26
Gode da Ea Fi Dunuma Hasalasu Hou Imunu
Eso da misunu, amoga dunu da Yuda soge ganodini agoane gesami hea:mu,
“Ninia moilai da gasa bagade.
Bai Gode Hisu da ea gagoi gaga:lala!
Moilai logo ga:su doasili,
Godema fa:no bobogesu fi,
moloidafa hamosu dunu fi,
amo golili masa:ne, doasima!
Hina Gode! Nowa dunu da mae yolesili, Dia hou lalegaguli,
Dima fa:no bobogesea,
Di da ea dogo denesili, olofosu iaha.
Bai e da Dima dafawaneyale dawa:sa.
Dilia! Hina Godema eso huluane dafawaneyale dawa:le fifi ahoanoma.
E da mae fisili, nini gaga:mu.
E da gasa fi dunu amo ligia gudui.
E da gasa bagade moilai bai bagade amo ganodini ilia esalu
amo wadela:lesili, ea gaga:su gagoi mugululi, osoba gisalugala:i.
Dunu amo da amo gasa fi dunu amoga musa: banenesi dagoi,
amo da gasa fi ilia moilaiga hasanasili, mugului moilaiga ososa:gisa.
Hina Gode! Di da moloidafa hou hamosu dunu ilia logo ida:iwane fodosa.
Ilia logo ahoasu da umidafa.
Ninia da Dia hanai amo fa:no bobogesa.
Amola ninia dafawane esaloma:beyale dawa:lusu
amola ninia hanai da Di fawane.
Gasia na da Dia hou bagadewane hanai gala.
Hobea, Di da osobo bagade fifi asi gala huluane ilima fofada:sea,
ilia da moloidafa fofada:su hou ba:mu.
10 Dia da wadela:i hamosu dunu ilima asigidafa hou hamosa,
be ilia da hou ida:iwane hamomu hame dawa:.
Amola amo soge ganodini, ilia da moloidafa dunu gilisibiba:le,
amomane wadela:i hou hamosa,
amola Dia hou ida:iwane amola gasa bagade amoma nodoma:ne higasa.
11  * Hibulu 10:27Di da Dia ha lai dunu ilima se imunu, amo ilia da hame dawa:.
Hina Gode! Ilia da gogosiama:ne, ilima se ima.
Se iasu Di da ilima ima:ne ilegei, amo ilima ima.
Di da Dia Fidafa ilima asigisa, amo Dia ha lai dunuma olelema.
12 Hina Gode! Di da ninima imunuba:le,
ninia da bagade gagui dunu agoane ba:mu.
Ninia gagui liligi, amola ninia bidi lai huluane, da Dia hamobeba:le laha.
13 Ninia Hina Gode! Eno dunu da ninima ouligisu galu.
Be Di fawane da ninia Ouligisudafa.
14 Be amo musa: ouligisu dunu da bogole, bu hame esalumu.
Ilia a:silibu da bu hame wa:legadomu.
Hina Gode! Di da ilima se ianu, ili wadela:lesi dagoi.
Dunu huluane da ili bu hame dawa:mu.
15 Hina Gode! Dia da ninia fi amo bu bagade hamoi.
Dia da ninima soge eno ia dagoiba:le, ninia soge da bagade ba:sa.
Amola amo hou ba:beba:le, osobo bagade dunu da Dima nodoi.
16 Hina Gode! Di da Dia fi dunu ilima se iasu.
Amola ilia da se nababeba:le, Dima wele sia:su.
17 Hina Gode! Dia hamobeba:le, ninia da uda e da mano lalelegemu gadenesa,
se nababeba:le wele sia:sa, amo defele ninia wele sia:sa.
18 Ninia da se bagade nabi, be liligi hame lalelegei.
Ninia soge fi da hasalasu hou hame ba:i.
Ninia hamobe ea bidi da hamedei ba:sa.
19  Da:niele 12:2Ninia fi dunu bogoi da bu esalumu.
Ilia bogoi da:i hodo da bu esalebe ba:mu.
Dunu huluane bogoi uli dogoi ganodini golai dialu da nedigili, wa:legadole,
hahawane gesami hea:mu.
Oubi mogele lalu fadagagala:le nebe agoai da osobo bagade nasegagisa.
Amo defele Hina Gode da hemone bogoi dunu ilima gaheabolo esalusu imunu.
Fofada:nanu Se Iasu amola Bu Hahamosu
20 Na fi dunu! Dilia diasu ganodini asili, gagili salima. Dilia wamoaligima. Hina Gode Ea ougi da dagosea fawane, bu misa. 21 Hina Gode da Ea Hebene esalebe amoga osobo bagade fifi asi gala dunu ilia wadela:i hou hamobeba:le, se bidi imunusa: manebe. Dunu huluane da fasu dunu amo da wamowane fane legesu hou hamoi, amo huluane dawa:mu. Amola osobo da fane legei dunu amo bu hame wamolegemu.

*26:11: Hibulu 10:27

26:19: Da:niele 12:2