IZESUꞌ EVENELE ZUHO TESALONIKA NUMUNO EBEKUꞌ MINAVEMUꞌ LUHUVO NITEꞌ NABA 1 PAULOꞌ GIZE-NGIDINEꞌ
IZESUꞌ EVENELE ZUHO TESALONIKA NUMUNO EBEKUꞌ MINANIꞌ NETI LUHUVO NITEꞌ 1 & 2
Pauloꞌ Tesalonika Eveneliti Luhuvo Niteꞌ Gize-nGidineꞌ Gomuꞌ Gataaꞌ Gamazi
Tesalonika nene Makedonia misubouꞌ numuno ebeꞌ naba minineꞌ. Aꞌmine nene guvo noso avitoꞌ minavo misubo vaitatiꞌ nene sipi mukiꞌ aꞌmida igaꞌ aniꞌ. Tesalonika aleve nene ve nabaꞌine engiꞌ gizebo i-ngidilizave ha di otaaꞌ aha Loma veti guveꞌinesi ve naba neꞌmo misuboꞌine nene gizebo o minineꞌ. Neꞌmine ogavosa ingine nene Loma veti louꞌnidoꞌ ha gili dalizadoꞌ o minineꞌ. Tesalonika aleve nene Zuda ve minamaniꞌ. Gamazi nene nGiliki gamaziutiꞌ laaꞌ aniꞌ idoꞌ oꞌmosote ve li aꞌinedunuꞌ liliꞌ aniꞌ initetoꞌ eꞌmeti gili eleꞌvoleꞌ igaꞌ aniꞌ. Oꞌmosoꞌmi louꞌ gamaziꞌveloꞌ lisiheꞌ amineꞌ suno di ato atoꞌ monovo daaꞌ aniꞌ. Tiꞌ igaꞌ aniꞌza Zuda ve ma nene aꞌminguꞌ igi ingi monaaꞌ aniꞌ. Aꞌminete monoꞌ numuno ma gizaniꞌ. Eveneꞌ mukiꞌ memeꞌ ize zopovodunuꞌ lavolavo liliꞌ igaꞌ aniꞌ. Tiꞌ igaꞌ aniꞌ nene ingine bisinisiꞌine minineꞌ.
Oꞌmosoꞌmo aposolo Pauloꞌni nene Zuda ve minamaniꞌ heta atoꞌ ve nene Izesuꞌnimuꞌ lo-ngemelive lo imiselineꞌ. Imiselavo tiꞌ ogo lo-ngemeꞌmo mone mone oꞌmo vo Tesalonikala hetelineꞌ. Hetelo mine do vida nadiꞌ ihe nemuꞌ nene Aposolo lakaꞌni 17 idoꞌ goholo 1 nelotiꞌ 19 neuꞌ gato gelelesane. Tesalonika aleve Izesuꞌnimuꞌ lo ngemeꞌ ngemeꞌ ivo eveneꞌ lingelatiꞌ ma gili eleꞌvoleꞌ aniꞌ. Olihe lo ngemeꞌ ngemeꞌ olosa neivo lineꞌ gamazi gili damave nene Izesuꞌni eꞌmetave nemuꞌ ngizeboloꞌ molaniꞌ. Tiꞌ ogavo Pauloꞌ Tesalonika ebeꞌ hulo volosa ineꞌ.
Tesalonika hulo numuno ebeꞌ ngomo ma gulive Belia nela vineꞌ. Aꞌmida gamene ngomo ma mino Izesuꞌ monovoꞌvemuꞌ lo-ngemeꞌ ngemeꞌ ogo neivo Zuda ve Tesalonikala minaniꞌ nete gili gohi aꞌmida igi ganala di imaniꞌ. Neꞌmine angumuꞌ Pauloꞌ aza Belia ebeꞌ hulo numuno ebeꞌ naba gohi ma Atena nela vineꞌ. Pauloꞌ nene Izesuꞌ zuho Tesalonikala minaniꞌ nemuꞌ Zuda vesi eveneꞌ masi Tesalonika minaniꞌ nete ngibili ngeleꞌmizi goloso nahe lo agae lo gopo gala gelo minineꞌ. Aꞌmine Tesalonikala nadiꞌ igi nizahe vo ningezo lo Pauloꞌ Timoteoꞌni imiselineꞌ. Pauloꞌ aza Atena numuno ebekuꞌ nene ngomo ma monoꞌ lo-ngemo mino gohi numuno ebeꞌ naba ma minineꞌ gulive Kolidi neuꞌ vineꞌ. Aꞌmida neivo Timoteoꞌ aza Tesalonika ebekukotiꞌ tineꞌ molo aniꞌ. Ogo tiꞌ lo lineꞌ: Eveneꞌ nete Izesuꞌ zuho nene ngibili ngelemi di goloso nii-ngidaniꞌza Izesuꞌ zuho ingine amuzo mili Izesuꞌnimuꞌ gili eleꞌvoleꞌ igi nizave lo Pauloꞌni lo-imineꞌ. Idoꞌ Pauloꞌnimuꞌ li aza nene ha initeꞌ nimilizave lo monoꞌ gilave nene goꞌine izo soza saza nolane li nilave lo lo-imineꞌ. Monoꞌ gilave ma nene aka golosouꞌ vaaꞌ initeꞌ nene ha nidave idoꞌ monovo goloso palasa di nizave lineꞌ. Idoꞌ Izesuꞌ zuho ma nene hilangumuꞌ linge ma nene agae li mulumo gili-ngidi nizave. Izesuꞌ tineꞌ molalineꞌ gamene aꞌmine hilaniꞌ zuho nene nadilizahe li gili minaniꞌ.
