1 Jisas kako Anɨtumo ose ulahonɨngki kako kakoe inomokomoyo sohwonaꞌni nakwo oso hopo sopo ulɨkoꞌmentani mijo weꞌe Kitɨlon wekentani nongkihntaꞌni iyo uyo syoho sopo umentɨhwonefoho. 2 Jutas kako Jisasɨmneꞌno tokoyoꞌofo yone sohwo kako oso iyo uyo syoho soponeꞌno huno unyo hweho. Hwapɨngoso sɨkuno piꞌnɨngo engo somo Jisas kakoe inomokomoyo sohwonaꞌnnonji oso hopo sopo neꞌno umotohwonefoho.

3 Hwe yofe engo tajo ango syohoꞌnjo sohwanji aꞌamu Falisi sohwanji hofɨko aꞌamu hwapɨfe tɨfoꞌnjo sohwanji aꞌamu itokusoꞌnjo sohwanji Jutasɨꞌnji uhwojahonɨngkofi Jutas kako oso iyo uyo syoho hopo soponeꞌno ipemotawomentisofoho. Hofɨko kwefohoꞌnji sikilohoꞌnji yoꞌmayo ikujoho soꞌnji motapmmentohofofoho. 4 Jisas kako kakineꞌno yoꞌmayo uꞌmane soꞌno sɨmoꞌmo huno nto unyo sohwo humentanjopo aꞌamu sohwamo nuhwonɨtɨmanto ulɨmento, Sekwo tɨhuneꞌno tɨpeelokwofo. 5 Ose ulohonɨngkahonɨngki hofɨko ulɨmentohofi, Nakwo Jisas Nasalet mtaꞌango sohuneꞌno tɨpeelokuhwono. Ose ulahonɨngkofi Jisas ulɨmento, Ngko olo huhwoꞌnyoho. Ose ulɨmentisofoho. Jutas oso aꞌamu Jisasɨmneꞌno tokoyoꞌofo yone sohwo oso aꞌamu huhwo sohwanji humohumantisofoho. 6 Jisas kako olo huhwoꞌnyoho ulɨmentiso soꞌno hofɨko iyoho yontɨfi hohokuhano asohosile weꞌenepi wentɨfi hwahopo pɨwahuꞌmentohofofoho. 7 Oseso Jisas kako apaꞌno ulɨmento, Sekwo tɨhuneꞌno tɨpeelokwofo. Ose ulahonɨngki hofɨko ulɨmentohofi, Jisas Nasaletnntaꞌango sohuneꞌnefoho. 8 Ose ulahonɨngkofi Jisas ulɨmento, Nto selohefoho. Ngko olo huhwoꞌnyoho. Sekwo ngkimo wantɨmantɨfi pohofɨhwasiꞌmanji nje inomokomoyo lohwamo tɨmoꞌnohini fohonɨhwatɨmno. Hofɨko wahumpopɨfe. Jisas ose ulɨmentisofoho. 9 Sɨmoꞌmjo Jisas kanɨngkwohumo ole nto ulɨmento, Oso aꞌamu ntapmmentohino sohwamo ngko mokosyohumamote soꞌno angaꞌno ngkineꞌno hohujo nɨhuꞌnahone mikinjanɨmofefoho. Oso hungkuno ulɨmentiso soꞌno huno ikwesyafɨsyonto wahumpopɨfe ulɨmentisofoho. Oso hohosohonta oso hungkuno kakoe inomokomoyo sohwamneꞌno ulɨmentisoso ne imoꞌnɨmentisofoho.

10 Saimoun Pita kako nohumanto hwakuhwajo iwosɨpemaꞌnonto aꞌamu fihwoe haloho angahohnjo somo lokuꞌmentisofoho. Lojwahonɨngki halohoso pɨwahuꞌmentisofoho. Oso hwe huhwo sohwo kako aꞌamu yofe engoꞌnjo tajo ango syohoꞌnjo sohwoe syoho ulohofiyo hweho. Kakoe yofeso Malɨkos. 11 Pita ose yahonɨngki Jisas ulɨmento, Jɨje hwakuhwajoso asosoꞌmo fotofahinyo. Kɨko huno pipi kiyalofoho. Yoꞌmayo tango nje Mpohwo, Nje hwomu womano, lɨmentisoso ngko womaꞌmo. Osoꞌno hwakuhwajoso fotofahinyo.

