10
Israel ina sofaꞌ waf usiꞌifi Godi, owaꞌ
Alipipai, okom aeꞌami maꞌias aꞌowaꞌ andabetena anaf God nofaꞌ esis Israel nokwahomas waf awafi sogotanimai. Aeꞌ egawa esis andeandeꞌ eaꞌ aꞌi isimba. Esis ukup pehafel aꞌowaꞌ sandaꞌ maol banagani ma sogaila God, apaꞌ owaꞌ esis ina sogawa basef Godi endilisifi andeandeꞌ, owaꞌatin. * Mt 5:17; Jo 3:18 3-4 Esis ukup mahamahasa waf God nandaꞌafi ma nogaꞌi apaꞌ epes usiꞌipai. Eaꞌ sandaꞌam sandawalapa waf usiꞌifi asasifi atefa sagaila muꞌuli inimba God nagasoꞌ Mosesani. Eaꞌ esis ina safeꞌ lafela Goda nogaꞌi apaꞌ epes usiꞌipai, owaꞌatin. Apaꞌ Krais nafiꞌi nataga eaꞌ. Isimba atis deiꞌ apaꞌ ina ataꞌ mape lafela muꞌuli inimba, aꞌ owaꞌatin. Anen nafiꞌi nandawalapa amam nematawa mamahisa sagahapifa anini eaꞌ deiꞌ God nofalas naꞌi esis amam nematawa boꞌwes hililiꞌi.* Ro 7:10; Ga 3:12
Waf afamba epen nagaila muꞌuli inimba ma God nagaꞌi anin usiꞌini, Moses fowaꞌ nagaꞌias naꞌamba naꞌi, “Epen ami nendaꞌ waf afamba hiafi andeandeꞌ hiꞌigalafi, anaf anin nefaꞌ ambal namili ma nigaila muꞌuli inimba.”* Diu 30:12-14
Apaꞌ waf epen nagahapifanai God naꞌi anin usiꞌini, waf afamba fagaꞌias naꞌamba faꞌi, “Ipaꞌ owaꞌi ukup pendandaꞌ ma nelelemb ipeꞌilimbi piꞌi, ‘Anaf ami nefeꞌ nelota heven?’ nihaliꞌ Krais nigisilaꞌi, owaꞌi.
“Eaꞌ ipaꞌ owaꞌi piꞌias naꞌamba piꞌi, ‘Anaf ami nefeꞌ newala wambel epes sagagaꞌii nihaliꞌ Krais notanimai.’ Naꞌambai wapani owaꞌi.”
Apaꞌ basef ifimba faꞌi main? Ifimba fagaꞌi naꞌamba faꞌi,
“Basef ifimba fape felefeleꞌma ipaꞌ, fape malogufi nelelemb ipeꞌisi.”
Basef apaꞌ magahapilafi mawalapef magaꞌiefi ifimba. Iꞌi ipaꞌ pewalapa basef ifimba alihif piꞌi Jisas anen Dembinai ma pihapifa God nelelemb ipeꞌilimbi piꞌi anen nasaꞌmana nogosafel matmat wapani, bola God nofaꞌai ipaꞌ wapani pitanimai pepe andeandeꞌ. 10 Deiꞌ main, apaꞌ mahapilif nelelemb apeꞌilimbi God naꞌi apaꞌ amam nematawa magataga beꞌepa hililiꞌ eaꞌi. Eaꞌ mawalapa hapif malogof apeꞌigufi God nofaꞌapa nokwahomapa waf awafi mutanimai mape andeandeꞌ.* Ro 9:33
11 Amamba siꞌi Baibel nagaꞌi,
“Epen mamahina nagahapifa anini, anaf epen inimba ina okom iwanim, owaꞌatin.”* Ap 15:9
12 Esis Juda saloma isimba owaꞌ Judaisia eaꞌ naꞌamba atin, God anen Dembinai atotona apaꞌ hiapaii. Eaꞌ anen natopalopapa nasoꞌapa waf buꞌwafi dowafa epes isimba mamahisa sogofala anini, * Joe 2:32 13 siꞌi Baibel nagaꞌi,
