1-2 Ho꞉len a꞉namio꞉ Ablam eyo꞉ silba mole o꞉lia꞉, go꞉l o꞉lia꞉, a꞉la꞉ta꞉ga꞉ no꞉ fofo꞉wo꞉lo꞉ modo꞉ elen. Ablam e Isib heno꞉ ta꞉ta꞉ga꞉ ha꞉nakiyo꞉, ene ingayo꞉lo꞉, Lodo꞉lo꞉, a꞉la꞉ta꞉ga꞉ ene kelego꞉ tambo tililia꞉ga꞉, Negeb hen a꞉namida꞉ ane. 3 A꞉la꞉ta꞉ga꞉ iyo꞉ Negebo꞉ ta꞉ta꞉ga꞉ ha꞉nakiyo꞉, hena꞉ usa alila꞉li aneyo꞉, Betel hen a꞉na fa꞉la꞉dowo꞉. Betel amisa꞉no꞉ nol, Ai amisa꞉no꞉ nol, a꞉lo꞉ us a꞉na, tamin amilo꞉ elo꞉ sen a꞉na fa꞉la꞉dota꞉ga꞉ dowo꞉. 4 Hen a꞉no꞉ tamin amilo꞉ elo꞉ ulo꞉ dibida꞉i fa꞉la꞉nda꞉sa꞉ga꞉ imili alitakilo꞉ Yawe ene wilo꞉ dulugu sio꞉wo꞉ o꞉m ko꞉lo꞉, Ablam eyo꞉ Yawe ene wiyo꞉ hen a꞉naka wa꞉ka dulugu sio꞉.

5 Ho꞉len a꞉namio꞉ Lod e Ablam o꞉lia꞉ sia꞉len. Lod eyo꞉lo꞉ kaluka꞉isale ene ayamilo꞉ sen a꞉no꞉ modo꞉ fa꞉la꞉dowaki, sibi o꞉lia꞉ kao o꞉lia꞉yo꞉ modo꞉ fofo꞉. 6 Ko꞉sega a꞉la꞉yo꞉ ua silikiyo꞉, no꞉ fofo꞉wo꞉ modo꞉ ko꞉lo꞉, hen a꞉namilo꞉ fugus o꞉lia꞉ ho꞉n ma꞉no꞉ o꞉lia꞉yo꞉ mo꞉lilo꞉ dowo꞉. 7 A꞉la꞉fo꞉ko꞉lo꞉ Ablama꞉ ene nanog dian kalu i o꞉lia꞉ Loda꞉ ene nanog dian kalu i o꞉lia꞉yo꞉ gadiaki kego꞉. A꞉la꞉ta꞉ga꞉ ho꞉len a꞉namio꞉ Ka꞉ina꞉n kaluka꞉isale o꞉lia꞉ Beles kaluka꞉isale o꞉lia꞉yo꞉ hen a꞉na sen. 8 A꞉la꞉go꞉ko꞉lo꞉ Ablam eyo꞉ Lodbo꞉ sa꞉laki, “Na꞉no꞉ so꞉lo꞉ imilise ko꞉lo꞉, na꞉n usamio꞉ mo꞉kegema꞉niki a꞉la꞉ta꞉ga꞉ nain nanog dian kalu egelebo꞉lo꞉ mo꞉kegema꞉ki asulab. 9 Ge bo꞉ba! Hen alan hono ga꞉li a꞉lab ko꞉lo꞉, na꞉no꞉ aloba꞉da꞉sa꞉ga꞉ mesa꞉niki. Ge halomida꞉ ha꞉nalega, ne kini doba꞉da꞉ ha꞉na꞉no꞉. Ge kini doba꞉da꞉ ha꞉nalega, ne halomida꞉ mesa꞉no꞉.”