12 Oseso oso aꞌamu itokusoꞌnjo sohwanji aꞌamu Jutafe hwapɨfe tɨfoꞌnjo sohwanji hofɨkoe hwe engo sohwanji hofɨko Jisasɨmo aho kentɨfi kakimo impe intokwomentohofofoho. 13 Sɨmoꞌmo hofɨko Anasɨyeono motawomentohofofoho. Anas huhwo sohwo kako Kaiyofasɨye kanengkwohweho. Kaiyofas sohwo kako oso soswo somo aꞌamu tajo ango syohoꞌnjo soꞌno yofe engo maꞌmentisofoho. 14 Oso Kaiyofas huhwo sohwo kako aꞌamu Juta somo ole ulɨmento, Yahino itoꞌnohinoso olenoho. Olo hwe angaꞌnohino lohwo kako hwe moyaꞌmi hopiꞌnonohino somneꞌno ufoꞌmayoꞌne poyo wapeꞌnono. Ose nto ulɨmentisofoho.

15 Aꞌamu sohwa hofɨko Jisasɨmo ipemotosontanɨngkofo somo Saimoun Pitaꞌnji ngko Jounꞌnnonji nekwo Jisasɨmo inɨngkasɨmentɨhwoyofoho. Oso hwe yofe engoꞌnjo tajo ango syohoꞌnjo sohwo kako ngkineꞌno huno uyo soꞌno ngko Jisasɨꞌnji oso hwe yofe engoꞌnjo sohwoe tojo somo humentohefoho. 16 I osoꞌno Pita kako mempo hohntaꞌni hokuꞌyo sopo fosyohumamentisofoho. Oseso ngko hwe yofe engoꞌnjo huno ninyo sohwoꞌni ngko aꞌmu hokuꞌyo mokosyohumayo simo Pitamo ipemotasyuyoꞌne ulɨmentohefoho. Oso aꞌmu hisi Pitamo ipemotaswonto 17 Pitamo ulɨmento, U, kɨko huhwosi olo hwe lohwoe inomokomoyo hwosilɨkeno. Ose ulahonɨngki Pita ulɨmento, Awonoho. Ngkoꞌmaho. Ose ulɨmentisofoho.

18 Oso ango soponjo syoho ulohofiyo soꞌnji aꞌamu hwapɨfe tɨfoꞌnjo sohwanji kwongkwongo usahonɨngki toho intofontɨfi aꞌapaho toho imokinɨmentohofofoho. Pita huhwoꞌnji hofɨkoꞌnji nolohofontɨfi aꞌapaho toho imokinɨmentohofofoho.

19 Hwe yofe engoꞌnjo tajo ango syohoꞌnjo sohwo kako Jisasɨye inomokomoyo sohwantnneꞌno yoꞌmayo hungkuno Jisas hofɨkimo lutɨhwawoꞌnɨngkiso soꞌntnneꞌno Jisasɨmo ulohonɨmentisofoho. 20 Oseso Jisas ulɨmento, Ngko hwe moyaꞌmi hopiꞌnonohino somo utɨhwaꞌnyoponohini lutɨhwawoꞌnɨngkohe hwoꞌnyoho. Engolopohamo ngko Anɨtuye tajo ango engoꞌnjo soponjo tajo ango weꞌeso aꞌamu Juta uhuꞌmokuwoꞌnɨngkohofo sopo nje yoꞌmayo hungkunoso lutɨhwamentohefoho. Ngko hungkuno hiyasoꞌmo majofoho. 21 Osoꞌno kɨko ngkimo pehoꞌno ntohonantokuno. Kɨko oso aꞌamu nje hungkuno upaꞌnɨwoꞌnɨngkohofo somo ulohonyo. Oso hungkuno ngko lɨwoꞌnɨngkoheso hofɨko huno moiꞌwoꞌnnyofoho.

22 Ose ulahonɨngki hwe hwapɨfe tɨfoꞌnjo fihwo kako Jisasɨꞌnjopo lohofonto Jisasɨye manjijohopo hwanɨngo fonjonto ulɨmento, Kɨko olo hwe yofe engoꞌnjo lohumo hungkuno oso paꞌnyoso nulohotoho. Itoꞌnohini uso. 23 Ose ulahonɨngki Jisas ulɨmento, Ngko hungkuno wonyo ulohe soꞌno lanɨfonjohino. I ngko hungkuno wonyo uloheꞌmanji kɨko olo aꞌamu lohwamo uso. I ngko hungkuno nehopi uloheꞌmanji pehoꞌne nɨfonjohino. Ose ulɨmentisofoho. 24 Oseso oso impe Jisasɨmo intoꞌmentohofoso Jisas intoꞌnowentanɨngki Anas kako oso hungkuno Jisasɨmo ulohonɨmentiso sohwo kako Kaiyofas hwe yofe engoꞌnjo tajo ango syohoꞌnjo sohwoepono lɨhwatɨmentisofoho.

