10
Angelo Xe Kaukavu Vile Kituꞌa Mipipinu
Mo eni emaisou angelo vile la xaviinu musuku molu teitexi no opo loxotolo muluꞌe. Anu muluꞌe la tamuxala mutaasou vasimolu mukalusi mo muloxu leleꞌe muxolu no kisou mo iou loxo aso xe tavaꞌu loxo atola navu uꞌaniꞌani no anu. Mo anu mutetelisou kaukavu vile kituꞌa mipipinu muxavutala muai no avolu. Anu mutulusou tavaꞌu tema no luaki xe tavaꞌu ae mutulusou no lia. Anu mutulu mukalu, la muunga toxoxaꞌa loxo laeoni. No mine anu muunga, la leleꞌe muxatele tamei mukululu sou muvikala. Tan 12:4, 9Xe no mine leleꞌe muxatele tamei muvikala, la eni sou lexe asokoꞌu akaukavunu mii maꞌia ane eni elomusou ne. La ua, eni elomusou ꞌava vile molu teitexi no opo loxotolo muluꞌe noxilo aloxo ꞌo, “Napalaꞌalixu mo nakaukavunu vaikala ane leleꞌe muxatele tamei mulemolu uasi.”
Lap 32:40; Tan 12:7La angelo e eni emaisou tavaꞌu vile mutulu no luaki xe vile no lia mutolosou avolu tema mulai teitexi no opo loxotolo, sou musosovo lexe manina teitexi noxou anu ane umauli utotomu mo kaluxu uasi mo mukoinu loxotolo ilou lia mo luaki iloꞌa ta mimii mixolu no anu. Xe mukalu, la muvikala lexe, “Lataua uvoovoxo la uasi! Amo 3:7Ia no mine angelo muxatele tameisou noxiꞌa utaunu xoolau noxou, la mii maꞌia noxou Lataua e mutalume ne, uxali lamana ukalusi aloxo anu muvikalaneꞌi ta mitema sou xaixai vitanisi noxou ane ta mitema sou palomatana.”
Anu muvikala aloxo ne mukalu, la ꞌava e eni elomusou tei molu teitexi no opo loxotolo muluꞌe noxilo la muvikalaleli la aloxo ꞌo “Nalai mo nanoꞌu kaukavu mipipinu ane muxavulala uai no avolu angelo e tavaꞌu vile mutulu no luaki xe vile no lia ꞌole.”
Ese 2:8–3:3La sou eni elai noxou angelo ne sou lexe ulosilo kaukavu kituꞌa ane mipipinu. La anu muvikalaleli aloxo ꞌo “Nanoꞌu mo naꞌou. Naꞌou, la tuꞌaxu no anaxene loxo unuxu ia sixula no oponeni.” 10 La eni elai enoꞌu kaukavu kituꞌa mipipinu noxou angelo avolu la eꞌou. La tuꞌaxu no anaxo loxo unuxu ia sixula no opoleli. 11 La anu muvikalaleli lexe, “Nini nalai mo napalomataneꞌi no anu mii maꞌia uxali iliꞌi noxiꞌa ta mitema tavuꞌalo ane mixolu no tuatuala mo, vaivaikalaiꞌa iouiou xe ta tatanaanu tuala.”

10:4: Tan 12:4, 9

10:5: Lap 32:40; Tan 12:7

10:7: Amo 3:7

10:9: Ese 2:8–3:3