10 Mo꞉mo꞉ 2.10A꞉la꞉ta꞉ga꞉ Lod e kagafo꞉liki, heno꞉ tambo sigida꞉liki ba꞉ba꞉ amio꞉, e Yodan fua꞉lo꞉ hen a꞉namida꞉yo꞉lo꞉, Soa amisa꞉n doba꞉da꞉yo꞉lo꞉, hen o꞉lia꞉ ho꞉n o꞉lia꞉yo꞉ tambo nafa ko꞉lo꞉ ba꞉ba꞉. Hen a꞉no꞉, Isib hen nafa o꞉lia꞉ Yawe ene egelo꞉, Ida꞉n hen o꞉lia꞉yo꞉ o꞉leo꞉ngo꞉ ba꞉ba꞉. (O꞉g ho꞉len a꞉namio꞉ Sodom amisa꞉n o꞉lia꞉ Gomola amisa꞉n o꞉lia꞉yo꞉ a꞉na sen, mo꞉wo꞉ Yawe eyo꞉ amisa꞉n a꞉la꞉ a꞉no꞉ o꞉semo꞉ mogagilaki mo꞉yasala꞉.) 11 Lod e Yodan fua꞉lo꞉ hen a꞉namida꞉yo꞉ nafa ba꞉da꞉sa꞉ga꞉, hen a꞉no꞉ e dia꞉no꞉ da꞉fea꞉sa꞉ga꞉yo꞉, e Ablamo꞉ ta꞉ta꞉ga꞉, ofdo꞉ yan doba꞉da꞉ a꞉na mesa꞉ni ane. 12 A꞉la꞉fo꞉ko꞉lo꞉ Ablam e Ka꞉ina꞉n hen a꞉naka sen. A꞉la꞉ta꞉ga꞉ Lod e hen fua꞉lo꞉ amisa꞉n noldo꞉ a꞉lab us a꞉na silikiyo꞉, eyo꞉ helebeso꞉g ayo꞉ ho꞉len no amio꞉ nowa dia꞉liki a꞉la꞉li aneyo꞉, Sodom amisa꞉n aniba fa꞉la꞉dowo꞉. 13 Sodom kaluka꞉isaleyo꞉ tambo Yawe ene siwa꞉l amio꞉ man mogago꞉le ko꞉li ko꞉lilo꞉ dimida꞉li elen.

14-15 Ilig 7.5Lod e ha꞉na꞉sa꞉ga꞉ dowabiki, Yawe eyo꞉ Ablambo꞉ a꞉la꞉sio꞉, “Ge heno꞉ tambo sigida꞉likiyo꞉, hen ofdo꞉ yan doba꞉da꞉yo꞉lo꞉, ofdo꞉ tinan doba꞉da꞉yo꞉lo꞉, eleb doba꞉da꞉yo꞉lo꞉, kini doba꞉da꞉yo꞉lo꞉ sigida꞉li bo꞉ba. Mo꞉wo꞉ hen gilo꞉ o꞉gdo꞉ ba꞉dab a꞉no꞉ tambo gemo꞉ dimia꞉no꞉. A꞉la꞉ta꞉ga꞉ gi so꞉waya꞉lo꞉ sa꞉la꞉lab a꞉no꞉lo꞉, hen a꞉no꞉ ho꞉leno꞉ tambo ilino꞉ dowa꞉i ha꞉na꞉ib. 16 Tif amio꞉ niyo꞉ so꞉wa gilo꞉ma꞉lo꞉ sa꞉la꞉lab a꞉no꞉ modo꞉ fa꞉la꞉doma꞉ki ta꞉fa꞉no꞉ ko꞉lo꞉, iyo꞉ sa꞉ mu o꞉ngo꞉ fa꞉la꞉doma꞉ib. Kaluwa꞉yo꞉ sa꞉yo꞉ o꞉li agelan kibo꞉bowo꞉, so꞉wa gilo꞉ma꞉lo꞉ sa꞉la꞉la꞉i ha꞉nab a꞉no꞉lo꞉ o꞉li agelemabe. 17 A꞉la꞉fo꞉ko꞉lo꞉ ge dasila꞉sa꞉ga꞉, sia꞉li bebeakiyo꞉, hen we tambo hegela꞉bi. Mo꞉wo꞉ hen we niyo꞉ gemo꞉ dimia꞉no꞉.” Yawe eyo꞉ a꞉la꞉sio꞉. 18 A꞉la꞉sa꞉labiki Ablam e Betel hen a꞉no꞉ ta꞉ta꞉ga꞉ ha꞉nakiyo꞉, Heblon amisa꞉n anib a꞉namida꞉, Mameleya꞉ i ba꞉lo꞉ gelo꞉ anib a꞉na, Ablam eyo꞉ so꞉g a elo꞉wo꞉ dia꞉ga꞉ sen. A꞉na silikiyo꞉, eyo꞉ uwo꞉ dibida꞉i fa꞉la꞉nda꞉sa꞉ga꞉, Yawe ene wiyo꞉ ko꞉lo꞉ dulugu sa꞉ma꞉niki dimido꞉.