Parik Iri Shup Douk Jon Nenekap Iri
Banenyi Baraen Um Enyudok Baraen Jon Narik Neneken Iri
1:1-4 Jon nakripesh Iruhin ananin baraen aria neshuhur um shunadudareh.
1:5–2:29 Iruhin anan douk natrugun abom iri. Aria apak ta mupe bogaragun um, um agundok munek yopihi aih aria urkwip punawasham ihishmorim arpesh um.
3:1-24 Apak douk mape Iruhin ananish batowish. Aria douk apak ta urkwip punawasham apakish ashukenyish owashish. Aria shenek yoweishi inahos iri arpesh douk Satan ananish aria shape shenek yoweishi inahos namudok atin.
4:1-6 Apak ta munek skelim ihishmorim arpesh aria mudukemesh um eshesh Iruhin ananin Mishin nyapenyesh aka Satan ananin nyapenyesh.
4:7–5:21 Iruhin neshopoki ananin Nuganin nanaki agundok atap um nuyabigap ehudok aih um urkwip punawasham arpesh um. Apak ta munek bilip um anan aria mutukur anan atun um nunekap mupe wosik abom ihih nyumneh.
1
Krais Anan Douk Baugos Um Arpesh Shupe Wosik Abom Ihih Nyumneh Um
1 Apak menekumep baraen apudok shup aria makripep um anudok arman douk nanahwar um Baraen iri. Anudok arman Baraen, arpesh douk ta shuran shunek bilip aria shupe wosik abom ihih nyumneh. Seiwok sagomatin watak baugos um anudok arman Baraen douk nape. Aria apak douk memnek um agundok anan neyagwreh um aria matrun apakis nabes. Adur apak douk matrun aria masuhwan apakis wis. 2 Anan douk natogur yopugunum aria matrun. Aria apak douk meyagwreh adurin atin baraen um anan aria makrip ipak um anan douk baugos um arpesh shupe wosik abom ihih nyumneh um. Seiwok nani Yain hape aria douk natogur yopugunum matrun. 3 Apak douk matrun, memnekan um neyagwreh um aria douk makrip ipak shopunek. Makripep um ipak puni apak mupe atugun abom musuhw atin. Aria apak muni apakin Yain Iruhin nini ananin Nuganin Jisas Krais mupe atugun musuhw atin. 4 Apak mowem enyudok baraen um apak muni ipak ta munadudareh abom muriguk.
Apak Ta Mupe O Murahaen Bogaragun Um Atugun
5 Enyudok baraen douk apak memnekan nakriyen iri douk enyudok douk makripep-umen. Baraen enyudok. Iruhin anan douk kabi lait um. Yopuyopun abom aria madae karowihi um anah arukwutigunih aih hupenyan um, aria ta mare nenek enesh yoweishi inahos uwe, uwok meyoh. 6 Aria apak mukri apak mani Iruhin mape atugun masuhw atin, aria abudok nyutob apak mupe arukwutigun um agundok munek eneshenesh yoweishi inahos um, namudok douk munek rohw. Madae mugipesh adurin atinyi baraen uwe, uwok. Aria enenyenen mape meneken iri madae adurin uwe, uwok. 7 Aria ta apak murahaen bogaragun um, um agundok munek enenyenen yopunyi kabi anan nape bogaragun um yopun abom um, namudok adur apak mape atugun masuhw atin abom. Aria ananin nuganin Jisas ananibor owishibor bakrup apakiruh aparuh aria nenekap matogur yopupari madae enesh yoweishi inahos shupenyap uwe, uwok.
8 Aria apak mukri apak eneshenesh yoweishi inahos uwok enesh shupenyap um uwe, namudok douk munek rohw abom um apak kanak. Munek rohw aria adurinyi baraen douk madae enen nyupenyap uwe, uwok. 9 Aria ta apak muwereh eneshenesh apakish yoweishi inahos mukrip Iruhin um, anan douk yopini aria ta nugipesh ananin adurin atinyi baraen seiwok nakriyen iri. Ta nunek yopinyi mour abom um nukweshih apakish yoweishi inahos aria nugabeyap nunekap mutogur yopishi arpesh abom. 10 Aria apak mukri apak madae munek enesh yoweishi inahos um uwe, namudok douk makri Iruhin anan napeum nenek rohw iri. Aria ananin baraen douk madae nyupe apakiruh aparuh uwe, uwok.