47
Gode da Ouligisudafa
1 Dunu huluanedafa! Hahawane ba:le, lobo fama!
Godema nodomusa:, gesami ha:gi hea:ma!
2 Hina Gode Bagadedafa amola Gadodafa, Ema beda:ma!
E da Hina Bagade amola E da osobo bagade huluanedafa ouligisa.
3 E da nini amo fifi asi gala dunu huluane ili hasalima:ne, nini fidi.
E da ninima osobo bagade fifi asi gala ouligima:ne, gasa ninima i.
4 Ninia waha esalebe soge amo E da ninima ima:ne ilegei.
Ninia da Gode Ea dogolegei fi dunu.
Amola ninia da amo soge gaguiba:le, hahawane nodosa.
5 Gode da Ea Fisu amoga heda:sa.
Hina Gode da amoga heda:sea
Ea fi dunu da nodone wele sia:sa amola ‘dalabede’ ha:giwane dusa.
6 Godema nodone gesami hea:ma!
Ninia Hina Bagade Ema nodone gesami hea:ma!
7 Gode da osobo bagade fifi asi gala huluane ilima Hina Bagade gala.
Ema nodone gesami hea:ma!
8 Gode da Ea sema Fisu da:iya fili
osobo bagade fifi asi gala huluane ili ouligilala.
9 Osobo bagade fifi asi gala ouligisu dunu huluane
da A:ibalaha:me ea Gode amo Ea fi dunu ilima gilisisa.
Gode da dadi gagui wa:i huluane ilia gasa amo baligisa.
Hi fawane da liligi huluane ouligisa.