Aisaiya
Wonawiiakowa
Mmko bukana na peroveta tana ghamana iviwaghaneni, kana waghawagha na Aisaiya. Touna bodu 750 BC kamone Jerusalemne imakae. Bukana sitore rereyi da riba aroba:
Chapter 1 da inagho Chapter 39 na Asariya kubura kana kiiwawo maragasina yana iyo damdi teya dam tupadi Isrel da Jiuda damdi riiridiye siyiaveyedi bi siyageegeeiwayidi na yisisiyeni. Perovetina Jiuda damdi iwonedi da toudi gegha kiiwawo da wiiyogha damdi siyitumaghanedina bi God kawagha siyitumaghaneni da yana sisiya siyakivini.
Chapter 40 da inagho Chapter 55 na Babilon kana kiiwawo igeghomiiri dam Jiuda igeeiwayi bi kana wawaya korotodi yawayawiidi ikabidi sinagho Babilone siyamakae. Peroveta noko kuburine Jiuda damdi iwonawiikayokayowanidi bi iwonedi da metagha God inakabidi sinaveramagha Jerusalemma bi yawa wouna nama inaveredi.
Chapter 56 da inagho Chapter 66 na Jiuda damdi siveramagha Jerusalemne siyamakae bi murine yisisiyeni. Peroveta na God yana nuwagiura Jerusalem da kate dam tupadi kubura debane kiiravidiye yisisiyeni.
2
Nuwaruriri Makewaghawaghasina
1 God awaki Jiuda kubura da Jerusalem kwanatuna kamodiye inabera, na warana mmakatanina Eimos natuna Aisaiya iverenina.
2 Raghani tughurina yapiipiika na mmkona awaki inatubugha:
Koya meme Yawe God yana bare yamiimiiri na inamakewaghata.
Touna inagee kirakii geware koya mududi naboni.
Dam tupadi kubura debane na sinikabiriyeni nabo da sinakabepepa.
3 Bi wawaya korotodi nabo sinanagho na sinawona bo,
“Kopiika, tananagho Yawe God yana koyae,
nabo tananagho Isrel kana God yana bareye.
Name iniyeveveda da metagha tanamake
bi yana kedae tanapepewa.”
Basuna wiiyeveveyana na Zaiyonma inakanibu,
bi Yawe God ivisisiya na wonana Jerusalem kamonama inakanibu.
4 Raghanina dam siniaviya kabivivirana na
God initupawamiwamiredi da yadi berona inakabiwiirotomani.
Dam gisigisidi yadi wiigamowana inakabiwiidouvidi.
Toudi yadi seri ghamadi sinakasiwiibena da roverove yewadi,
bi yadi iyo sinakasiwiibena da wawa kana yewakwiikwii gisigisidi.
Dam tana geyadi seri sinayouna bi dam tana siniaviyena mayedina,
bi kate bada gewiirouwa kiiravine sinakabununaghana.
5 Isrel dammi, kopiika, tanabera
da Yawe God yana yeghane tanapepewa meko iviyevevedana.