ eaꞌ. Naꞌamba ina nendaꞌ Dembinai Tisa nofoꞌo nomaꞌw kohana, owaꞌ, hapaimi.”
50 Owaꞌ Jisas nameꞌas naꞌipa Jairus naꞌi, “Inaꞌ ombal mehena, owaꞌi. Inaꞌ nihapifi atin, ama atiasi nogamena ineꞌikwi kogosafel wapani.”* Lu 7:13
51-52 Eaꞌ Jisas nafeꞌ nataga ipat Jairusi apaꞌ ina naꞌi ahoꞌma amam nematawa hiasi suwis ipat sogalomana, owaꞌ. Naoꞌwa Pitai Jon Jems atom maloma maꞌmaꞌwi ahamaꞌw atis safeꞌ sawis salomana. Esis amam nematawa hiasi sape salef sandaꞌagamaꞌw aꞌowaꞌ.
Owaꞌ Jisas naꞌipas naꞌi, “Ipaꞌ ina pelef, owaꞌi. Tol pepe. Akoꞌw ina kwagaꞌ dogw, owaꞌ. Kwaꞌoh atin.”
53 Eaꞌ esis sandaꞌiafana kwapeteꞌ. Esis sogawa akoꞌw kwagaꞌ endilisi.* Lu 7:14
54 Owaꞌ Jisas nahapila lagol akwaꞌugili nofalaꞌw naꞌi, “Saꞌukwi, inaꞌ safel.”
55 Eaꞌ ambal akwaꞌuli lotanima lafiꞌi lawisaꞌw wapani kosafel kwafalis. Eaꞌ Jisas naꞌipa esis mamasaꞌw naꞌi, “Ipaꞌ soꞌakwa anis gwaꞌaisi.”* Mk 7:36; Lu 5:14
56 Eaꞌ sati isimba, agogolalasis endilisi nomonas salasafeꞌ.
Naꞌamba Jisas naꞌipas dindinipa sogagiꞌma basef ananifi naꞌi, “Ipaꞌ ina piꞌipa anin epena hiahawes isimba, owaꞌi.”

*8:1: Mt 27:55-56; Mk 15:40-41; Lu 4:43, 23:49

*8:9: Ais 6:9-10

*8:10: 1 Pi 1:23

*8:15: Mt 5:15; Lu 11:33

*8:16: Mt 10:26; Lu 12:2

*8:17: Mt 25:29; Lu 19:26

*8:47: Lu 7:50

*8:50: Lu 7:13

*8:53: Lu 7:14

*8:55: Mk 7:36; Lu 5:14