UOLI VOLOXU ANE PAULO MUKAUKAVU MULAI NOXIꞌA
TA EPESO
Vaikala lamana
Paulo mukaukavu uoli voloxu ane ꞌo mulai noxiꞌa ta Epeso, xo umasaxa sou ulamanalixaꞌa aloxo ꞌo. Xavutala noxou Lataua ne lexe upitanu mimii teitexi no opo loxotolo mo mimii no lialia ꞌo ne uxolu no laaxu Kalisito mo Anu uxolu kisou mimii ne ukalusi (1:10). La sou Lataua mumasaxa lexe uavutinoxu ta mitema noxou sou ipita ixolu noxou Kalisito mo ixali vilesisi.
Paulo musokou vaivaikala noxou la mulamanalixu vaikala kisou lexe Lataua musosovosiꞌa ta mitema noxou la mupitaneꞌi no anu voteꞌi a loxovaa. Anu mulamanalixu lexe no anu tanutanuxu noxou Lataua, la muꞌoxoneꞌi mixali vilesisi. No anu xaixai noxou Iesu la Lataua mululusou susu noxiꞌa, xe mulivulixaꞌa no anu sakisaki sou susu. Mo Anu mulosiꞌa Uleenu Tavuna loxo Anu sosovo noxou sou uꞌoxonu mimii lalaixe loxo Anu musakiinu vaikalasou tei (1:14). Xe tameisou la Paulo muvikala lexe ta mitema ane iloꞌa Kalisito mipita ne ipita ixali vilesisi no anu maulixaꞌa. No anu viavaikala noxou Paulo la anu muꞌoxonu vaikala tovolaꞌi moseꞌi sou ulamanalixaꞌa ta mitema noxou Lataua lexe aneꞌi mipita noxou Iesu la aneꞌi mixali vilesisi. Anu muꞌoxo lexe ta temanu lalotu ne loxo itema vasimolu ia Kalisito anu muxali kisou (4:1). Mo mutovolaꞌinu vile lexe aloxo tani, ia Iesu anu loxo atolaxu tani (2:19-22). Xe aloxo sema ilou mulu mitaulaꞌi, la Iesu aloxo sema mulue (5:22-32). No anu uoli voloxu ane ꞌo la nenge tamomomo sou tamaisou lamana mii maꞌia lailaixe Lataua muꞌoxonu mulai noxiꞌa ta mitema noxou.
Aꞌalo muai no nano aloxo ꞌo
Vaikala lamana 1:1-2
Kalisito anu kisou mimii mukalusi 1:3-14
Lakilaka noxou Paulo 1:15-23
Noxou Kalisitosi la nenge temauli 2:1–3:21
ꞌIlixo sou lalotu maninasou 4:1–6:20
Vaikala sou sexela xe lakilaka 6:21-24
1
1 ✡ Apo 18:19-21; 19:1Eni Paulo aposeli noxou Kalisito Iesu no anu masaxa noxou Lataua mupalusilo sou akaukavunu vaivaikala ane ꞌo ulai noxinge ngingi ta mitema noxou Lataua, mo ngingi ane ngemuxaxu tangengi noxou Kalisito Iesu ne Epeso. 2 Eni akilaka lexe alauna mo opo seꞌisisi noxou Lataua Maminge mo Tila Iesu Kalisito uxolu noxinge.
Alualu Noxou Kalisito Muneꞌe Noxinge
3 ✡ Ep 2:6Taꞌitinu Lataua ualasou anu Tila noxinge Iesu Kalisito Momu. Noxou Kalisito la sou Anu mualusinge no anu mii lailaixe teitexi no opo loxotolo sou usuꞌuli uleenenge. 4 ✡ Ioa 15:16Xo no mine Anu ukoinu mimii uao la, Anu musosovosinge. Mo no iou Lataua la nenge malemalenga mo ta noxou la, ta mitema ixalisou susu vile noxinge uasi. 5 ✡ Ioa 1:12No anu tanutanuxu noxou Lataua la Anu xavutalau lexe, noxou Iesu Kalisito la Anu umoxoꞌinge lexe nenge taxali loxo anu ta ꞌolu. Anu tanu mo masaxa tatila noxou aloxo ne. 6 La sou nenge taꞌitinu Lataua ualasou no anu alauna lailaixe ane Anu mulosinge vitanisi muxolu noxou Iesu anu ane Anu tanuxu musuku. 7 ✡ Ep 2:7; Kol 1:14Alauna tatila muꞌanaꞌana noxou Lataua la munoꞌu ꞌulusinge no anu sialuxu Iesu. La sou Anu mululusou susu noxinge no anu alauna noxou. 8 No anu alauna noxou la Anu muꞌanaꞌanalinenge no anu xavutala laixe mo lavulavu lailaixe. 9 ✡ Rom 16:25Mo Anu mumolo tanuou mii maiꞌa ane lexe Anu uꞌoxonu no anu xaixai naxou Kalisito. Ia xavutalau ne tei la mutalume, ia vaimomo ꞌo Anu mulosiengexu xavutala noxou ne. Anu uꞌoxonu manina sou ne. 10 ✡ Kol 1:16, 20Xavutala ne aloxo ꞌo, xavutalau ne. Mo voxo ulai ukalu la Anu mupitanu mimii latala teitexi no opo loxotolo mo no lia ꞌo mukalusi ne muxolu loxo kisiꞌa Kalisito.
