PAIHOWA
Yesu ꞌana tohepwailao ꞌidi paihowa
Luke ꞌina buki heluwena bewa ma ꞌiheꞌoteꞌoteteleya Yesu ꞌina toholohila ta ꞌina hane galewa weyahidi, ta muliyetega Yaluyaluwa Tabuna ꞌisuluma ma ꞌana tomuliyao ꞌiꞌabihe waiwaidiya, ma siguguya ta wete paihowa waiwaidi Yesu saninega sipaihowediya. Tupwana tapwalolo ꞌana tohanugetao siloꞌalehediya, ma tuwa sihewaiwaiya ta tomota baibaiwadi Yesu tetelina sihemiseya ta sibabitaisowa.
Muliyetega ꞌadi ꞌaleha madouna, sanina Saulo, ꞌinuwabuiya ma ꞌihetohepwaila Yesu weyahina, ta ꞌisakowasi tupwa mabwaiyana ꞌoidiya, ꞌiguguya Yesu tetelina, eema ꞌana siga meYudiya ꞌidi tohanugetao Pauloina siꞌwayamiya ta nuwanuwadi siloheꞌamasi. Ma hesi meLoma Paulo siꞌabiheteya, ta sitoeya Loma ꞌoina yatala weyahina ꞌidi toloina madouna Sisa matana.
Saugaina Paulo deliya ꞌimiyamiya, tohekalesiyao ꞌidi letao ꞌilelediya, beno meEpeso ma mePilipai ma meKolose ꞌidi letao, ma Pilimoni ꞌina leta, ta wete Timoti ꞌina leta heluwena.
1
Yesu ꞌana tohepwailao ꞌidi paihowa
Cae Tiyopilo, mwalo bukiina yalele nugeteya ꞌalona Yesu ꞌina paihowao ma ꞌina heꞌitao, tutaina ꞌina miya gogo gabulena ꞌana siga Yehoba ꞌitoe haneheya galewa, Yesuina ꞌina ꞌamasa mulina, mayawasina ꞌilatuwa ꞌana tohepwailao hesihesinuwadi ꞌoidiya, ta Yaluyaluwa Tabuna ꞌina waiwaiyega ꞌadi loina ꞌiꞌebwaediya. Sabwelo poti ꞌalodiya ꞌilatulatu ꞌoidiya, ta ꞌebeꞌita baibaiwadi ꞌiheꞌitediya, ꞌoinega ꞌina toholohila siꞌahwa moiseya, ma Yehoba ꞌina loina weyahina ꞌiheꞌitediya.
Cabwa baꞌidadiu simiyamiya ta ꞌadi loina ꞌiꞌebwaediya, ꞌigwae, “Sahena Yelusalema waꞌebeꞌebesine, ma hesi Tamadai ꞌina gwae hemisaina mwalo yahegwaegomiya weyahina wayamwayamwa. Wanuwatuhuyahi ꞌabehega Yoni weꞌahega ꞌiꞌabiꞌabihe babitaisowegomi ma sabwelo geya baibaiwana simiyamiya ma ꞌomi ꞌimi babitaiso Yaluyaluwa Tabuna ꞌoinega waloba.”
Yesu ꞌina hane galewa
Caigeda sauga Yesu ma ꞌana tomuliyao simiyaꞌauta, ma sihesilala ꞌoina, sigwae, “Bada, sowasowahina ma sauga bewa tauda meIsileli ꞌuhanugetegita ma taboidamo taloina hilegita?”
Ma Yesu ꞌigwae, “Tamagu tauna ꞌiloiloina, ma geya sowasowahina ma ꞌomi wasanapu to sauga ꞌina loinaedi ꞌipaihowadi. Ma ꞌomi hesi ꞌabwa Yaluyaluwa Tabuna ꞌinaowa ꞌoimiya ma ꞌiꞌabihe waiwaiyegomi, ma taugu weyahigu wahetohepwaila Yelusalema ꞌoina, ma Yudiya ma Sameliya gogonao mabwaiyadi ꞌoidiya, ta wete gogo gabulena mabwaiyana ꞌoidiya.” Cina gwaeyaowedi bewa ꞌilosalohidiya, ta matadiyega Yesu siꞌiteya ꞌihane galewa, ma yaloha ꞌalona ꞌiꞌwaiha.
10 Ciꞌebesine pwaidiya, ta ꞌabwa hene siꞌeꞌebubuna galewa, ma loheya ꞌeluwa maꞌadi ꞌaleꞌo waꞌewaꞌeꞌedi deidiya sitoholo, 11 ta sigwae, “MeGalili he, toꞌaha weyahina waꞌeꞌebubuna galewa? Yehoba Yesuina ꞌitoe pwaiya galewa, ma ꞌabwa ꞌisulu hilama, ma ꞌina suluma ꞌana ꞌita ꞌabwa gide ꞌina haneina nige waꞌiteya.”
