32
Godema Wadela:i Hou Sisane Fofada:su Amola Gogolema:ne Olofosu
1 *Louma 4:7-8Nowa dunu ilima Hina Gode da ea wadela:i hou gogolema:ne olofoi dagoi,
ilia da hahawane gala.
2 Nowa dunu da ogogosu hame dawa: amola wadela:i hou hame hamobeba:le,
Hina Gode da ema diwane hame udidisa, amo dunu da hahawane gala.
3 Na da na wadela:i hou hame sisane fofada:i ganiaba,
amogalu na da eso huluane dini ianu, na da:i da gasa hame ba:i.
4 Hina Gode! Di da nama hayoga amola gasia nama se bidi iasu.
Hano da odega esoi amoga hafoga:sa amo defele,
na gasa huluane da gogaea:i ba:i.
5 Amalalu, na da na wadela:i hou amo Dima sisane fofada:i.
Na wadela:i hou huluane, na da Dima hame dedeboi.
Na da huluane Dima sisane fofada:musa: dawa:i.
Amola Di da amo wadela:i hou huluane gogolema:ne olofoi.
6 Amaiba:le, Dima mae fisili dafawaneyale dawa:su dunu da bidi hamosu ba:sea,
Dia fidima:ne sia:ne gadomu da defea.
Amasea, bidi hamosu da hano heda:i defele manebe ba:sea,
amo da ilima hame doaga:mu.
7 Di da na wamoaligisu sogebi agoai gala.
Bidi hamosu da nama mae doaga:ma:ne, Di da na gaga:mu.
Na da Dia gaga:su hou dawa:beba:le, ha:giwane gesami hea:sa.
Bai Di da na gaga:lala.
8 Hina Gode da amane sia:sa, “Na da dia masunu logo agoane masa:ne olelemu.
Na da dima dawa:digima:ne sisasu olelemu.
9 Hosi amola ‘miule’ da gagaoui agoane.
Dunu da ili dawa:digima:ne, gula misili amoga adonana ahoa.
Be amo defele, dilia gagaoulewane mae hamoma.”
10 Wadela:i hamosu dunu da se nabasu ba:mu.
Be dunu amo da Hina Godema dafawaneyale dawa:sa,
amo da Ea mae fisili asigidafa hou amoga gaga:i dagoi ba:sa.
11 Dilia moloidafa dunu! Obenane amola hahawane nodoma!
Bai Hina Gode Ea hamoi da noga:idafa.
Ema nabasu dunu, dilia! Hahawaneba:le, wele sia:ma!