“Epes mamahisa sogaꞌi agol Dembinai ma sogofala anini, atiasi nofaꞌas nokwahomas waf awafi sotanimai.”
14 Apaꞌ iꞌi esis owaꞌ sohapifanaia atiasi sofalana sogawana siꞌi mama? Eaꞌ esis iꞌi owaꞌ semeꞌ basefanaea, atiasi sohapifana siꞌimama? Eaꞌ iꞌi anin epen owaꞌ niꞌipasa basef esisa, deiꞌ esis sogawef siꞌimama? Owaꞌatin endilisi. * Ais 52:7 15 Iꞌi God owaꞌ nosapaꞌi amam amambaia, deiꞌ atiasi amom mefeꞌ mowalapef miꞌimama? Owaꞌatin. Siꞌi Baibel nagaꞌi naꞌamba naꞌi,
“Awasi! Maol inimba epes sofaꞌi basef buꞌwafi aeꞌafi sogafiꞌii, inimba fasini endilisi aꞌowaꞌ!”* Ais 53:1; Jo 12:38
Esis Israel ina saila basef buꞌwafi Godi, owaꞌatin
16 Apaꞌ ina Israel hiasi saila basef ifimba buꞌwafi Godi, owaꞌatin. Fowaꞌ profet anamba Aisaia nagaꞌi naꞌamba naꞌi,
“Dembinai, anaf ami nihapila basef ifimba esis sogameꞌefa afaꞌi? Owaꞌatin.”* Jo 17:20
17 Eaꞌ apaꞌ mogawa, apaꞌ hiapai mameꞌ basef buꞌwafi eaꞌ ifimba atif fasaꞌmai hapif apeꞌini. Eaꞌ deiꞌ basef ifimba fataga ufiaꞌw maiꞌw? Ifimba fataga amom magawalapa basef Kraisi atom. * Sam 19:4 18 Apaꞌ aeꞌ aꞌias naꞌamba. Aꞌi esis ina sameꞌ basef ifimba buꞌwafi? Owaꞌatin. Esis sameꞌef eaꞌ, siꞌi Baibel nagaꞌi,
“Basef fafeꞌ fandahama walemb hielimbi fafeꞌagon hiꞌalagon.”* Diu 32:21
19 Aeꞌ etambel aꞌias. Aꞌi esis Israel sogawa basef ifimba aꞌa owaꞌ? Owaꞌatin. Sogawa eaꞌ. Moses naliꞌ nagaꞌi basef ifimba naꞌi,
“God naꞌi, ‘Aeꞌ efaꞌ anis amam nematawa falafisi, esis ina epes banagasi anep miniꞌap endilisipi, owaꞌ. Aeꞌ ifaꞌasi etopalopas falafis anaf ipaꞌ kowolepama waf buꞌwafi aeꞌ endaꞌmasaf esisi. Aeꞌ ifaꞌai epes isimba owaꞌ sogogawaia eaꞌ anaf ipaꞌ pinifalis pendaꞌ megahohas.’ ”* Ais 65:1
20 Apaꞌ Aisaia ina ombal mahana ma naꞌiam nagawalapam, owaꞌatin. Anen nawalapam naꞌiam alihim naꞌamba naꞌi,
“Epes isimba owaꞌ sogolaoma aeꞌia, deiꞌ satolowe eaꞌ. Epes isimba owaꞌ sogahaliꞌasa aeꞌia, deiꞌ ataga andawalapa esis.”* Ais 65:2
21 Apaꞌ esis Israel ina naꞌipas naꞌamba, owaꞌatin. Anen naꞌipas anif daif naꞌi,
“God naꞌi, ‘Epes isimba sandaꞌ duꞌwanigai sogosambala basefi. Nogota lautai aꞌowaꞌ aeꞌ efalas andaꞌ lagof iwaulasi. Owaꞌ, owaꞌatin.’ ”

*10:2: Mt 5:17; Jo 3:18

*10:3-4: Ro 7:10; Ga 3:12

*10:5: Diu 30:12-14

*10:10: Ro 9:33

*10:11: Ap 15:9

*10:12: Joe 2:32

*10:14: Ais 52:7

*10:15: Ais 53:1; Jo 12:38

*10:16: Jo 17:20

*10:17: Sam 19:4

*10:18: Diu 32:21

*10:19: Ais 65:1

*10:20: Ais 65:2