Yudasa miyalaena
12 Coyaina sanina Olibe ꞌoinega sihila ta sitauya Yelusalema, beno geya bwaga, gide loheloheya siyawayawala sabwelo Sabati ꞌoina. 13 Ta siluhuwa ꞌidi hada ta sihaneya ꞌaigeda tupwa ꞌaliupa ꞌoina, taudi Pita ma Yoni ma Yemesa ma Andulu ma Pilipi ma Tomasi ma Batolomiu ma Madiu ta hali Yemesa (tauna Alipiyo natuna), ma Saimoni (tauna mwalo toꞌohe Isileli ꞌina miyawasi Loma weyahina), ma Yudasa (tauna Yemesa natuna). 14 Mabwaiyadi bewa sabwelo ꞌaigeda ꞌaigeda ꞌoina ꞌidi ꞌatetagwala ꞌoinega siꞌahwaꞌahwanoi Yehoba ꞌoina, wahiwahine mahetediyao, ma Meli tauna Yesu sinana, ma Yesu tasinao wete mahetediyao.
15 Bodaedi ꞌadi baibaiwa gidemusa wani handeledi ma tuweniti, ma ꞌaigeda sabwelo ꞌoina Pita gamwagamwanidiya ꞌitoholowa ma ꞌihegwaediya, ꞌigwae:
16-20 “Tasigwao, mwalo Yaluyaluwa Tabuna Debida ꞌina gwae ꞌiꞌebwaeya Yudasa weyahina, ma Buki Heꞌasisi ꞌoina ꞌimiyamiya. Yudasaina mwalo mahetedai tahetohepwaila Yesu weyahina, ma hesi ꞌida Bada ꞌitebaeya ta ꞌiꞌebwayaeya Yesu ꞌana ꞌalehao nimadiya. Ta ꞌaigeda wali Buki Heꞌasisi ꞌalona Debida ꞌina gwae Yudasa weyahina, bewa gide ꞌigwaeya,
ꞌCina gogo ꞌibisula ma gesowana ꞌeta taiya loheya ꞌoina ꞌimiya.’
Ma wete ꞌigwaeya,
ꞌMiyalaena tauna ꞌina paihowa ꞌiꞌewa.’
Coinega ꞌilobwaineya ꞌilatu gide gwae bewa ꞌigwae ꞌese.”
Pita ꞌina gwae bewa gide, weyahina Yudasa ꞌiꞌamasa pwaiya. Tauna mwalo ꞌina paihowa galana ꞌana maisa ꞌiꞌeweya ma ꞌaigeda baleꞌu ꞌigimwaneya, ta baleꞌuina ꞌalona ꞌibeꞌu talutalubuꞌiya, ta gamwana ꞌilosabuweya, ma sinaena mabwaiyana ꞌilatuwa ta tetelina meYelusalema mabwaiyadi sihesagoheya, ta ꞌenadiyega baleꞌuina sibwauweya “Akeladama,” ma ꞌana sanapu “Baleꞌu Bweyaha.”
21 Ma Pita wete ꞌigwaeya, “Coinega Yudasa miyalaena tabese, ma ꞌilobwaineya ma loheyaina mwalo mahetedai tamiyamiya sauga mabwaiyana, 22 Yesu ꞌina babitaiso Yoni ꞌoinega ꞌana siga ꞌina hane galewa, ꞌina sakowasi mabwaiyana ꞌoidiya, ma ꞌane loheyaina mahetedai tahehepwaila Yesu ꞌina toholohila weyahina.”
23 Coinega loheya ꞌeluwa sanidiyao siꞌabi lagasidiya, ꞌaigeda Yosepa, tauna sibwauweya Basaba, tauna wete sibwauweya Yusito, ma heluwena loheya sanina Mataya. 24 Coinega siꞌahwaꞌahwanoi Yehoba ꞌoina, sigwaeya, “Bada yo, ꞌowa tomota mabwaiyama ꞌima nuwatuhu ꞌusanasanapudi, ꞌoinega ꞌino hesinuwa loheloheya ꞌeluwa bewa ꞌoidiyega ꞌuheꞌitae ꞌoima, 25 ma Yudasa miyalaena, ma tauna ꞌihetopaihowa ma ꞌihetohepwaila Yesu weyahina, weyahina Yudasa paihowaina ꞌiꞌebesineya ta ꞌitauya tauna ꞌina tupwa.”
26 Coinega dimwa ꞌeluwa ꞌoidiya sanidi silelediya ma siula hanehedi ma sibeꞌuwa, ta Mataya sanina ꞌinugeta, ꞌoinega tauna ꞌiluhu Yesu ꞌana tohepwailao site lebeniyedi baꞌidanao, ta mahetediyao sipaihowa.