25 Saimoun Pita aꞌamuꞌnji lohofonto aꞌapaho toho imokinontanɨngki aꞌamu huhwo sohwo ulɨmentohofi, Kɨko huhwosi kakoe inomokomoyo hwosilɨkeno. Ose ulahonɨngkofi Pita hwasyo hungkuno ulɨmento, Awonoho. Ngko kakoe inomokomoyo hwonɨꞌmaho.

26 Ose ulahonɨngki oso hwe yofe engoꞌnjo sohwoe syoho ulohofiyo nomꞌne sohwo kako oso aꞌamu Pita kako haloho lojwaoꞌmentiso sohwoe aꞌamu sohwo kako Pitamo ulɨmento, Ou, nehopi. Kɨko Jisasɨꞌnji oso iyo uyo syoho sopo nohumentanɨngkini ngko kohonɨngkohe hwosoho. 27 Ose ulahonɨngki Pita apaꞌno ulɨmento, Awonoho. Ngko osoho hwonɨꞌmaho. Ose ulahonɨngki yɨhufo tosɨka yokaso oso hohosohonta hoꞌnɨmentisofoho.

28 Aꞌamu sohwa hofɨko Kaiyofas ntaꞌni Jisasɨmo utɨmantɨfi oso hwe engo aꞌamu Loum mtaꞌango sofe hwe engo hwaho mokosyohumayo sohwoe ango engo soponeꞌno imɨngo ne hosɨwo hosɨwe iyo soꞌnji Jisasɨmo ipemotamentohofofoho. Oso aꞌamu huhwo sohwa hofɨko hofɨkoe Anɨtu Kako Aꞌamu Isɨlael somo Uyakoloꞌmentiso somneꞌne Syafɨsiyo Sɨkuno Engo *Mt. 26:2 enjwa soꞌmo fehonoloꞌmongkomaho. iyoho humayo somneꞌno ntoꞌno esyohumayoꞌne hofɨkoe he aꞌapaho yoꞌmayoso mijo nto yatɨkuꞌmentohofofoho. Osoꞌno hofɨko huno ole syafɨhuꞌmentohofi, Aꞌamu Loum nakwoe yahinomo minɨngkayoꞌnjo sohwafe angomo nakwo syukwato lohofɨhwosi kihoꞌnjo imoꞌnɨngkuhwasi nakwo elɨjwanyo engo sopo wopayo monanehwono. Ose syafɨsyontɨfi mempo hohntaꞌni humamentohofofoho. 29 Oseso oso hopo sopo nohumentanɨngkofi Pailot mempono noswaponto ulɨmento, Sekwo olo hwe lohumo olo hungkuno ntoꞌno mɨhwajiyo ango loponeꞌno pehoꞌno ipemotapohofɨhwolo. Peho wonyo imasoꞌneto. 30 Ose ulahonɨngki hofɨko ulɨmentohofi, Olo hwe lohwo kako yahino wonyo miyoꞌnjo yontentesi nakwo olo ango lopo kikiyepono mipemotapɨhwonesohilo. 31 Ose ulahonɨngkofi Pailot ulɨmento, Sekwo aꞌamu Juta soku sekwoe honɨngkano hungkuno somneꞌno huno syafɨsyɨkuji kakoe hungkunoso ntoꞌno mɨhwatɨmno. Ose ulahonɨngki aꞌamu sohwa ulɨmentohofi, Sekwo aꞌamu Loum sohwasi nakwo aꞌamumo fonjasiyoꞌno honɨngkano somo pɨjwonaofɨwoꞌnɨngkohofofoho. †Aꞌamu Loumjo sohwa Jutafe hwaho mokosyohumayo hwafoho. Osoꞌno hofɨko hungkuno mɨhwajiyoꞌneso yono lɨmentihofofoho. Osoꞌno hofɨko honɨngkano yokumpohnꞌnyo hoꞌnahumentohofofoho. Aꞌamu angaꞌno mapeꞌnyoso wopɨngofoho. Ose ulɨmentohofofoho. 32 Hohonta Jisas kako kakoe aꞌamu somneꞌno kako poyo imoꞌnone soꞌno lutɨhwamentiso sohonta kako aꞌamu Loum sohwa aꞌamumo iyo hwojiyafɨkuꞌnnyo sopo fonjintoꞌofahumotofo hopaso wapeꞌnɨmontonoho nalɨmentisofoho. Oso hohosohonta oso hungkunoso ne umoꞌnɨmonteꞌno yohoho.

