102
Se Nababe Goi amo ea Sia:ne Gadosu
Hina Gode! Na sia:ne gadobe nabima,
amola na fidima:ne disa sia:ne gadobe nabima.
Na da se nabasu ganodini esalea, Dia na mae yolesima.
Na sia: nabawane, na wele sia:be hedolowane alofema.
Na esalusu da lalu mobi defele hedolo alalolesisa.
Na da:i da lalu dogolo agoai diala.
Na da gisi bioi agoai, banenesi dagoi ba:sa.
Na da ha:i manusa: dawa:su fisi dagoi.
Na da ha:giwane gogonomosa.
Na da:i da geloga:le, gasa dabua ba:la.
Na da gugunia sio hafoga:i soge ganodini esalebe agoai defele ba:sa.
Na da sio sia, gugunufinisi mebu ganodini esalebe, agoai ba:sa.
Na da molole diala lalabolala.
Na da sio amo da diasu dabuamogoa hisu olobolalebe, agoai ba:sa.
Eso huluane mae fisili, na ha lai dunu da nama gadelala.
Dunu amo da nama habosesa, ilia da na dioba:le gagabui aligima:ne sia:sa.
9-10 Na da nasubu naha
amola na si hano da na hano nasu amoga gilisisa.
Bai Dia da nama baligili ougi galu.
Di da na gaguia gadole, bu galagudui.
11 Na esalusu da daeya baba gala:be agoai ba:sa.
Na da gisi bioi agoai gala.
12 Be Hina Gode! Di da Fifi Ahoanusu Hina Bagade esala.
Fa:no fifi manebe dunu huluane ilia Di hamedafa gogolemu.
13 Di da wa:legadole, Saione fi ilima asigiba:le fidimu.
Ilegei esodafa da doaga:i dagoi.
Dia ilima asigimu eso da doaga:i dagoi.
14 Saione Moilai Bai Bagade da gugunufinisi dagoi.
Be Dima hawa: hamosu dunu ilia da Saione amoma asigi amola fofagisa.
15 Fifi asi gala dunu huluane da Hina Godema beda:mu.
Osobo bagade hina bagade dunu
ilia da Ea gasa bagade houba:le beda:gia:mu.
16 Hina Gode da Saione Moilai Bai Bagade amo bu buga:le gagusia,
E da Ea gasa bagade hou dunu huluanema olelemu.
17 E da Ea musa: fisiagai fi dunu, ilia sia:
amola ilia sia:ne gadobe nabimu.
18 Fa:no fifi manumu, ilia Hina Gode Ea hamoi dawa:ma:ne
amola Ema nodone sia:ma:ne, Ea hamobe huluane dedene legema.
19 Hina Gode da Ea gadodafa Hadigi Sogebi (Hebene)
amogainini osobo bagadega ba:legudui.
20 E da se iasu diasu esalebe dunu ilia gogonomosu amo nabalu,
dunu da se imunusa: fofada:i dagoi, ili halegale masa:ne fadegalesi.
21 Amasea, Saione Moilai Bai Bagadega, ilia da Ea Dio gaguia gadomu,
amola Yelusalemega, Ema nodone sia:nanumu.
22 Fifi asi gala amola hina bagade ilia fi dunu da gilisili,
Hina Godema nodone sia:ne gadosea, amo hou da ba:mu.
23 Na da goi ayeligiawane, Hina Gode da na gogaeanesi.
E da na esalusu dunumuginisi.
24 Gode! Na da:i hame hamoiawane,
na waha bogoma:ne mae oule masa.
Hina Gode! Di da eso huluane fifi ahoana!
25  * Hibulu 1:10-12Musa: hemonega, Di da osobo bagade hahamoi.
Amola Dia loboga, mu hahamoi.
26 Ilia da alalolesili, hame ba:mu.
Be Di da amanewane fifi ahoanumu.
Ilia da abula agoane, nuini abubula masunu.
Di da dunu amo da abula gisa:le ha:digisu defele,
mu amola osobo bagade ha:digimu amola ili da alalolesi dagoi ba:mu.
27 Be Di da afadenesu hou hame dawa:.
Dia esalusu da hamedafa dagomu.
28 Dia da ili gaga:beba:le,
ninia mano amola iligaga fi da eso huluane gaga:iwane esalumu.

*102:25: Hibulu 1:10-12