Pauloꞌ aꞌmine gamazi gelo luhuvo niteꞌ gizo Izesuꞌ zuho Tesalonika ebekuꞌ minaniꞌ ne hulo-ngidineꞌ. Aꞌminguꞌ tiꞌ lo lo-ngimineꞌ: Lengiꞌ nene Izesuꞌnimuꞌ amuzo mili gili eleꞌvoleꞌ igi minaniꞌ nene laniteꞌ giluve lineꞌ. Idoꞌ Tesalonika ebekuko mino nalineꞌ initekumuꞌ geheni gono daniꞌ ma gililizave lo lo-ngimineꞌ. Idoꞌ eveneꞌ malotiꞌ initeꞌ haza ma damineꞌ nesi lo-ngimineꞌ. Aꞌminemuꞌ gililizaniꞌ nene Pauloꞌnimuꞌ evenelite goloso palasa gamazi laniꞌ nene gamazi gihile nomive li gililizave lo gelosa idoꞌ gopoꞌ napaꞌ moni eveneꞌ ma ne di gopo i-ngidamilo lo nesi lo-ngimineꞌ. Oꞌmosoꞌmi lulolavoꞌ igi mili monilizave lo lo-ngimineꞌ.
Idoꞌ aꞌmidotiꞌ nene Izesuꞌ zuho hilaniꞌ mamuꞌ nene gopo gaꞌine gilikelizave lo Izesuꞌ alineꞌ gameneuꞌ initeꞌ pataꞌ sotoꞌ ogo nadilihe nemuꞌ lo-ngimineꞌ.
Pauloꞌ aꞌmine luhuvo nene gizo hulavo gati gilaniꞌ nene Izesuꞌ mo geto alinekumuꞌ lihe li gili gonoꞌine dami ha mini eveneꞌ maliti numuꞌningutiꞌ noso niteꞌ nikaꞌ nikaꞌ i minaniꞌ. Tiꞌ igi minaniꞌ nemuꞌ Pauloꞌ gelo luhuvo niteꞌ gohi ma gizo hulineꞌ. Tiꞌ ogo Izesuꞌ alosa ilineꞌ gamene noalitivo initeꞌ ato atoꞌ sotoꞌ ilineꞌ nemuꞌ lo-ngimineꞌ. Idoꞌ gopo gaꞌine gili Izesuꞌ zuho liliꞌ amaniꞌ nete aniꞌ neꞌmine amilizave idoꞌ eveneꞌ ma nene vokuꞌ vokuꞌ li nami angiseꞌine gono disa nalizave lo lo-ngimineꞌ.
Mene gamazi nene gato ma nene luhuvo niteꞌ sitaꞌ Pauloꞌ Tesalonika alevetine gize-ngidineꞌ ma nene gato gele guno ozo.
1
Pauloꞌ Aza Izesuꞌ Evenele Noꞌnohoꞌ Ize-ngedo Lo-ngimineꞌ Gamazi
Pauloꞌ nazasi idoꞌ Siluvanokisi Timoteokisi laza Meteho Oꞌmoso idoꞌ Guvetesi ve Izesuꞌ Kilisitoꞌ eze evenele zuho lingine Tesalonika ebekuꞌ mulise milaaꞌ naniꞌ nene luhuvo niteꞌ gize-lengedelone losa luhuvo niteꞌ mene nogize-lingiduze. Ningilo. Nogize-lengedo Oꞌmosoꞌmo nasahili o-lengedavo hongu laminekuꞌ minilizave lo ezela noluve.