33 Oseso Pailot kako ango engo somo apaꞌno swonto Jisasɨmneꞌno joho lɨtɨmanto ulɨmento, Kɨko aꞌamu Jutafe Hwe Engo hofɨkoe hwaho mokosyohumayoꞌne hwosilaho. 34 Ose ulahonɨngki Jisas ulɨmento, Oso hungkuno ntohinoso jɨje huno mtaꞌni lantohino. I aꞌamu Jutaso hofɨko kilɨmalofoyoho kantohino. 35 Ose ulahonɨngki Pailot ulɨmento, Ngko aꞌamu Juta hwoꞌntaho. Jɨje temtitofo Juta sohwanji hwe yofe engoꞌnjo tajo ango syohoꞌnjo sohwanji hofɨko ngkiyepono kumotapohofo. Kɨko peho imahnnoꞌneto. 36 Ose ulahonɨngki Jisas ulɨmento, Ngko aꞌamumo mokosyohumayoso olo hwaho lopoꞌmaho. Oꞌo, ngko olo hwaho loponjo aꞌamumo mokosyohumayoꞌne hwoꞌntontosi nje inomokomoyo sohwa hofɨko aꞌamu Juta sohwanji fongkiꞌnɨfijoso aꞌamu Juta sohwa monɨmafɨkutnnesohilo. I osoꞌno ngko aꞌamumo mokosyohumayo kɨko paꞌnyo hwonɨꞌmaho. 37 Ose ulahonɨngki Pailot ulɨmento, Oseꞌmanji kɨko hwe engo aꞌamumo mokosyohumayo hwosoho. Ose ulahonɨngki Jisas ulɨmento, Kɨko hwe engo aꞌamumo mokosyohumayo hwosoho ntohinoso hungkuno ntoꞌnohinoho. Ngko olo hwaho lopo imoꞌnɨmentoheso syoho angaꞌnohino hungkuno nehopiꞌnohino lɨjwaofoꞌneso imoꞌnɨmentohe hwoꞌnyoho. Aꞌamu hofɨko hungkuno nehopiꞌnohino umoꞌnɨwoꞌnɨngkisoso nje hungkunomo haloho pewoꞌnɨngkohofofoho. 38 Ose ulahonɨngki Pailot ulɨmento, Aꞌamu hungkuno ne soꞌno huno unyoso tɨhwolo. Ose ulɨmentisofoho.

Pailot ose ulonto kako mempono aꞌamu Jutafepono apaꞌno noswonto ulɨmento, Ngko olo hwe lohwo kakoe yahino wonyoso motɨpɨhwonɨngkiyohono. 39 I osoꞌno sekwoe yahinoso ole woꞌnnyofoho. Anɨtu Aꞌamu Isɨlael somo Uyakoloꞌmentiso somneꞌno Syafɨsiyo Sɨkuno Engo ‡Mt. 26:2 enjwa soꞌmo fehonoloꞌmongkomaho. iyoho humayo somo sekwoe aꞌamu angaꞌno impoꞌango mtaꞌni isɨhutofomayoꞌne jomo ntɨwoꞌnɨngkohofɨhwasoho. Oseso ngko sekwo aꞌamu Juta sokuye olo hwe engo lohumo usɨhutofonehwajono lasemoꞌnɨngkohoho. 40 Ose ulahonɨngki hofɨko mango engo mohmꞌno ulɨmentohofi, Olo hwe lohumo nusɨhutofohotoho. Oꞌo, kɨko Mpolapas sohumo usɨhutofo. Mohmꞌno ose ulɨmentohofofoho. Mpolapas huhwo sohwo kako aꞌamumo fonjasyonto aꞌamufe yoꞌmayoso hufo maꞌmojo hweho. Hwe wonyo hweho.