18
Da:ibidi Ea Hasalasu Gesami
(2 Sa:miuele 22:1-51)
Hina Gode! Na da Dima bagadewane asigisa.
Di da na gaga:sudafa.
Hina Gode da na gaga:sudafa.
E da na gasa bagade gagoi gala.
E da na gaga:sa amola na da E guga esalea,
enoga wadela:mu da hamedei.
E da gaga:su liligi agoaiga na gaga:sa.
Na da Hina Godema wele sia:sea, E da na ha lai ilima na gaga:sa.
Hina Godema nodoma!
Na bogomu gadenenewane ba:i.
Wadela:su liligi hano fugala:i agoane da na dedebomu galu.
Na bogomu da gadenenewane ba:i.
Bogoi uli dogoi da sani agoane dili dialu.
Na da se nababeba:le, Hina Godema wele sia:i dagoi.
Na da E na fidima:ne wele sia:i.
E da Ea Debolo diasu ganodini na fidima:ne wele sia:su nabi dagoi.
Amalalu, osobo bagade da fofogoi.
Goumi ilia bai amola da igugui.
Bai Gode da ougi bagade ba:i.
Ea mi gelabo amoga lalu mobi ahoanebe ba:i.
Ea lafidili, lalu sawa: amo da liligi nenanebedawa:,
amola nasubu su gilisili ahoanebe ba:i.
E da mu alalo gadelai amola mu mobi gasimiginisi gala
amo da:iya osoboga dalebe ba:i.
10 E da liligi hedofo galebe amoga fila heda:le ahoanebe ba:i.
E da fedege agoane fo da hedofo galebe amoga fila heda:le ahoanebe ba:i.
11 E da gasimigi amoga uligi ba:i.
Mu mobi gadugagi amo da hanoga nabai amoga E sisiga:i dagoi.
12 Mugene igi agoai amola lalu gona:su digagala:su
da ha:ha:na bagade amoga misini mu mobi gasimigi
amo dugagale dalebe ba:i.
13 Amalalu, Hina Gode Ea sia: da muagado gugelebe agoane nabi.
Dunu huluane da Gode Gadodafa Ea sia: nabi.
14 E da Ea dadi dili fisiagagai.
Ea ha lai dunu huluane da afafane hobea:i.
E da ha:ha:na digagala:su amoga gala:beba:le, ilia da hobea:i dagoi.
15 Hina Gode! Di da Dima ha lai ilima gagabole sia:noba
amola ilima ougiba:le gasa bagade sia:noba,
hano wayabo bagade da hale hafoga:i dagoi ba:i.
Osobo bagade ea bai huluane ba:i dagoi.
16 Hina Gode da ea lobo gududa:le guduli, na gagulaligi,
amola hano lugudu bagade amoga na hiougili gadoi.
17 Na ha lai dunu da gasa bagade.
Ilia gasa da na gasa baligi dagoi.
Ilia da na bagade higasa.
Be ilia da nama doagala:lalu, Hina Gode da na gaga:i.
18 Na da se nabaloba, ilia da na doagala:musa: misi,
be amomane Hina Gode da na gaga:i.
19 E da nama hahawaneba:le, na gaga:i.
20 Na da wadela:i hou hame amola moloidafa hou fawane hamobeba:le,
Hina Gode da na hahawane dogolegele fidisa
amola nama bidi ida:iwane iaha.
21 Na da Gode Ea hamoma:ne sia:i dedei amoma fa:no bobogesu
amola Godema fa:no bobogei na da hame buhagi.
22 Na da Ea sema huluane nabawane hamosu
amola Ea sia: nababeba:le hame nabasu hou hame hamosu.
23 Na da afuda:le hame hamoi amola moloi hou fawane hamonanu.
Hina Gode da na hou dawa:.
24 Amo na hou dawa:beba:le,
E da nama bidi ida:iwane iaha.
25 Hina Gode! Nowa dunu da Dima mae fisili,
Dia hou dafawaneyale dawa:iwane hamonanea,
Di da amo dunu amola hamedafa yolesimu.
Di da nowa dunu moloidafa ba:sea, amo dunu hahawane fidisa.
26 Di da ledo hamedei fofoloi dunu ilima fofoloi ba:sa.
Be wadela:i hamosu dunu Di higasa.
