71
Dunu Da:i ea Sia:ne Gadosu
1 Hina Gode! Na da Dia gaga:ma:ne Dima misi.
Nama enoga maedafa hasalasima:ma!
2 Bai Di da moloidafaba:le, na fidili gaga:ma.
Na sia: nabawane, na gaga:ma!
3 Dia na ougihalisima! Na gaga:musa:, na gagili salima!
Di da na gagili salasu amola gaga:sudafa gala.
4 Na Gode!
Wadela:i amola dodona:gi dunu da na wadela:lesisa:besa:le, na gaga:ma!
5 Hina Gode! Na da Dima dafawane hamoma:beyale dawa:sa!
Na da na goihadini eso amoganini, Dima dafawaneyale dawa:su.
6 Na da na esalusu huluane Dima fa:no bobogesu.
Na lalelegei eso amoganini, Dia da na gaga:i.
Na da eso huluane Dima nodone sia:mu.
7 Na da Dia hou gasawane lalegaguiba:le, dunu bagohame da Dia hou lalegagui.
Bai Di da na gasa bagade gaga:su dunu galu.
8 Hahabe asili daeya, na da Dima nodone sia:sa
amola Dia hadigi eno dunuma sisia:i laha.
9 Na da da:i hamoiba:le, na mae higale yolesima!
Na da da:i hamone gasa hamedeiba:le, na mae higale yolesima!
10 Nama ha lai dunu da na fane legemusa: hanai gala.
Ilia da na fane legemusa: ilegele sia:daha.
11 Ilia da amane sia:sa, “Gode da amo dunu fisiagai dagoi.
Ninia da e bobogele, gagula:di!
E gaga:mu dunu da hame gala.”
12 Gode! Nama badiliadafa mae esaloma!
Na Gode! Hedolo na fidila misa!
13 Dunu amo ilia da nama doagala:sa, amo hasalasili, gugunufinisima:ma!
Dunu amo ilia da nama se ima:ne hamosu dunu, amo gogosiama:ma!
14 Na da eso huluane Dima dafawane hamoma:beyale dawa:lumu.
Na Dima gebewane baligili nodone sia:nanumu.
Dia gaga:su hou amo na dawa:mu gogolesa.
15 Na da Dia noga:idafa hou amo eno dunuma sisia:i lamu.
Be hahabe asili daeya huluane, na da Dia gaga:su amo sisia:i lamu.
16 Ouligisudafa Hina Gode!
Na da Dia gasa bagade hou amoma nodonanumu.
Di fawane da noga:idafa.
Dia noga:idafa hou amo na da sisia:i lamu.
17 Dia da na goihadini esoganini nama Dia hou olelesu.
Amola na da mae fisili, Dia ida:iwane hamosu hou sisia:i lala.
18 Wali na da da:i hamone, na dialuma da gago aligi gala.
Be Gode! Dia na mae fisiagama!
Na da Dia gasa bagade hou fifi asi gala manebe dunu ilima sisia:i lasea,
Di da ani galoma:ma.
19 Gode! Dia moloidafa hou heda:le muagado doaga:sa.
Di da liligi bagadedafa hahamoiba:le, dunu afae da Di agoai hame gala.
20 Di da nama bidi hamosu amola se nabasu amo huluane nama iasi dagoi.
Be Di da na gasa bu nama imunu.
Di da na bogoi uli dogoi amo gudu mae sa:ima:ne gaga:mu.
21 Di da na bu baligili bagadedafa hahamonesimu,
amola Di da na bu hahawane hahamonesimu.
22 Na da dafawane Dima sani baidama dusa nodone sia:mu.
Bai Di da Isala:ili Hadigi Godedafa!
Na: Gode! Na da Dia mae fisili dafawane noga:i hou amoma nodone sia:mu.
23 Na sani baidama dusia, na da hahawane wele sia:mu.
Na da na da:i huluane amoga gesami hea:mu.
Bai Dia da na gaga:i dagoi!
24 Hahabe asili daeya huluane, na da Dia moloidafa hou sisia:i lamu.
Bai dunu ilia da nama se imunusa: dawa:i,
ilia da hasalasali amola gogosia:i dagoi ba:sa.