Tesalonika Aleve Gili Eleꞌvoleꞌ Igi Monoꞌ Akaloꞌ Vaniꞌ Monovoꞌine Nene Lamineꞌ Ineꞌ Gamazi
Laza lingine mukikumuꞌ ve lo gamene gamene Oꞌmoso opoꞌni lovoꞌ lovoꞌ ogaꞌ noune. Idoꞌ goseleꞌ lebelamivo lengikumukisi Oꞌmosola lo minaaꞌ noune. Ee, Meteho Oꞌmosoꞌmi veleloꞌ mini lingine Izesuꞌnimuꞌ gili eleꞌvoleꞌ igaꞌ naniꞌ neꞌmi gihileꞌve di sotoꞌ igi gono daaꞌ naniꞌ nemuꞌ idoꞌ lutine ngimi amuzo mili nasahiliꞌ i-ngidaaꞌ naniꞌ nemuꞌ idoꞌ Izesuꞌ Kilisitoꞌ ogo do luꞌ izeleseive li gilingili igi mini lutine di giliꞌ li hongu li minaaꞌ naniꞌ nemukisi gelo Oꞌmosola laaꞌ noune. Idoꞌ neze zuhokizo, Oꞌmosoꞌmo lulo lengeme neineꞌ mate, aza neniꞌ ve lo do kegese-lingidineꞌ nene gele nounako nemukisi opoꞌni laaꞌ noune. Monoꞌ gamazi lamineꞌ do vo lo-lingimuneꞌ nene haza gamazi loloꞌ amineꞌ ve. Oꞌmosoꞌmi Sikalahuꞌ amuzoꞌvesi neineꞌ nene sotoꞌ ogavosa gele eleꞌvoleꞌ o mino lo-lingimuneꞌ nemuꞌ Oꞌmosoꞌmo do kegese-lingidineꞌ nene mo gele none. Neꞌmine ogo laza lengikumuꞌ ve lo lengita monoꞌ gono do minuneꞌ gameneuꞌ ogo molo ogo minuneꞌ monovo nene langisetine mo ningi gili nizave. Monovote ningi gili unidiꞌmine unidiꞌmine igi Guvetesi ve idiꞌminesi igi minaniꞌ. Neꞌmine igi Oꞌmosoꞌmi gamazi gili gili eleꞌvoleꞌ igi gili di minikevo nemuꞌ amuzo mili goboni mili-lingidiꞌmi vi minangukisi Oꞌmosoꞌmi Sikalahuꞌ aza muludine do lamineꞌ ogo neivo muludinguꞌ lamineꞌ gili minaniꞌ. Lingine neꞌmine igi minaniꞌ nene gilii Makedonia misubouꞌ idoꞌ Akaia misubouꞌ monoꞌ gili eleꞌvoleꞌ avete lingine adiꞌmine igi lengeꞌmeti vaniꞌ ve. Idoꞌ Guvetesi veꞌmi gamazi nene lengitatiꞌ vo hutileꞌ ogo Makedonia misuboukisi idoꞌ Akaia misuboukisivoꞌ vivoba numudoꞌ namadoꞌ lingine Oꞌmosomuꞌ gili eleꞌvoleꞌ aniꞌ neꞌmi guvele nene buu lo vineꞌ. Buu lo vavo eveneꞌ mukiꞌ gili osuꞌ likeve. Nemuꞌ ma lo-ngemelonidoꞌ nomive. Eveneꞌ angiseꞌine veteteꞌ igi li sotoꞌ igaꞌ nave. Laza lengita vo mino gono dunivo neꞌmi gihileꞌve sotoꞌ ineꞌ nemuꞌ veteteꞌ igi lingine veꞌine gaꞌine nomineꞌ avazaha oꞌmoso niteꞌ gelekeleꞌ i-ngidaaꞌ igi minaniꞌ nene mehedine ngimi Oꞌmosola vi giꞌmizi velesi neive Oꞌmoso gihile gelekeleꞌ i-di minaaꞌ naniꞌ neꞌmi gamazi li sotoꞌ igaꞌ nave. 10 Idoꞌ neꞌmine igi lingine aꞌmine Oꞌmosoꞌmi gipele hilingutiꞌ do ote-dineꞌ nene Okulumokutiꞌ alingumuꞌ gizebo igi nizaniꞌ nemukisi veteteꞌ igi laaꞌ nave. Adoꞌ aꞌmine alingeꞌ gonitoꞌ vokunivo Oꞌmosoꞌmo lihimete apaso mulumo niteꞌ o-ledelesa neingutiꞌ do luꞌ izaaꞌ neive Izesuꞌnimuꞌ nene noluve.