27 Nowa dunu amo ea hou hi fonobosea, Di da amo dunu gaga:sa.
Be nowa da ilila: hou gaguia gadobe, amo Di da banenesisa.
28 Hina Gode! Di da nama hadigi iaha.
Amola gasimigi Dia fadegale fasisa.
29 Di da nama gasa amo nama ha lai dunuma doagala:musa: defele gala, amo iaha.
Amola gasa amo ha lai dunu ilia gagoi amo mugulumusa: defele gala,
Dia da nama iaha.
30 Gode Ea hou da noga:idafa amola moloidafa.
Ea adi hamomusa: sia:sea, E da hamosa.
Nowa dunu Ema masea, E da gaga:su liligi defele
amo dunu ea ha lai dunuma gaga:sa.
31 Hina Gode Hi fawane da Godedafa.
Hi fawane da nini gaga:su dunu.
32 Gode Hi fawane da nama gasa iaha
amola na da logoba:le ahoasea, E da na noga:le ouligisa.
33  * Hibulu 3:19E da na goumiba:le noga:le heda:ma:ne,
na emo amo “dia” ohe ea emo defele hamosa.
Amola na da goumiga ahoasea, E da na mae dafama:ne noga:le ouligisa.
34 E da gegesu hou nama olelesa.
Na da gasa bagade oulali amoga gegemusa:, E da nama gasa iaha.
35 Hina Gode! Di da na gaga:lala.
Dia ouligisu hou da na fidibiba:le, eno dunu da nama nodosa.
Dia gasa fawane da na gaga:i dagoi.
36 Dia fidibiba:le, na da na ha lai amoga hame gagulaligi ba:i.
Na da hamedafa dafai.
37 Na da na ha lai dunu sefasili, gagulaligisa.
Amasea, gegesu mae fisili, ilia da wadela:lesi dagoi ba:sea fawane yolesisa.
38 Na da ili fane legesea, ilia da bu wa:legadomu gogolesa.
Ilia da na emo gadenene dafasea, hasali dagoi ba:sa.
39 Di fawane da na gegema:ne nimi iaha
amola na ha lai dunuma hasalasima:ne gasa iaha.
40 Dia hamobeba:le, na ha lai da naba:le hobeasa.
Nowa da nama higasa, na da wadela:lesisa.
41 Ilia da fidima:ne diginiwane wele sia:sa.
Be gaga:su dunu hame ba:sa.
Ilia da Hina Godema wele sia:sa, be E da hame alofesa.
42 Na da ili gagoudane amola ilia gulu dou agoane hamone
da fo misini doga:le fasisa, amo defele
ilia da fafu logoga dialebe agoane ba:sa
amola na da ilima ososa:gisa.
43 Hame nabasu dunu da nama hasalasimusa: dawa:i.
Be Di da na gaga:i.
Di da na fifi asi gala ilima hina bagade hamoi.
Amola dunu fi na da musa: hame dawa:i,
amo da na ouligimusa:, nama misi dagoi.
44 Ga soge fi dunu da nama beguduli, na sia: nabawane fa:no bobogesa.
45 Ilia da beda:ga ilia gasa bagade gagoi amo fisili, yaguguiwane gadili maha.
46 Hina Gode da esala. Na Gaga:su dunuma nodoma!
Na Gaga:su Gode amo Ea gasa bagade hou amo dunu huluanema olelema.
47 Ea da na ha lai ilima hasalasimusa: nama gasa iaha.
Na da dunu fi ilima hasalasimusa:, E da amo dunu fi banenesisa.
48 E da na gaga:sa.
Hina Gode! Na da nama ha lai ilima hasalasimusa: Dia hamosa.
Amola nimi bagade dunu nama mae doagala:ma:ne, Dia da na gaga:sa.
49  Louma 15:9Amaiba:le, na da dunu fifi asi gala amo ganodini Dima nodosa.
Na da Dima nodone gesami hea:sa.
50 Gode da Ea hina bagade ilegei ema
hasalasisu hou bagade iaha.
E da dunu amo E da ilegei ema Ea asigidafa hou olelesa.
E da Da:ibidi amola egaga fi ilima
Ea asigidafa hou mae fisili eso
huluane olelelalumu.

*18:33: Hibulu 3:19

18:49: Louma 15:9