11 ✡ Rom 8:28-29Mo noxou Kalisito la sou Anu xavutala mo masaxa noxou anu ane muꞌoxonu mimii latala mukalusi ne musosovosixe lexe nexi ta naꞌu maninasou. 12 Anu musosovosixe ta Iutaiasi tei, xo nexi teloopala noxou Kalisito. La sou nexi taꞌitinu Lataua no anu alauna lailaixe noxou ne. 13 Mo ngingi kalumo ngelomusou vaikala manina noxou Kalisito. La sou ngexali ngexolu noxou la anu aꞌalo lailaixe sou Lataua mupamaulingengi. Mo ngemuxaxu tangengi noxou Kalisito la sou mumomomo sou vaikala noxou Lataua e musakii tei lexe umulaxu sosovo vile noxinge. Sosovo noxou ne ane Uleenu Tavuna noxou. 14 ✡ 2Ko 1:22Nenge tenoꞌu Uleenu Tavuna la sou nenge tamomomo sou tanoꞌu mimii lailaixe teitexi no opo loxotolo ane Lataua mulalaxiinu sou ulosiꞌa tamitema noxou. La sou nenge taꞌitinu ualasou no anu alauna noxou singe.
Lakilaka Noxou Paulo
15 Aloxo ne la sou no mine eni elomusinge lexe ngingi ngemuxaxu tangengi noxou Tila Iesu mo ngingi tangengixaꞌa ta mitema noxou Lataua. 16 La sou eni axavutalangengi no anu lakilaka noxilo mo alemolu laixe noxou Lataua utotomu. 17 ✡ Kol 1:9Mo utotomu ne eni akilaka ulai noxou Lataua e Tila noxinge Iesu Kalisito. Anu Maminge xavi musuku lexe ulosinge Uleenu sou ulosinge xavutala lailaixe, mo ngalavusou Lataua laixe, xe upalapalaꞌalixu laaxu vaivaikala noxou ane mutalume. 18 Mo eni akilaka kalumo lexe ukisiinu xavutalamengi mo sou xavutalamengi ulamana no anu mii maꞌia ane anu muꞌavalinge la ngingi ngeloopala no anu, mo ngalavusou laixe lexe lavuluti lailaixe ne Lataua ulosiꞌa ta mitema noxou. 19 ✡ Kol 1:11Mo eni akilaka lexe nenge ta mitema ane tamuxaxu tanenge noxou ne, talavusou xavi noxou Lataua a uxolu noxinge. Xavi noxou Lataua e uxaxai noxinge ne anu uxaxai la xavi musuku umomomo sou tatilovo sou uasi. 20 ✡ Lex 110:1; 2Ko 13:4; Kol 2:12Xe no mine musoli la no anu xavi noxou Latauasi la mutulusou. No anu xavi ano ꞌo la Lataua mulaixu sou muxolu no avolu tema teitexi no opo loxotolo. 21 ✡ Kol 1:16; 2:10La Anu muxolu kisiꞌa ta uleenu ane mixolu teitexi no opo loxotolo, mo muxolu kisiꞌa ta mitema e iulaxuneꞌi ta mitema no lia ꞌo mo ta tatila no lia ukalusi ꞌo xe ta uleenu ane xavineꞌi musuku kalumo. Anu munoꞌu uala tila manina. Uala tila ne sou vaimomo ꞌosi uasi, sou ꞌiliꞌi kalumo. 22 ✡ Lex 8:6Mo Lataua mumuxaxu mimii latala muxolu no laaxu mo musosovo sou lexe Anu uxolu kisou mimii latala ukalusi, mo uxolu kisou noxiꞌa ta mitema ilotu noxou Iesu. 23 ✡ Rom 12:5; Ep 4:10, 15; Kol 1:18Lalotu ne anu Kalisito vasimolu. Anu muxolu mo muꞌanaꞌana no anu mimii latala mukalusi mo muꞌanaꞌana no anu lalotu noxou.